ພິທີເປິດ ແລະ ມອບ-ຮັບ ສູນຝຶກອົບຮົມພະນັກ ງານຄຸ້ມຄອງວິທະຍາສາດ ແລະ ເຕັກໂນໂລຊີ ແຫ່ງ ສປປ ລາວ

0
1399

ໂດຍເຫັນໄດ້ເຖິງຄວາມສໍາຄັນ ຕໍ່ກັບວຽກງານການ ກໍ່ສ້າງຊັບພະຍາກອນມະນຸດ ໃນຂົງເຂດວິທະຍາສາດ ແລະ ເຕັກໂນໂລຊີ ຢູ່ກອງປະຊຸມ ຄັ້ງທີ 35 ຂອງຄະນະກໍາມະການຮ່ວມມື ລະຫວ່າງ ລັດຖະບານ ລາວ-ຫວຽດນາມ ທີ່ຈັດຂຶ້ນໃນເດືອນ ທັນວາ 2012 ທີ່ ສສ ຫວຽດນາມ, ສອງຝ່າຍໄດ້ເຫັນດີເປັນເອກະພາບ ສະເໜີໂຄງການກໍ່ສ້າງ “ສູນຝຶກອົບຮົມພະນັກງານຄຸ້ມຄອງວິທະຍາສາດ ແລະ ເຕັກໂນໂລຊີ” ເຂົ້າໃນແຜນການຮ່ວມມືໂດຍນຳໃຊ້ທຶນ ຊ່ວຍເຫຼືອລ້າຂອງລັດຖະບານ ສສ ຫວຽດນາມ ໃຫ້ແກ່ລັດຖະບານ ສປປ ລາວ. ສອງ ກະຊວງວິທະຍາສາດ ແລະ ເຕັກໂນໂລຊີ ລາວ-ຫວຽດນາມ ໄດ້ປະສານສົມທົບ ແລະ ປຶກສາຫາລືຮ່ວມກັນຂຽນໂຄງການ ເບື້ອງຕົ້ນເພື່ອ ນໍາສະເໜີໃຫ້ແກ່ລັດຖະບານທັງສອງປະເທດພິຈາລະນາ. ພາຍຫຼັງກອງປະຊຸມຄັ້ງທີ36 ຂອງຄະນະກໍາມະການ ລະຫວ່າງ ລັດຖະບານ ລາວ-ຫວຽດນາມ ທີ່ຈັດຂຶ້ນຢູ່ສປປລາວໃນເດືອນ ທັນວາ ປີ 2014 ໄດ້ມີຄຳເຫັນຈາກ ບາງພາກສ່ວນກ່ຽວຂ້ອງຂອງ ຫວຽດນາມ ໃຫ້ສຶກສາຂໍ້ມູນຂອງໂຄງການຄືນໃໝ່ ເພື່ອຕອບສະໜອງຄວາມ ຮຽກຮ້ອງຕົວຈິງຂອງ ສປປ ລາວ. ສະນັ້ນ, ສອງ ກະຊວງວິທະຍາສາດ ແລະ ເຕັກໂນໂລຊີ ລາວ-ຫວຽດນາມ ກໍໄດ້ເກັບກໍາຂໍ້ມູນຄືນແລະໄດ້ຫຼຸດມູນຄ່າຂອງໂຄງການລົງ. ມາເຖິງກອງປະຊຸມຄັ້ງທີ37 ຂອງຄະນະກໍາມະການ ຮ່ວມມື ລະຫວ່າງ ລັດຖະບານ ລາວ-ຫວຽດນາມ ທີ່ໄດ້ຈັດຂຶ້ນໃນເດືອນ ມັງກອນ ປີ 2015, ສອງ ກະຊວງວິທະຍາ ສາດ ແລະ ເຕັກໂນໂລຊີ ລາວ-ຫວຽດນາມ ກໍໄດ້ ມີຄວາມເປັນເອກະພາບສະເໜີໂຄງການດັ່ງກ່າວ ຄືນໃໝ່ ໂດຍໄດ້ຮັບການເຫັນດີຈາກບັນດາພາກສ່ວນກ່ຽວຂ້ອງ ຂອງຝ່າຍຫວຽດນາມ ແລະ ໄດ້ສົ່ງບົດສະເໜີໂຄງການ ດັ່່ງກ່າວ ໃຫ້ແກ່ລັຖະບານ ສປປ ລາວ. ຫຼັງຈາກນັ້ນ, ກະຊວງວິທະຍາສາດ ແລະ ເຕັກໂນໂລຊີ ສປປ ລາວ ກໍໄດ້ປະສານສົມທົບກັບຄະນະກໍາມາທິການຮ່ວມມື ລາວ-ຫວຽດນາມ, ກະຊວງແຜນການ ແລະ ການລົງທຶນ ເພື່ອສະເໜີຂໍອະນຸມັດໂຄງການດັ່ງກ່າວ ກັບລັດຖະບານ ສປປ ລາວ. ມາຮອດວັນທີ 01 ມິຖຸນາ 2015, ຄະນະກໍາມາທິການຮ່ວມມື ລາວ-ຫວຽດນາມ ກໍໄດ້ອອກ ຂໍ້ຕົກລົງສະບັບເລກທີ 044/ຄຮມລ-ວ ວ່າດ້ວຍການຮັບຮອງເອົາໂຄງການກໍ່ສ້າງ “ສູນຝຶກອົບຮົມພະນັກງານຄຸ້ມຄອງວຕ” ຂອງ ສປປ ລາວ ແລະ ເລີ່ມລົງມືໂຄງການ ກໍ່ສ້າງ “ສູນຝຶກອົບຮົມພະນັກງານຄຸ້ມຄອງວິທະຍາສາດ ແລະ ເຕັກໂນໂລຊີ ໃນເດືອນ ກັນຍາ 2015 ຈົນເຖີງປີ 2017, ເປັນໄລຍະເວລາ 03 ປີຈຶ່ງສຳເລັດໂຄງການດັ່ງກ່າວ.

ດັ່ງນັ້ນ, ໃນວັນທີ 04 ກຸມພາ 2018 ກະຊວງວິທະຍາສາດ ແລະ ເຕັກໂນໂລຊີ (ກວຕ), ສປປ ລາວ ຮ່ວມກັບ ກະຊວງວິທະຍາສາດ ແລະ ເຕັກໂນໂລຊີ, ສສ ຫວຽດນາມ ໄດ້ຈັດພິທີເປີດ ແລະ ເຊັນບົດບັນທຶກມອບ-ຮັບ ໂຄງການກໍ່ສ້າງ “ສູນຝຶກອົບຮົມພະນັກງານຄຸ້ມຄອງວິທະຍາສາດ ແລະ ເຕັກໂນໂລຊີຂອງລາວ” ຂຶ້ນ ຢູ່ທີ່ຫຼັກ 14, ບ້ານດອນຕິ້ວ, ເມືອງໄຊທານີ, ນະຄອນຫຼວງວຽງຈັນ.

ທ່ານ ຈູ ຫງອກ ແອັງ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ສສ ຫວຽດນາມ ເປັນຜູ້ມອບສູນດັ່ງ ກ່າວ ໃຫ້ແກ່ລັດຖະບານ ລາວ ແລະ ທ່ານ ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີ ກະຊວງວິທະ ຍາສາດ ແລະ ເຕັກໂນໂລຊີ (ກວຕ), ສປປ ລາວ ເປັນຜູ້ຮັບສູນດັ່ງກ່າວ ຈາກລັດຖະບານ ຫວຽດນາມ ໂດຍພາຍໃຕ້ ການໃຫ້ກຽດເຂົ້າຮ່ວມເປັນສັກຄີພິຍານ ຂອງ ທ່ານ ຫງ້ຽວນ ຊັວນ ຟຸກ, ກໍາມະການກົມການເມືອງສູນກາງ ພັກຄອມມູນິດ ຫວຽດນາມ, ນາຍົກ ລັດຖະມົນຕີ ແຫ່ງ ສາທາລະນະລັດ ສັງຄົມນິຍົມ ຫວຽດນາມ; ທ່ານ ທອງລຸນ ສີສຸລິດ, ກໍາມະການກົມການເມືອງສູນກາງພັກປະຊາຊົນປະຕິວັດລາວ, ນາຍົກລັດຖະ ມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວພ້ອມດ້ວຍບັນດາທ່ານລັດຖະມົນຕີ, ຮອງລັດຖະມົນຕີ, ບັນດາແຂກ ແລະ ອ້າຍນ້ອງພະນັກງານທັງສອງຝ່າຍ ຫວຽດນາມ-ລາວ.

ພາຍຫຼັງພິທີເປີດ ແລະ ເຊັນບົດບັນທຶກ ມອບ-ຮັບ ໂຄງການກໍ່ສ້າງສູນດັ່ງກ່າວ, ສູນແຫ່ງນີ້ ຈະເຮັດໜ້າທີ່ຝຶກ ອົບຮົມບຸກຄະລາກອນວິທະຍາສາດ ແລະ ເຕັກໂນໂລຊີ ທີ່ຄຸນນະພາບ ແລະ ສ້າງຖັນແຖວພະນັກງານ ຄຸ້ມຄອງວິທະຍາສາດ ແລະ ເຕັກໂນໂລຊີ ໃຫ້ມີຄວາມສາມາດ. ສິ່ງດັ່ງກ່າວນັ້ນເປັນຄວາມຮຽກຮ້ອງພາວະວິໄສ ໃນປັດຈຸບັນ ເພື່ອຜັນຂະຫຍາຍການປະຕິບັດໜ້າທີ່ ແລະ ເປົ້າໝາຍໃນການພັດທະນາຂອງ ກວຕ ທີ່ພັກ ແລະ ລັດຖະບານແຫ່ງ ສປປ ລາວ ໄດ້ວາງອອກ.

ທ່ານ ຈູ ຫງອກ ແອັງ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ສສ ຫວຽດນາມ ໄດ້ກ່າວຢຸ່ພິທີເປີດ ແລະ ມອບ-ຮັບ ສູນຄັ້ງນີ້ຊຶ່ງມີຄຳເຫັນບາງ ຕອນວ່າ: ທີ່ກອງປະຊຸມຄະນະກຳມາທິການຮ່ວມມື ຄັ້ງທີ 35 ກຽ່ວກັບການຮ່ວມມືທາງດ້ານເສດຖະກິດ, ວັດທະນະທຳ, ການສຶກສາ, ວິທະຍາສາດ ເຕັກນິກ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ສັງຄົມນິຍົມຫວຽດນາມ ໃນວັນທີ 19 ທັນວາ 2012 ທີ່ ແຂວງ ວິ້ງຟຸກ, ສສ ຫວຽດນາມ, ກະຊວງວິທະຍາສາດ ແລະ ເຕັກໂນໂລຊີ, ສສ ຫວຽດນາມ ຖືກມອບຫມາຍຈາກນາຍຍົກລັດຖະມົນຕີ ຈັດຕັ້ງຜັນຂະຫຍາຍ ໂຄງການກໍ່ສ້າງ “ສູນຝຶກອົບຮົມພະນັກງານ ຄຸ້ມຄອງວິທະຍາສາດ ແລະ ເຕັກໂນໂລຊີ” ຂອງສປປ ລາວ ຈາກແຫຼ່ງທຶນ ຊ່ວຍເຫຼືອຫຼ້າ ຂອງລັດຖະບານ ສສ ຫວຽດນາມ ໃຫ້ແກ່ລັດຖະບານລາວ.

ທັງສອງ ກະຊວງ ຮັບຮູ້ໄດ້ເຖິງຄວາມສຳຄັນຕໍ່ໜ້າທີ່ ທີ່ຖືກມອບໝາຍໃນໄລຍະຜ່ານມາ, ກວຕ ຫວຽດນາມ ແລະ ກວຕ ລາວ ໄດ້ປະສານສົມທົບຢ່າງໃກ້ຊິດ ໃນການຈັດຕັ້ງປະຕິບັດໂຄງການດັ່ງກ່າວ. ໂຄງການໄດ້ຮັບການລົງມືກໍສ້າງ ໃນເດືອນ ກັນຍາ 2015 ແລະ ສຳເລັດໃນເດືອນ ທັນວາ 2017 ຕາມແຜນການ ແລະ ຮັບປະ ກັນທາງດ້ານຄຸນນະພາບຕາມການກຳນົດໄວ້. ໂຄງການມີມູນຄ່າທັງໝົດ 98 ກວ່າຕື້ດົ່ງ, ໃນນີ້ງົບປະມານຊ່ວຍເຫຼືອຫຼ້າຂອງລັດຖະບານ ຫວຽດນາມ ແມ່ນ: 89 ກວ່າຕື້ ດົ່ງ, ງົບປະມານສົມທົບ ຂອງລັດຖະບານລາວ ແມ່ນເກືອບ 9 ຕື້ດົ່ງ.

ສູນແຫ່ງນີ້ ຈະຮັບປະກັນທາງດ້ານໂຄງລ່າງຮັບໃຊ້ວຽກງານຄົ້ນຄວ້າວິທະຍາສາດ, ການສິດສອນພະນັກງານຄຸ້ມຄອງວິທະຍາສາດ ແລະ ເຕັກໂນໂລຊີຂອງລາວ, ສາມາດຮອງຮັບໄດ້ປະມານ 600-800 ເທື່ອຄົນຕໍ່ປີ. ສູນ ປະກອບດ້ວຍສະຖານທີ່ເຮັດວຽກ ໃຫ້ແກ່ພະນັກງານ, ຄູອາຈານ ແລະ ນັກຄົ້ນຄວ້າ ໄດ້ປະມານ 70 ຄົນ.

ໃນໄລຍະແຕ່ປີ 2012-2017, ພະນັກງານລາວໄດ້ໄປຍົກລະດັບໄລຍະສັ້ນ ແລະ ໄລຍະຍາວ ຢູ່ ຫວຽດນາມ ລວມມີ 308 ເທື່ອຄົນ.ໂຕເລກດັ່ງກ່າວຍັງແມ່ນໂຕ ເລກທີ່ຖ່ອມໂຕ ເມື່ອທຽບກັບຄວາມຮຽກຮ້ອງຕ້ອງການ ແລະ ທິດທາງການພັດທະນາຖັນແຖວພະນັກງານວິທະຍາສາດ ແລະ ເຕັກໂນໂລຊີ ຂອງ ສປປ ລາວໃນປັດຈຸບັນ. ສະນັ້ນ, “ສູນຝຶກອົບຮົມພະນັກດງານຄຸ້ມຄອງວິທະຍາສາດ ແລະ ເຕັກໂນໂລຊີ“ ເມື່ອໄດ້ຖືກນຳໃຊ້ ຈະກາຍເປັນພື້ນຖານໃຫ້ແກ່ການຄັົ້ນຄວ້າວິທະຍາສາດ ແລະ ຝຶກອົບຮົມພະນັກງານ ທີ່ມີລະດັບມະຫາວິທະຍາໄລ, ເໜືອມະຫາວິທະຍາໄລ ລົງເລີກຂະແໜງການ ກຽ່ວກັບການຄຸ້ມຄອງວິທະຍາສາດ ທີ່ສຳຄັນ, ຕອບສະໜອງໜ້າທີ່ ແລະ ຈຸດມຸ້ງໝາຍ ໃນການພັດທະນາຂອງ ກະຊວງວິທະຍາສາດ ແລະ ເຕັກໂນໂລຊີ ທີ່ພັກ ແລະ ລັດຖະບານ ມອບໝາຍໃຫ້ປະກອບສ່ວນໃນການນຳເອົາວິທະຍາສາດ ແລະ ເຕັກໂນໂລຊີ ເປັນກຳລັງແຮງຂັບເຄື່ອນການພັດທະນາເສດຖະກິດ-ສັງຄົມ ຂອງ ສປປ ລາວ ກ້າວຂຶ້ນເທື່ອລະຂັ້ນ.

ໂອກາດດຽວກັນນີ້, ທ່ານ ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ໄດ້ມີຄຳເຫັນບາງຕອນຕໍ່ພິທີ ດັ່ງກ່າວວ່າ: ເລີ່ມແຕ່ການສ້າງຕັ້ງ ກະຊວງວິທະຍາສາດ ແລະ ເຕັກໂນໂລຊີ ຂອງ ສປປ ລາວ ໃນປີ 2011 ເປັນຕົ້ນມາ, ການພົວພັນຮ່ວມມືຮອບດ້ານລະຫວ່າງ ສອງ ກະຊວງວິທະຍາສາດ ແລະ ເຕັກໂນໂລຊີ ຂອງ ສປປ ລາວ ແລະ ສສ ຫວຽດນາມ ໄດ້ຮັບການປັບປຸງ ແລະ ຍົກລະດັບສູງຂຶ້ນກວ່າເກົ່າ. ຄະນະພັກ-ຄະນະນໍາ ຕະຫລອດ ເຖິງພະນັກງານລັດຖະກອນ ໃນທົ່ວຂະແໜງວິທະຍາສາດ ແລະ ເຕັກໂນໂລຊີ ຂອງ ສອງ ປະເທດ ໄດ້ເຊື່ອມຊຶມ ຜັນຂະຫຍາຍມູນເຊື້ອສາມັກຄີພິເສດ ຂອງສອງຊາດ ລາວ-ຫວຽດນາມ ຊຶ່ງປະທານໂຮ່ຈີ່ມິງ ຜູ້ຍິ່ງໃຫ່ຍ ແລະ ປະທານໄກສອນ ພົມວິຫານ ທີ່ເຄົາລົບຮັກ ໄດ້ກໍ່ຕັ້ງ ແລະ ໄດ້ຮັບການຖະນຸຖະໜອມ ຈາກບັນດາການນໍາແຕ່ ລະຮຸ່ນ ແລະ ປະຊາຊົນຂອງ ສອງ ປະເທດໄດ້ເພີ່ມພູນຄູນສ້າງມານັ້ນ ເຮັດໃຫ້ ສອງ ກະຊວງພວກເຮົາມີການພົວພັນຢ່າງໃກ້ຊິດ ສະໜິດແໜ້ນເໝືອນດັ່ງອ້າຍນ້ອງ ໃນຄອບຄົວດຽວກັນ. ໂດຍຄໍານຶງເຫັນວ່າຂະແໜງການວິທະຍາສາດ ແລະ ເຕັກໂນໂລຊີ ຂອງ ລາວ ຍັງໜຸ່ມນ້ອຍ, ພະນັກງານຍັງຂາດເຂີນທາງດ້ານປະລິມານ ແລະ ຄຸນນະພາບ, ພື້ນຖານໂຄງລ່າງທາງດ້ານວັດຖຸເຕັກນິກ ຍັງຈໍາກັດ, ສະນັ້ນ ເພື່ອນສະຫາຍຫວຽດນາມ ໄດ້ເອົາໃຈໃສ່ຢ່າງຈົດຈໍ່ ຊ່ວຍເຫລືອຂະແໜງການວິທະຍາສາດ ແລະ ເຕັກໂນໂລຊີ ຂອງ ລາວ ຢ່າງຕັ້ງໜ້າ ແລະ ຈິງໃຈ ຕາມຄໍາສອນ ຂອງປະທານໂຮ່ຈິມິງ ຜູ້ຍິ່ງໃຫຍ່ ວ່າ “ຊ່ວຍເພື່ອນ ຄືຊ່ວຍຕົນເອງ”. ໃນໄລຍະຜ່ານມາ, ກະຊວງວິທະຍາ ສາດ ແລະ ເຕັກໂນໂລຊີ ແຫ່ງ ສສ ຫວຽດນາມ ໄດ້ຊ່ວຍເຫລືອກໍ່ສ້າງພະນັກງານ, ຊ່ວຍເຫລືອຮ່ວມມືໃນບັນດາໂຄງການຄົ້ນຄວ້າວິທະຍາສາດ, ຖ່າຍທອດເຕັກໂນໂລຊີ, ປະກອບເຄື່ອງມືອຸປະກອນການທົດລອງ ໃຫ້ແກ່ຂະແໜງການວິທະຍາສາດ ແລະ ເຕັກໂນໂລຊີ ນັບທັງຢູ່ສູນກາງ ແລະ ທ້ອງຖິ່ນ ເຊັ່ນ: ໂຄງການກໍ່ສ້າງຫ້ອງທົດລອງ ຢູ່ສະຖາບັນນິເວດວິທະຍາ ແລະ ເຕັກໂນໂລຊີ ຊີວະພາບ, ສະຖາບັນພະລັງງານທົດແທນ ແລະ ວັດສະດຸໃໝ່, ກົມມາດຕະຖານ ແລະ ວັດແທກ, ຫ້ອງວິໄຈດິນ ແລະ ໂຮງງານຜະລິດຝຸ່ນຊີວະພາບ ຢູ່ແຂວງໄຊຍະບູລີ, ໂຄງການຜະລິດເຊື້ອເຫັດຢູ່ແຂວງສະຫວັນ ນະເຂດ, ໂຄງການຊ່ວຍເຫລືອດ້ານ ໄອທີ ຢູ່ແຂວງສາລະວັນ ແລະ ອື່ນໆອີກ ຫລາຍໂຄງການ. ອັນພົ້ນເດັ່ນກ່ວາໝູ່ ແມ່ນມື້ນີ້ພວກເຮົາໄດ້ມອບ-ຮັບສູນຝຶກອົບຮົມພະນັກງານຄຸ້ມ ຄອງວິທະຍາສາດ ແລະ ເຕັກໂນໂລຊີ ຊຶ່ງພວກຂ້າພະເຈົ້າຖືວ່າເປັນ ໂຄງການຮ່ວມມືຍຸດທະສາດ ອັນສໍາຄັນຂອງ ສອງ ຂະແໜງການ ວິທະຍາສາດ ຂອງ ສອງ ປະເທດໃນການພັດທະນາຊັບພະຍາກອນມະນຸດ ທາງດ້ານວິທະຍາສາດ ແລະ ເຕັກໂນໂລຊີ ໃຫ້ແກ່ ສປປ ລາວ ຕາມຄໍາສອນອະມະຕະ ຂອງປະທານໂຮ່ຈິມິງ ຜູ້ຍິ່ງໃຫຍ່ ທີ່ກ່າວວ່າ “ເພື່ອປະໂຫຍດ 10 ປີຈະຕ້ອງປູກຕົ້ນໄມ້, ເພື່ອປະໂຫຍດ 100 ປີຈະຕ້ອງສ້າງຄົນ”.

 

LEAVE A REPLY

Please enter your comment!
Please enter your name here