ສຄອ ເຂົ້າຮ່ວມເຮັດວຽກຊ່ວຍ ໃນການນັບຄະແນນສຽງເລືອກຕັ້ງ ໃຫ້ແກ່ກອງປະຊຸມໃຫຍ່ຜູ້ແທນກຳມະບານລາວ ທົ່ວປະເທດ ຄັ້ງທີ VIII, ໃນວັນທີ 03-04 ທັນວາ 2020, ທີ່ຫ້ອງປະຊຸມໃຫຍ່ ຫ້ອງວ່າການສູນກາງພັກ

0
15

ຂໍ່ານັບຮັບຕ້ອນ “ກອງປະຊຸມໃຫຍ່ຜູ້ແທນກໍາມະບານລາວທົ່ວປະເທດ ຄັ້ງທີ VIII ໄດ້ໄຂຂຶ້ນຢ່າງເປັນທາງການ ໃນວັນທີ 03-04 ທັນວາ 2020, ຫ້ອງປະຊຸມໃຫຍ່ຫ້ອງວ່າການສູນກາງພັກ, ນະຄອນຫລວງວຽງຈັນ ພາຍໃຕ້ການເປັນຄະປະທານຂອງ ສະຫາຍ ປ້ານ ນ້ອຍມະນີ ກໍາມະການສູນກາງພັກ, ປະທານສູນກາງສະຫະພັນກໍາມະບານລາວ ໂດຍການໃຫ້ກຽດເຂົ້າຮ່ວມຂອງສະຫາຍ ແສງນວນ ໄຊຍະລາດ, ຄະນະເລຂາທິການສູນກາງພັກ, ຮອງປະທານສະພາແຫ່ງຊາດ, ພ້ອມດ້ວຍຜູ້ແທນສົມບູນ 400 ສະຫາຍທີ່ເປັນຕົວແທນໃຫ້ແກ່ສະມາຊິກກໍາມະບານ 227.718 ສະຫາຍ ໃນທົ່ວປະເທດ.”

(1). ກອງປະຊຸມຄັ້ງນີ້, ຈະໄດ້ສຸມໃສ່ຄົ້ນຄວ້າ ແລະ ຕົກລົງຫລາຍບັນຫາສໍາຄັນ ຄື:
1. ຈະໄດ້ພ້ອມກັນສັງເກດຕີລາຄາ ແລະ ຮັບຮອງເອົາຮ່າງບົດລາຍງານການເມືອງໃນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນກໍາມະບານລາວທົ່ວປະເທດ ຄັ້ງທີ VII ຕະຫລອດໄລຍະ 05 ປີ ຜ່ານມາ (2016-2020) ແລະ ທິດທາງແຜນການ 05 ປີຕໍ່ໜ້າ (2021-2025),
2. ພິຈະລານາ ແລະ ຮັບຮອງເອົາຮ່າງກົດລະບຽບສະຫະພັນກໍາມະບານລາວສະໄໝທີ VIII,
3. ພິຈາລະນາ ແລະ ຮັບຮອງເອົາຮ່າງບົດສໍາຫລວດການນໍາພາລວມຂອງຄະນະບໍລິຫານງານສູນກາງສະຫະພັນກໍາມະບານລາວ ສະໄໝທີ VII,
4. ພ້ອມນີ້ ຜູ້ແທນສົມບູນຈະໄດ້ພ້ອມກັນໃຊ້ສິດປະຊາທິປະໄຕຂອງຕົນເພື່ອປ່ອນບັດເລືອກຕັ້ງເອົາຄະນະບໍລິຫານງານສູນກາງສະຫະພັນກໍາມະບານລາວ ສະໄໝທີ VIII ເພື່ອຊີ້ນໍາ-ນໍາພາໃນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນກໍາມະບານລາວທົ່ວປະເທດສະໄໝທີ VIII,
5. ນອກຈາກນີ້ ກອງປະຊຸມ ຍັງຈະໄດ້ຮັບຟັງການໂອ້ລົມເພື່ອຊີ້ທິດເຍືອງທາງໃນການເຄື່ອນໄຫວວຽກງານຂອງສະຫະພັນກໍາມະບານລາວໃນຕໍ່ໜ້າ ຈາກ ສະຫາຍ ແສງນວນ ໄຊຍະລາດ, ຄະນະເລຂາທິການສູນກາງພັກ, ຮອງປະທານສະພາແຫ່ງຊາດ.

(2). ບົດລາຍງານການເມືອງຕໍ່ກອງປະຊຸມຄັ້ງນີ້ ສະຫາຍ ປ້ານນ້ອຍມະນີ ກໍາມະການສູນກາງພັກ, ປະທານສູນກາງສະຫະພັນກໍາມະບານລາວ ໄດ້:
1. ຍົກໃຫ້ເຫັນຜົນສໍາເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນກໍາມະບານລາວ ທົ່ວປະເທດ ຄັ້ງທີ VII ຕະຫລອດໄລຍະ 05 ປີ ຜ່ານມາ, ເຫັນວ່າມີຫລາຍວຽກງານໄດ້ຮັບຜົນສໍາເລັດເຮັດໃຫ້ ລະບົບການຈັດຕັ້ງຂອງສະຫະພັນກໍາມະບານແຕ່ສູນກາງຮອດຮາກຖານ ໄດ້ຮັບການປັບປຸງໃຫ້ມີຄວາມໜັກແໜ້ນເຂັ້ມແຂງ,
2. ຈໍານວນສະມາຊິກກໍາມະບານ ແລະ ຮາກຖານ ເພີ່ມຂຶ້ນຢ່າງຕໍ່ເນື່ອງ, ມາຮອດປັດຈຸບັນ ສະຫະພັນກໍາມະບານລາວ ມີ 39 ສະຫະພັນກໍາມະບານກະຊວງ ແລະ ອົງການ, ມີ 18 ສະຫະພັນກໍາມະບານແຂວງ ແລະ ນະຄອນຫລວງວຽງຈັນ, ມີ 03 ສະຫະພັນກໍາມະບານນະຄອນ, ມີ 145 ສະຫະພັນກໍາມະບານເມືອງ ແລະ ມີກໍາມະບານຮາກຖານ 5.259 ຮາກຖານ, ທຽບໃສ່ປີ 2015 ເພີ່ມຂຶ້ນ 1.462 ຮາກຖານ ເທົ່າກັບ 38,5%, ທົ່ວປະເທດ ມີສະມາຊິກກໍາມະບານທັງໝົດ 227.718 ສະຫາຍ, ຍິງ 103.696 ສະຫາຍ, ທຽບໃສ່ປີ 2015 ເພີ່ມຂຶ້ນ 43.404 ສະຫາຍ,
3. ສະຫະພັນກໍາມະບານແຕ່ລະຂັ້ນ ໄດ້ຊຸກຍູ້, ປະສານສົມທົບກັບພາກສ່ວນທີ່ກ່ຽວຂ້ອງໃນການບໍາລຸງ-ກໍ່ສ້າງ ແລະ ຍົກລະດັບພະນັກງານກໍາມະບານອາຊີບ ແລະ ສະມາຊິກກໍາມະບານດ້ວຍຫລາຍຮູບ ການ  ທັງໃນໄລຍະສັ້ນ ແລະ ໄລຍະຍາວ ແນໃສ່ກໍ່ສ້າງພະນັກງານກຳມະບານໃນແຕ່ ລະຂັ້ນໃຫ້ມີຄວາມຮູ້, ຄວາມສາມາດສູງຂຶ້ນ, ຮຽນຢູ່ພາຍໃນປະເທດ ລວມມີ 430 ຄົນ, ຍິງ 199 ຄົນ, ຮຽນຢູ່ຕ່າງປະເທດ 516 ຄົນ ເຮັດໃຫ້ການຈັດຕັ້ງ ແລະ ຖັນ ແຖວພະນັກງານກໍາມະບານມີການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ,
4. ສະຫະພັນກໍາມະບານແຕ່ລະຂັ້ນ ໄດ້ເອົາໃຈໃສ່ສະເໜີ ແລະ ຕິດຕາມການປະຕິບັດນະໂຍບາຍຕໍ່ພະນັກງານສະມາຊິກກໍາມະບານຕາມແນວທາງຂອງພັກ ແລະ ນະໂຍບາຍຂອງລັດ ແລະ ລະບຽບການຂອງສະຫະພັນກໍາມະບານລາວວາງອອກ ເປັນຕົ້ນ: ການເລື່ອນຕໍາແໜ່ງບໍລິຫານ, ເລື່ອນຊັ້ນ-ເລື່ອນຂັ້ນເງິນເດືອນ, ການບັນຈຸຊັບຊ້ອນຕໍາແໜ່ງານ ແລະ ອື່ນໆ,
5. ສໍາລັບວຽກງານປົກປ້ອງສິດ ແລະ ຜົນປະໂຫຍດອັນຊອບທໍາຂອງຜູ້ອອແຮງງານ ພົ້ນເດັ່ນກວ່າໝູ່ແມ່ນໄດ້ເປັນເຈົ້າການຄົ້ນຄ້ວາສະເໜີປັບປຸງຄ່າແຮງງານຂັ້ນຕໍ່າຂອງກໍາມະກອນຈາກ 900.000 ກີບ ຂຶ້ນເປັນ 1.100.000 ກີບ, ຕິດຕາມ ແລະ ຊຸກຍູ້ການປະຕິບັດ, ການສ້າງສັນຍາແຮງງານບຸກຄົນ ແລະ ລວມໝູ່, ເຂົ້າຮ່ວມປຶກສາຫາລືແກ້ ໄຂຂໍ້ຂັດແຍ່ງແຮງງານ, ທວງຄ່າແຮງງານໃຫ້ກໍາມະກອນ ແລະ  ເປີດນໍາໃຊ້ບໍລິການໂທລະສັບສາຍດ່ວນ 1512,
6. ວຽກງານຂະບວນການໄດ້ປັບປຸງເນື້ອໃນຂໍ້ແຂ່ງຂັນ 02 ດີ 05 ເປັນເຈົ້າມາເປັນຂໍ້ແຂ່ງຂັນ 05 ເປັນເຈົ້າ ເພື່ອໃຫ້ສະຫະພັນກໍາມະບານແຕ່ລະຂັ້ນໄດ້ເຊື່ອມຊຶມ ແລະ ຈັດຕັ້ງປະຕິ ບັດເນື້ອໃນຂໍ້ແຂ່ງຂັນນີ້ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ຂະບວນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ປະຕິບັດໜ້າທີ່ວິຊາສະເພາະເພື່ອແກ້ໄຂປະກົດ ການຫຍໍ້ທໍ້ໃນສັງຄົມ, ຂະບວນການແກ້ໄຂຄວາມທຸກຍາກທີ່ຄະນະພັກ ແລະ ອົງການປົກຄອງຂັ້ນຂອງຕົນວາງອອກໃນແຕ່ລະໄລຍະ,
7. ສະຫະພັນກໍາມະບານແຕ່ຂັ້ນ ໄດ້ຕັ້ງໜ້າຂະຫຍາຍກອງທຶນຊ່ວຍເຫລືອເຊີ່ງກັນ ແລະ ກັນ ຕາມກົດລະບຽບກອງທຶນຂອງແຕ່ລະສະຫະພັນກໍາມະບານວາງອອກ ເຮັດໃຫ້ປັດຈຸບັນ ທົ່ວປະເທດມີສະມາຊິກກອງທຶນ 151.500 ຄົນ ມີເງິນໝູນວຽນ 147 ຕື້ກວ່າກີບ,
8. ນອກຈາກນີ້, ສະຫາຍປະທານສູນກາງສະຫະພັນກໍາມະບານລາວ ຍັງໄດ້ຍົກໃຫ້ເຫັນຜົນສໍາເລັດພົ້ນເດັ່ນໃນອີກຫລາຍດ້ານ, ລວມເຖີງຈຸດອ່ອນ ແລະ ຂໍ້ຄົງຄ້າງ, ສາເຫດທີ່ພາໃຫ້ມີຜົນສໍາເລັດ ແລະ ຈຸດອ່ອນ-ຂໍ້ຄົງຄ້າງ, ລວມເຖີງ ທິດທາງແຜນ ການເຄື່ອນໄຫວວຽກງານໃນ 5 ປີຕໍ່ໜ້າ (2021-2025) ຂອງສູນກາງສະຫະພັນກໍາມະບານລາວຕື່ມອີກ.

(3). ນາງຈັນໂສດາ ພອນທິບ, ຫົວໜ້າຫ້ອງການກອງເລຂາຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ, ສູນກາງສະຫະພັນແມ່ຍິງລາວ ໄດ້ຂຶ້ນປະກອບຄໍາເຫັນໃນຫົວຂໍ້ “ການພັດທະນາ ແລະ ປົກປ້ອງແຮງງານເພດຍິງ”:
1. ໃນໄລຍະຜ່ານມາ ສູນກາງສະຫະພັນແມ່ຍິງລາວ ໃນຖານະເປັນອົງການຕົວແທນປົກປ້ອງສິດຜົນປະໂຫຍດອັນຊອບທຳຂອງແມ່ຍິງ ແລະ ເດັກນ້ອຍ ກໍ່ໄດ້ເອົາໃຈໃສ່ເຮັດສຳເລັດໜ້າທີ່ຂອງຕົນຄຽງບ່າຄຽງໄຫລ່ກັບອົງການຈັດຕັ້ງມະຫາຊົນອື່ນໆ,
2. ໂດຍສະເພາະ ອົງການຈັດຕັ້ງສະຫະພັນກຳມະບານລາວ ໃນການສຶກສາອົບຮົມ ແລະ ພັດທະນາແມ່ຍິງຕາມ 04 ດ້ານທີ່ໄດ້ກຳນົດໄວ້ໃນກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ (ພັດທະນາທາງດ້ານຈິດໃຈຮ່າງກາຍ, ການສຶກສາ, ວິຊາຊີບ ແລະ ສີມືແຮງງານ),
3. ຕິດພັນກັບການປະຕິບັດຂ້ໍແຂ່ງຂັນ 03 ດີຢ່າງເປັນຂະບວນຟົດຟື້ນ, ສະມາຊິກສະຫະພັນແມ່ຍິງ ແລະ ແມ່ຍິງຢູ່ຫລາຍຂົງເຂດ, ຫລາຍສາຂາອາຊີບໄດ້ຮັບການພັດທະນາຢ່າງຮອບດ້ານ ແລະມີລະດັບທີ່ສູງຂຶ້ນ, ສາມາດສ້າງຄວາມເຊື່ອໝັ້ນໃຫ້ແກ່ການຈັດຕັ້ງພັກ-ລັດ ແລະເປັນທີ່ຍອມຮັບຂອງສັງຄົມ,
4. ມາຮອດປະຈຸບັນ ແມ່ຍິງໄດ້ຮັບການບັນຈຸເຂົ້າໃນຕຳແໜ່ງພັກ-ລັດໃນແຕ່ລະຂັ້ນ ເປັນຕົ້ນ: ເປັນກໍາມະການກົມການເມືອງສູນກາງພັກ 01 ຄົນ, ກໍາມະການສູນກາງພັກ 07 ຄົນ, ກໍາມະການສໍາຮອງສູນກາງພັກ 03 ຄົນ, ລັດຖະມົນຕີ ແລະທຽບເທົ່າ, ເຈົ້າແຂວງ 09 ຄົນ, ຮອງລັດຖະມົນຕີ ແລະທຽບເທົ່າ, ຮອງເຈົ້າແຂວງ 17 ຄົນ, ເຈົ້າເມືອງ 04 ຄົນ, ສະມາຊິກສະພາແຫ່ງຊາດ 41 ຄົນ, ສະມາຊິກສະພາແຂວງ 116 ຄົນ ແລະປະທານສະພາແຂວງ 02 ຄົນ, ຄະນະປະຈໍາພັກເມືອງ 27 ຄົນ, ຮອງພະ ແນກ ແລະ ທຽບເທົ່າ 1.495 ຄົນ, ຮອງພະແນກອ້ອມຂ້າງແຂວງ 218 ຄົນ, ຄະນະປະຈໍາພັກເມືອງ105 ຄົນ, ນາຍບ້ານ 199 ຄົນ ແລະ ຮອງນາຍບ້ານ 2.656 ຄົນ,
5. ສູນກາງສະຫະພັນແມ່ຍິງລາວ ຍັງໄດ້ເປັນເຈົ້າການປົກປ້ອງສິດຜົນປະໂຫຍດອັນຊອບທຳຂອງຊົນຊັ້ນກຳມະກອນ ແລະ ຊາວຜູ້ອອກແຮງງານ ເວົ້າລວມ, ເວົ້າສະເພາະ ຖັນແຖວພະນັກງານ, ສະມາຊິກກຳມະບານ ແລະ ກຳມະກອນເພດຍິງ,
6. ໄດ້ສົມທົບກັບພາກສ່ວນທີ່ກ່ຽວຂ້ອງໃນການສຶກສາອົບຮົມຍົກລະດັບຄວາມຮູ້ກ່ຽວກັບລັດຖະທຳມະນູນ, ກົດໝາຍ ແລະ ເອົາໃຈໃສ່ໂຄສະນາເຜີຍແຜ່ບາງມາດຕາຂອງກົດໝາຍທີ່ພົວພັນເຖິງການພັດທະນາ ແລະປົກປ້ອງສິດຜົນປະໂຫຍດອັນຊອບທຳຂອງແມ່ຍິງ ແລະເດັກນ້ອຍຈຳນວນ 70 ຄັ້ງ, ມີຜູ້ເຂົ້າ ຮ່ວມ 9.886 ຄົນ, ຍິງ 4.492 ຄົນ,
7. ໃນໄລຍະ 05 ປີຜ່ານມາສູນກາງສະຫະພັນແມ່ຍິງລາວ ໄດ້ໃຫ້ຄຳປຶກສາ ແລະ ປົກປ້ອງແມ່ຍິງ-ເດັກນ້ອຍດ້ານກົດໝາຍ, ດ້ານສຸຂະພາບ ແລະດ້ານຈິດໃຈ ທີ່ບໍ່ເສຍຄ່າແບບເຊິ່ງໜ້າ ແລະ ໂທລະດັບສາຍດ່ວນ 1362 ທັງໝົດ 2.008 ຄົນ, ຍິງ 1.529 ຄົນ, ມີຈຳນວນ1.793 ເລື່ອງ ແລະ ອື່ນໆ.

 

LEAVE A REPLY

Please enter your comment!
Please enter your name here