ສຳມະນາວິທະຍາສາດ, ເຕັກໂນໂລຊີ ແລະ ນະວັດຕະກຳ ໃນຍຸກອຸດສາຫະກຳ 4.0

0
12

ກະຊວງວິທະຍາສາດ ແລະ ເຕັກໂນໂລຊີ (ກວຕ) ຈັດກອງປະຊຸມສໍາມະນາວິທະຍາສາດ, ເຕັກໂນໂລຊີ ແລະ ນະວັດຕະກຳໃນຍຸກອຸດສາຫະກຳ 4.0 ຈຸດປະສົງກໍ່ເພື່ອເຜີຍແຜ່ນະໂຍບາຍ ແລະ ແຜນພັດທະນາວຽກງານວິທະຍາສາດໃຫ້ສັງຄົມຮັບຮູ້ຢ່າງກວ້າງຂວາງ ຫວັງກະຕຸ້ນໃຫ້ການຊົມໃຊ້ເຕັກໂນໂລຊີທັນສະໄໝເຂົ້າໃນທຸກຂົງເຂດວຽກງານ ໂດຍສະເພາະແມ່ນການຜະລິດທີ່ລາວເຮົາມີທ່າແຮງ​ເປັນຕົ້ນແມ່ນດ້ານກະສິກຳ ອັນເປັນພື້ນຖານສົ່ງອອກ ຈະເຮັດໃຫ້ປະຢັດເວລາ, ຫຼຸດຜ່ອນຕົ້ນທຶນ ແລະ ບໍ່ຈໍາເປັນໃຊ້ແຮງງານຄົນ.
ໂອກາດນີ້,​ຜູ້ເຂົ້າຮ່ວມສຳມະນາໄດ້ຮັບຟັງການນຳສະເໜີກ່ຽວກັບພາລະບົດບາດ ແລະ​ຄວາມສຳຄັນວຽກງານເຕັກໂນໂລຊີ ແລະ ນະວັດຕະກຳໃນຍຸກ 4.0, ຄວາມສຳຄັນຂອງວຽກງານມາດຕະຖານ, ວຽກງານການຢັ້ງຢືນ ແລະ ກວດສອບຄຸນນະພາບຜະລິດຕະພັນ-ສິນຄ້າ, ການອຳນວຍຄວາມສະດວກທາງດ້ານການຄ້າກ່ຽວຂ້ອງກັບເສດຖະກິດ-ສັງຄົມຍຸກ 4.0, ການຄຸ້ມຄອງ, ພັດທະນາ ແລະ ການນຳໃຊ້ສູນຂໍ້ມູນດິຈິຕ໋ອນ ເພື່ອການພັດທະນາເສດຖະກິດ-ສັງຄົມ, ການນຳໃຊ້ຂໍ້ມູນສັງເກດພາກພື້ນດິນ, ບົດບາດວຽກງານຊັບສິນທາງປັນຍາໃນຍຸກ 4.0, ການຄົ້ນຄວ້າພັດທະນາ ແລະ ນຳໃຊ້ພະລັງງານທົດແທນ ແລະ ວັດສະດຸໃໝ່, ການຄົ້ນຄວ້າ ແລະ ພັດທະນາ ປັນຍາປະດິດ ເພື່ອການພັດທະນາເສດຖະກິດ-ສັງຄົມ ຢູ່ ສປປ ລາວ.
ໃນກອງປະຊຸມດັ່ງກ່າວນີ້, ທ່ານ ປອ. ຈັນແສງ ພິມມະວົງ, ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ກ່າວບາງຕອນສໍາຄັນວ່າ: ການປະຕິວັດອຸດສາຫະກຳຍຸກ 4.0 ຈະສົ່ງຜົນເຮັດໃຫ້ການຜະລິດມີຄວາມວ່ອງໄວຍິ່ງຂຶ້ນກາຍເປັນເສດຖະກິດພູມປັນຍາ ເຮັດໃຫ້ຜູ້ຊົມໃຊ້ໄດ້ຮັບຄວາມສະດວກສະບາຍ, ສາມາດເຂົ້າເຖິງຜູ້ຊົມໃຊ້ໂດຍກົງ. ສະນັ້ນ, ຈຶ່ງຮຽກຮ້ອງໃຫ້ການຜະລິດສິນຄ້າມີຄຸນນະພາບສູງ ດ້ວຍການນໍາໃຊ້ລະບົບເຕັກໂນໂລຊີທັນສະໄໝເຂົ້າໃນວຽກງານດັ່ງກ່າວ ໂດຍສະເພາະແມ່ນການຜະລິດກະສິກຳຈະຫຼຸດຜ່ອນຕົ້ນທຶນ, ປະຢັດເວລາ ແລະ ບໍ່ຈໍາເປັນໃຊ້ແຮງງານກໍາມະກອນຢ່າງຫຼວງຫຼາຍອີກຕໍ່ໄປ. ຄຽງຄູ່ກັນນັ້ນ, ການຄ້າ-ຂາຍກໍຜ່ານລະບົບອິນເຕີເນັດ ຫຼື ສະມາດໂຟນ ແລະ ອື່ນໆ; ສ່ວນການແລກປ່ຽນຊື້-ຂາຍບໍ່ຈໍາເປັນຕ້ອງຖືເງິນສົດຄືກັບໄລຍະຜ່ານມາ.
ປັດຈຸບັນ ແມ່ນຍຸກອຸດສາຫະກຳ 4.0 ທີ່ປະສົມປະສານເອົາເຕັກໂນໂລຊີດິຈິຕ໋ອນເຊື່ອມກັບອິນເຕີນເນັດແຫ່ງສັບພະສິ່ງ ອັນເຮັດໃຫ້ມີຄວາມກ້າວໜ້າໃນຫຼາຍດ້ານ ເປັນຕົ້ນແມ່ນ: ຄວາມກ້າວໜ້າທາງດ້ານເຕັກໂນໂລຊີ ຊີວະພາບ, ນາໂນ ເຕັກໂນໂລຊີ, ການພັດທະນາ ຫຸ່ນຍົນ ຈົນກ້າວໄປເຖິງການສ້າງຕົວເມືອງແບບອັດສະລິຍະ, ປັນຍາປະດິດ ແລະ ນະວັດຕະກຳໃໝ່ໆ ອັນເປັນພື້ນຖານໃຫ້ແກ່ການພັດທະນາວຽກງານວິທະຍາສາດ ແລະ ເຕັກໂນໂລຊີທີ່ຫຼາກຫຼາຍ.
ກອງປະຊຸມດັ່ງກ່າວ, ຈັດຂຶ້ນໃນ ວັນທີ 15 ຕຸລາ 2019 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ປອ. ຈັນແສງ ພິມມະວົງ ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ມີບັນດາຫົວໜ້າກົມ, ສະຖາບັນ, ບັນດາຜູ້ຕາງໜ້າກະຊວງກ່ຽວຂ້ອງ, ຜູ້ປະກອບການ ແລະ ນັກຮຽນ-ນັກສຶກສາ ເຂົ້າຮ່ວມ 100 ກວ່າຄົນ.

LEAVE A REPLY

Please enter your comment!
Please enter your name here