ປຶກສາຫາລືກ່ຽວກັບ ການນຳໃຊ້ເຕັກໂນໂລຊີ ຖານຂໍ້ມູນໃຫຍ່ (Big Data) ເຂົ້າຊ່ວຍໃນການຄຸ້ມຄອງແຮງງານໃນ ສປປ ລາວ

0
21
ສະຖາບັນເຕັກໂນໂລຊີຄອມພິວເຕີ ແລະ ເອເລັກໂຕຼນິກ, ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດກອງປະຊຸມປຶກສາຫາລືກ່ຽວກັບ ການນຳໃຊ້ເຕັກໂນໂລຊີ ຖານຂໍ້ມູນໃຫຍ່ (Big Data) ເຂົ້າຊ່ວຍໃນການຄຸ້ມຄອງແຮງງານໃນ ສປປ ລາວ. ກອງປະຊຸມຄັ້ງນີ້ໄດ້ຈັດຂຶ້ນໃນຕອນເຊົ້າຂອງວັນທີ 17 ທັນວາ 2020 ນີ້, ທີ່ໂຮງແຮມຄລາວພາຊາ ໂດຍພາຍໃຕ້ການເປັນປະທານຂອງ ທ່ານ ວິລະສັກ ອິນທະປະຖາ, ຫົວໜ້າສະຖາບັນເຕັກໂນໂລຊີຄອມພິວເຕີ ແລະ ເອເລັກໂຕຼນິກ, ມີ ທ່ານ Jang kyung, ຮອງຫົວໜ້າຫ້ອງການ ອົງການສົ່ງເສີມການຄ້າ ແລະ ການລົງທຶນ ສ. ເກົາຫຼີ ປະຈຳ ສປປ ລາວ, ມີຜູ້ຕາງໜ້າຈາກພະແນກແຜນການ ແລະ ຮ່ວມມື, ກົມພັດທະນາສີມືແຮງງານ ແລະ ຈັດຫາງານ, ກະຊວງແຮງງານ ແລະ ສະຫວັດດີການສັງຄົມ, ຜູ້ຕາງໜ້າຈາກພະແນກແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ ແລະ ພະແນກວິທະຍາສາດ ແລະ ເຕັກໂນໂລຊີ ນະຄອນຫຼວງວຽງຈັນ ພ້ອມດ້ວຍພະນັກງານວິຊາການທີ່ກ່ຽວຂ້ອງ ເຂົ້າຮ່ວມ 20 ກວ່າທ່ານ.
ໃນກອງປະຊຸມຄັ້ງນີ້, ທ່ານ ພອນປະເສີດ ສຸລິນທອນ, ຫົວໜ້າສູນບໍລິການວິຊາການ, ສະຖາບັນເຕັກໂນໂລຊີຄອມພິວເຕີ ແລະ ເອເລັກໂຕຼນິກ ໄດ້ນຳສະເໜີກ່ຽວກັບຈຸດປະສົງຂອງໂຄງການດັ່ງກ່າວ ຄື: ເພື່ອດໍາເນີນການສຶກສາຄວາມເປັນໄປໄດ້ໃນການຄົ້ນຄວ້າ ແລະ ພັດທະນາການເຕັກໂນໂລຊີ ຖານຂໍ້ມູນໃຫຍ່ (Big Data) ເພື່ອສົ່ງເສີມ ແລະ ພັດທະນາການຄຸ້ມຄອງແຮງງານໃນ ສປປ ລາວ, ນໍາຂໍ້ສະເໜີຕ່າງໆຈາກຜົນຂອງການສຶກສາຄວາມເປັນໄປໄດ້ ລາຍງານໃຫ້ແກ່ ກະຊວງວິທະຍາສາດ ແລະ ເຕັກໂນໂລຊີ ເພື່ອສົ່ງເສີມການນຳໃຊ້ເຕັກໂນໂລຊີ ທີ່ເໝາະສົມເຂົ້າໃນການພັດທະນາເສດຖະກິດ-ສັງຄົມ ໃນ ສປປ ລາວ ແລະ ສືບຕໍ່ສ້າງລະບົບການຄຸ້ມຄອງ Big Data ເຂົ້າໃນການຄຸ້ມຄອງແຮງງານຢູ່ໃນ ສປປລາວ ແລະ ແຮງງານລາວທີ່ໄປເຮັດວຽກຢູ່ຕ່າງປະເທດ.
ຜົນປະໂຫຍດຂອງລະບົບດັ່ງກ່າວ ທາງພາກລັດ ແມ່ນຈະຊ່ວຍໃນວຽກງານປ້ອງກັນຊາດປ້ອງກັນຄວາມສະຫງົບ ໃນການຕິດຕາມຄົນຕ່າງປະເທດ, ສົ່ງເສີມ ແລະ ຈັດຫາຕະຫຼາດແຮງງານ, ພາກລັດຈະໄດ້ມີຖານຂໍ້ມູນທີ່ຊັດເຈນເຊື່ອຖືໄດ້, ເປັນບ່ອນບໍລິການໃຫ້ແກ່ປະຊາຊົນໄດ້ເຂົ້າເຖິງ, ສ້າງຄວາມໂປ່ງໃສ່ໃນການເກັບລາຍຮັບ, ຫັນການເກັບລາຍຮັບໃຫ້ການເປັນແບບທັນສະໄໝ, ຊ່ວຍໃນການບໍລິຫານງານຂອງໜ່ວຍງານລັດຖະບານໄດ້ເຮັດວຽກສະດວກສະບາຍ, ພະນັກງານການນຳຂອງຂະແໜງການສາມາດຮູ້ເກັບກຳສະຖິຕິຕ່າງໆໄດ້ຢ່າງມີວິທະຍາສາດ ແລະ ສໍາລັບປະຊາຊົນ ແມ່ນຈະສາມາດຊ່ວຍໃນການຮ້ອງຮຽນແບບວ່ອງໄວ, ເຂົ້າເຖິງຂໍ້ມູນຊຸມຊົນໄດ້ສະດວກສະບາຍ, ເຂົ້າເຖິງການບໍລິການພາກລັດໄດ້ສະດວກສະບາຍ, ເພີ່ມການປ້ອງກັນພາຍໃນຊຸມຊົນໃຫ້ເຂັ້ມແຂງຂຶ້ນ ແລະ ສາມາດເຫັນໄດ້ເຖິງຄວາມຕ້ອງການດ້ານຕະຫຼາດແຮງງານ.

LEAVE A REPLY

Please enter your comment!
Please enter your name here