ໜ່ວຍພັກ ສຄອ ຮັບສະມາຊິກພັກສົມບູນ

0
17
ໜ່ວຍພັກສະຖາບັນ ເຕັກໂນໂລຊີ ຄອມພີວເຕີ ແລະ ເອເລັກໂຕຼນິກ (ສຄອ), ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດພິທີເລື່ອນສະມາຊິກພັກສຳຮອງ ເປັນສະມາຊິກພັກສົມບູນ. ພິທີດັ່ງກ່າວໄດ້ຈັດຂຶ້ນໃນຂອງວັນທີ 27 ມັງກອນ 2021 ນີ້, ທີ່ຫ້ອງປະຊຸມຊັ້ນ 4 ຂອງ ກະຊວງວິທະຍາສາດ ແລະ ເຕັກໂນໂລຊີ (ກວຕ) ໂດຍໃຫ້ກຽດເປັນປະທານຂອງ ສະຫາຍ ຫຸມພັນ ອິນທະຣາດ, ຄະນະພັກກະຊວງ,  ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ.
ໃນພິທີຄັ້ງນີ້, ສະຫາຍ ວິລະສັກ ອິນທະປະຖາ, ເລຂາໜ່ວຍພັກ ສະຖາບັນ ເຕັກໂນໂລຊີ ຄອມພີວເຕີ ແລະ ເອເລັກໂຕຼນິກ ໄດ້ຂຶ້ນຜ່ານມະຕິຕົກລົງຂອງຄະນະພັກ ກວຕ ວ່າດ້ວຍການເລື່ອນສະມາຊິກພັກສໍາຮອງຂຶ້ນ ເປັນສະມາຊິກພັກສົມບູນ ຈຳນວນ 1 ສະຫາຍ.
ໃນໂອກາດນີ້, ສະຫາຍ ຫຸມພັນ ອິນທະຣາດ ໄດ້ໃຫ້ກຽດໂອ້ລົມ ແລະ ກ່າວສະແດງຄວາມຍ້ອງຍໍ ຊົມເຊີຍຕໍ່ໜ່ວຍພັກ ສະຖາບັນ ເຕັກໂນໂລຊີ ຄອມພີວເຕີ ແລະ ເອເລັກໂຕຼນິກ ທີ່ໄດ້ມີຄວາມເອົາໃຈໃສ່ກໍ່ສ້າງ ແລະ ຂະຫຍາຍສະມາຊິກພັກຂອງຕົນໃຫ້ມີຄວາມເຂັ້ມແຂງຂຶ້ນ ພ້ອມທັງຍ້ອງຍໍຊົມເຊີຍ ສະມາຊິກສົມບູນໃໝ່  ທີ່ໄດ້ມີຄວາມຫ້າວຫັນໃນການຈັດຕັ້ງປະຕິບັດໜ້າທີ່ວຽກງານ ແລະ ຜ່ານຜ່າບັນດາອຸປະສັກຕ່າງໆຈົນໄດ້ເຂົ້າເປັນສະມາຊິກພັກໃນຄັ້ງນີ້. ສະຫາຍ ໄດ້ຮຽກຮ້ອງໃຫ້ສະມາຊິກພັກສົມບູນຈົ່ງສືບຕໍ່ຕິດຕາມກໍ່ສ້າງ ແລະ ຊ່ວຍເຫຼືອສະມາຊິກພັກສໍາຮອງ ໃຫ້ກາຍເປັນສະມາຊິກພັກສົມບູນໃນຕໍ່ໜ້າ. ພ້ອມດຽວກັນນັ້ນ, ກໍໄດ້ເນັ້ນໜັກໃຫ້ສະມາຊິກພັກໃໝ່ ແລະ ສະມາຊິກພັກເກົ່າ ຈົ່ງສືບຕໍ່ຝຶກຝົນຫຼໍ່ຫຼອມຕົນເອງ ໃຫ້ກາຍເປັນສະມາຊິກພັກທີ່ປອດໃສ, ເຂັ້ມແຂງ, ໜັກແໜ້ນ, ເຊື່ອໝັ້ນຕໍ່ອຸດົມການຂອງພັກ, ຮັກສາມູນເຊື້ອຄຸນສົມບັດສິນທຳປະຕິວັດ ໂດຍຖືການຍົກສູງທາງດ້ານຄຸນທາດການເມືອງເປັນຫຼັກ, ຍົກສູງສະຕິຕໍ່ການຈັດຕັ້ງ, ຊື່ສັດ ແລະ ຈົງຮັກພັກດີຕໍ່ພັກ-ລັດ, ຕໍ່ປະເທດຊາດ ແລະ ຕໍ່ປະຊາຊົນ, ເອົາໃຈໃສ່ເພີ່ມທະວີຄວາມສາມັກຄີຮັກແພງເຊິ່ງກັນ ແລະ ກັນໃຫ້ເປັນປຶກແຜ່ນ ເພື່ອສືບຕໍ່ຈັດຕັ້ງປະຕິບັດວຽກງານທີ່ພັກ-ລັດ ມອບໝາຍໃຫ້ປະສົບຜົນສຳເລັດ.
ເຂົ້າຮ່ວມໃນພິທີຄັ້ງນີ້ ມີສະຫາຍເລຂາ, ຮອງເລຂາໜ່ວຍພັກ, ຜູ້ຕາງໜ້າໜ່ວຍພັກຫ້ອງການ, ກົມ, ສະຖາບັນ, ສາມອົງການຈັດຕັ້ງມະຫາຊົນ ພ້ອມດ້ວຍສະມາຊິກພັກຂອງໜ່ວຍພັກຫ້ອງການ.
  

LEAVE A REPLY

Please enter your comment!
Please enter your name here