ສຳເລັດຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນຊຸດທີ II

0
198

ນັກສຳມະນາກອນພາຍໃນກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ສຳເລັດການຝຶກອົບຮົມທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນຊຸດທີ II ພາຍຫຼັງໄດ້ດຳເນີນມາແຕ່ວັນທີ 9 ຕຸລາ 2018 ແລະ ໄດ້ສຳເລັດລົງວັນທີ 12 ທັນວາ 2018 ດ້ວຍຜົນສຳເລັດອັນຈົບງາມ ໃນຕອນເຊົ້າຂອງວັນທີ 12 ທັນວາ 2018 ຢູ່ທີ່ຫ້ອງປະຊຸມ ສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ ໄດ້ຈັດພິທີປິດຊຸດຝຶກອົບຮົມດັ່ງກ່າວ ໂດຍໃຫ້ກຽດເຂົ້າຮ່ວມຂອງທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກວຕ, ມີທ່ານ ປອ ນ. ໄກສອນ ຈັນສີນາ , ຫົວໜ້າກົມວິຊາການ, ສະຖາບັນການເມືອງ-ການປົກຄອງແຫ່ງຊາດ, ມີບັນດາທ່ານຮອງລັດຖະມົນຕີ, ບັນດາຄະນະພັກ, ຄະນະນຳຂອງກະຊວງ, ບັນດານັກສຳມະນາກອນຈາກຫ້ອງການ, ກົມ ແລະ ສະຖາບັນພາຍໃນ ກວຕ ເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ, ທ່ານ ນາງ ສຸພາລັກ ສີລາເພັດ, ຮອງຫົວໜ້າກົມຈັດຕັ້ງ ແລະ ພະນັກງານ, ຫົວໜ້າຫ້ອງການພັກ ໄດ້ຂຶ້ນຜ່ານບົດສະຫຼຸບຕີລາຄາລວມການຝຶກອົບຮົມທິດສະດີການເມືອງ ແລະ ການປົກຄອງ ໄລຍະ 45 ວັນໃນຊຸດທີ II ນີ້. ບັນດານັກສຳມະນາກອນແມ່ນໄດ້ຮັບການຍົກລະດັບຄວາມຮູ້ຄວາມເຂົ້າໃຈ ທາງດ້ານທິດສະດີການເມືອງ ແລະ ຄວາມເປັນເອກະພາບກັນ ກ່ຽວກັບນະໂຍບາຍຂອງພັກ ກໍຄືການຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ມະຕິກອງປະຊຸມໃຫຍ່ຄັ້ງທີ I ຂອງອົງຄະນະພັກ ກວຕ. ຕະຫຼອດໄລຍະການຝຶກອົບຮົມນັກສຳມະນາກອນໄດ້ເຂົ້າຮ່ວມຕາມຫຼັກສູດການຮຽນ-ການສອນ ແລະ ສາມາດປະຕິບັດເນື້ອໃນຊຶ່ງປະກອບດ້ວຍເອກະສານ 5 ພາກວິຊາ, 39 ບົດ. ພ້ອມນັ້ນ, ບັນດາຄູ-ອາຈານທີ່ມາຈາກສະຖາບັນການເມືອງການປົກຄອງແຫ່ງຊາດ ແລະ ນັກສຳມະນາກອນ ພາຍໃນ ກວຕ ກໍໄດ້ມີການສົນທະນາແລກປ່ຽນບົດຮຽນ ແລະ ປະສົບການຕົວຈິງເຊິ່ງກັນ ແລະ ກັນຢ່າງກົງໄປກົງມາ ດ້ວຍບັນຍາກາດຝົດຟື້ນ ແລະ ເຕັມໄປດ້ວຍຄວາມຮັບຜິດຊອບ ຊຶ່ງໄດ້ມີຄວາມໝາຍຄວາມສຳຄັນໃຫ້ແກ່ກະຊວງ ເວົ້າລວມ, ເວົ້າສະເພາະແມ່ນ ນັກສຳມະນາກອນທີ່ເຂົ້າຮ່ວມໄດ້ມີການຍົກລະດັບຄວາມຮູ້ຄວາມສາມາດໃນຊຸດອົບຮົມຄັ້ງນີ້.
ຫຼັງຈາກຜ່ານບົດສະຫຼຸບການຝຶກອົບຮົມແລ້ວກໍໄດ້ມີການມອບໃບຢັ້ງຢືນການຝຶກອົບຮົມແກ່ນັກສຳມະນາກອນ ທັງໝົດ 40 ທ່ານ, ໂດຍໃຫ້ກຽດມອບໂດຍທ່ານ ບັນດິດ ສຈ. ບໍ່ວຽງຄຳ ວົງດາລາ.
ໃນຕອນທ້າຍ ທ່ານ ບັນດິດ ສຈ. ບໍ່ວຽງຄຳ ວົງດາລາ ຍັງໄດ້ໃຫ້ກຽດໂອ້ລົມຕໍ່ພິທີ ແລະ ທ່ານກໍໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈມາຍັງ ສະຖາບັນການເມືອງ-ການປົກຄອງແຫ່ງຊາດ ທີ່ໄດ້ເອົາໃຈໃສ່ໃນການຖ່າຍທອດຄວາມຮູ້ໃຫ້ແກ່ນັກສຳມະນາກອນ ແລະ ທ່ານ ຍັງໄດ້ເນັ້ນໃຫ້ບັນດານັກສຳມະນາກອນຈົ່ງນຳເອົາຄວາມຮູ້ຈາກການຝຶກອົບຮົມໃນຄັ້ງນີ້ໄປຈັດຕັ້ງຜັນຂະຫຍາຍເຂົ້າໃນໜ້າທີຄວາມຮັບຜິດຊອບຂອງຕົນເອງໃຫ້ເກີດດອກອອກຜົນ ແລະ ໄດ້ຮັບຜົນງານຍິ່ງໃຫຍ່ກວ່າເກົ່າ.

LEAVE A REPLY

Please enter your comment!
Please enter your name here