ພິທີຝຶກອົບຮົມ ການພັດທະນາພະນັກງານ-ລັດຖະກອນ ກ່ຽວກັບການ ຄຸ້ມຄອງວິທະຍາສາດ ແລະ ເຕັກໂນໂລຊີ

0
586

ໃນວັນທີ 01 ຕຸລາ 2018, ສະຖາບັນການຄຸ້ມຄອງ ວິທະຍາສາດ ແລະ ເຕັກໂນໂລຊີ, ກະຊວງວິທະຍາສາດ ແລະ ເຕັກໂນໂລຊີ ຈັດຊຸດຝຶກອົບຮົມ ການພັດທະນາພະນັກງານ-ລັດຖະກອນ ກ່ຽວກັບ ການຄຸ້ມຄອງວິທະຍາສາດ ແລະ ເຕັກໂນໂລຊີ ຂຶ້ນໃນລະຫວ່າງວັນທີ 01-05 ຕຸລາ 2018, ທີ່ຫ້ອງຝຶກອົບຮົມຂອງສະຖາບັນດັ່ງກ່າວ ໂດຍໃຫ້ກຽດເປັນປະທານກ່າວເປີດຂອງ ທ່ານ ບຸນຕີ ທະມິດ, ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ.
ຈຸດປະສົງຂອງການຝຶກອົບຮົມດັ່ງກ່າວແມ່ນເພື່ອຖ່າຍທອດຄວາມຮູ້ທາງດ້ານວິຊາການ ວຽກງານການຄຸ້ມຄອງວິທະຍາສາດ ແລະ ເຕັກໂນໂລຊີ ໃນການຊ່ວຍເພີ່ມພຸນຄູນສ້າງຄວາມຮູ້, ສ້າງທັກສະທາງດ້ານວິຊາການໃຫ້ໜັກແໜ້ນ ແລະ ທັງເປັນການແລກປ່ຽນບົດຮຽນຂໍ້ມູນຄວາມຮັບຮູ້ຄວາມເຂົ້າໃຈຂອງການປະຕິບັດໜ້າທີ່ວຽກງານ ທີ່ແຕ່ລະຄົນຮັບຜິດຊອບ, ຊຶ່ງເຫັນໄດ້ບົດບາດຄວາມສຳຄັນວຽກງານການຄຸ້ມຄອງກ່ຽວກັບກົນໄກການບໍລິຫານ ແລະ ຄຸ້ມຄອງ ວຽກງານວິທະຍາສາດ ແລະ ເຕັກໂນໂລຊີ, ໂດຍສະເພາະແມ່ນບົດຮຽນກ່ຽວກັບ ການເປັນພະນັກງານ-ລັດຖະກອນ; ການປົກຄອງ ແລະ ການບໍລິຫານລັດ; ພາວະການເປັນຜູ້ນຳ; ການບໍລິຫານ ແລະ ການຄຸ້ມຄອງວຽກງານວິທະຍາສາດ ແລະ ເຕັກໂນໂລຊີ; ທ່າແຮງບົ່ມຊ້ອນຂອງ ວິທະຍາສາດ ແລະ ເຕັກໂນໂລຊີ; ການຄຸ້ມຄອງ ແລະ ການສົ່ງເສີມ ການຄົ້ນຄວ້າວິທະຍາສາດ ແລະ ເຕັກໂນໂລຊີ; ຄວາມຮູ້ພື້ນຖານ ກ່ຽວກັບເຕັກໂນໂລຊີ ຂໍ້ມູນຂ່າວສານ (IT) ; ຄວາມຮູ້ດ້ານວຽກງານຊັບສິນທາງປັນຍາ; ວຽກງານມາດຕະຖານ ແລະ ການວັດແທກ ລວມທັງວຽກງານການຄຸ້ມຄອງວິທະຍາສາດ ແລະ ເຕັກໂນໂລຊີຢູ່ຂັ້ນທ້ອງຖິ່ນ.
ໂອກາດນີ້, ທ່ານ ບຸນຕີ ທະມິດ ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ກ່າວວ່າ: ການເປິດຊຸດຝຶກອົບຮົມ ການພັດທະນາພະນັກງານ-ລັດຖະກອນ ກ່ຽວກັບ ວຽກງານຄຸ້ມຄອງວິທະຍາສາດ ແລະ ເຕັກໂນໂລຊີ ໃນຄັ້ງນີ້ ແມ່ນມີຄວາມສຳຄັນຫຼາຍ ແລະ ຍັງເປັນອີກຫົວຂໍ້ຫນຶ່ງທີ່ມີຄວາມສົນໃຈ ສຳລັບພະນັກງານ-ລັດຖະກອນ, ຂະແໜງວິທະຍາສາດ ແລະ ເຕັກໂນໂລຊີ ຂອງພວກເຮົາ, ໃນການຝຶກອົບຮົມໃນເທື່ອນີ້ນັກສໍາມະນາກອນ ແລະ ວິທະຍາກອນ ຈະໄດ້ພົບປະແລກປ່ຽນບົດຮຽນທີ່ກ່ຽວຂ້ອງໃນວຽກງານການຄຸ້ມຄອງ-ບົດຮຽນການປະຕິບັດວຽກງານຕົວຈິງ, ດັ່ງນັ້ນການຈັດຝຶກອົບ ຮົມຊຸດນີ້ເປັນຄັ້ງທໍາອິດຂອງການຝຶກອົບຮົມວິຊາການ ທີ່ນຳໃຊ້ຫຼັກສູດຂອງບັນດາຫ້ອງການ, ກົມ ແລະ ສະຖາບັນທີ່ໄດ້ຄົ້ນຄວ້າ ແລະ ສ້າງຂຶ້ນມາ.
ການຈັດຝຶກອົບຮົມຄັ້ງນີ້, ແມ່ນມີຄວາມໝາຍຫຼາຍຊຶ່ງມັນເປັນບາດກ້າວລິເລີ່ມທີ່ສຳຄັນ ໃນການສ້າງຄວາມເຂັ້ມແຂງດ້ານການພັດທະນາບຸກຄະລາກອນ ຂອງຂະແໜງການພວກເຮົາຍັງເປັນສ່ວນປະກອບໜຶ່ງໃນການປະຕິບັດ ແລະ ການສືບຕໍ່ຈັດຕັ້ງຜັນຂະຫຍາຍແຜນພັດທະນາເສດຖະກິດ – ສັງຄົມ ແຫ່ງຊາດ ຄັ້ງທີ VIII, ຍັງເປັນການສົນທະນາທາງວິຊາການ ລະຫວ່າງ ນັກສໍາມະນາກອນ ແລະ ວິທະຍາກອນ ຕໍ່ກັບວຽກງານການຄຸ້ມຄອງວິທະຍາສາດ ແລະ ເຕັກໂນໂລຊີ ຂອງ ສປປ ລາວ, ພ້ອມໄດ້ເໜັ້ນໃຫ້ນັກສຳມະນາກອນ ໃຫ້ເອົາໃຈໃສ່ຢ່າງຕັ້ງໜ້າ ແລະ ຮັບຟັງ, ເກັບກຳເອົາຄວາມຮູ້, ບົດຮຽນຈາກວິທະຍາກອນຈາກການແລກປ່ຽນບົດຮຽນ ປະສົບການຈາກເພື່ອນມິດສຳມະນາກອນດ້ວຍຄວາມຮັບຜິດຊອບສູງເພື່ອຍາດແຍ່ງເອົາບົດຮຽນຄວາມຮູ້ປະສົບການນຳໄປຈັດຕັ້ງປະຕິບັດໃນກົມຂອງຕົນໃຫ້ໄດ້ຮັບຜົນດີ ແລະ ມີປະສິດທິຜົນເຂົ້າໃນໜ້າທີ່ວຽກງານຂອງທຸກຂະແໜງການ.
ເຂົ້າຮ່ວມການຝຶກອົບຮົມດັ່ງກ່າວມີ ນັກສຳມະນາກອນຈາກບັນດາ ຫ້ອງການ, ກົມ, ສະຖາບັນ ແລະ ບັນດາພະແນກວິທະຍາສາດ ແລະ ເຕັກໂນໂລຊີ 50 ກວ່າຄົນ.

LEAVE A REPLY

Please enter your comment!
Please enter your name here