ຍ່າງ ເພື່ອສຸຂະພາບເນື່ອງໃນໂອກາດ ສະເຫລີມສະຫລອງ ວັນວິທະຍາສາດແຫ່ງຊາດ 12 ຕຸລາ

0
16

ເນື່ອງໃນໂອກາດວັນວິທະຍາສາດແຫ່ງຊາດ 12 ຕຸລາ ຊຶ່ງໄດ້ລະບຸໄວ້ໃນກົດໝາຍວ່າດ້ວຍ ວິທະຍາສາດ ແລະ ເຕັກໂນໂລຊີ ທີ່ສະພາແຫ່ງຊາດ ໄດ້ຮັບຮອງເອົາໃນປີ 2013 ຊຶ່ງປີນີ້ ຄົບຮອບ 6 ປີ, ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດກິດຈະກໍາຍ່າງເພື່ອສຸຂະພາບຂື້ນ ເພື່ອສະເຫຼີມສະຫຼອງວັນດັ່ງກ່າວໃນວັນທີ 14 ຕຸລາ 2019 ຢູ່ປະຕູໄຊ ນະຄອນຫຼວງວຽງຈັນ.
ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີ ກວຕ ກ່າວເປີດພິທີດັ່ງກ່າວວ່າ ມື້ນີ້, ແມ່ນ ວັນວິທະຍາສາດ ແຫ່ງຊາດ, 12 ຕຸລາ ແລະ ທັງເປັນວັນທີມີຄວາມຫມາຍສຳຄັນ ອິກວັນຫນຶ່ງ ທາງປະຫວັດສາດສຳຄັນຂອງຊາດເຮົາ ຄືວັນປະກາດເອກະລາດ 12 ຕຸລາ 1945 ຄົບຮອບ 74 ປີ, ພັກ ແລະ ລັດຖະບານ ແຫ່ງ ສປປ ລາວ ໄດ້ກຳນົດເອົາ ວັນທີ 12 ຕຸລາ ເປັນວັນວິທະຍາສາດແຫ່ງຊາດ ແລະ ໄດ້ພ້ອມກັນຈັດງານສະເຫລີມສະຫລອງໃນທຸກໆປີ ປີນີ້ເປັນປີທີ 6 ທີ່ພວກເຮົາໄດ້ພ້ອມກັນຈັດງານນີ້ ເພື່ອເປັນການສ້າງຈິດສຳນຶກ ແລະ ຄວາມຮັບຮູ້ໃຫ້ແກ່ປະຊາຊົນ ກ່ຽວກັບບົດບາດ ແລະ ຄວາມສຳຄັນຂອງວິທະຍາສາດ ຕໍ່ກັບການພັດທະນາເສດຖະກິດ-ສັງຄົມແຫ່ງຊາດ ແລະ ໃຫ້ເຫັນວ່າ ການຄົ້ນຄ້ວາ-ການພັດທະນາ ແລະ ການນຳໃຊ້ ວິທະຍາສາດ ແລະ ເຕັກໂນໂລຊີ ເປັນປັດໄຈພື້ນຖານ, ກຳລັງແຮງ ແລະ ພາຫານະຊຸກຍູ້, ສົ່ງເສີມການພັດທະນາເສດຖະກິດ-ສັງຄົມ, ນຳເອົາປະເທດເຮົາ ກ້າວໄປສູ່ ອຸດສາຫະກຳ ທັນສະໄຫມ ແລະ ສ້າງບາດກ້າວໃໝ່ ໃຫ້ແກ່ການສ້າງສາ ເສດຖະກິດແຫ່ງພູມປັນຍາ.
ໃນໄລຍະຜ່ານມາ, ພັກ-ລັດ ໄດ້ເອົາໃຈໃສ່ ຕໍ່ການພັດທະນາ ວຽກງານວິທະຍາສາດ ແລະ ເຕັກໂນໂລຊີ ຂອງປະເທດເຮົາ ເຊັ່ນ: ການສົ່ງເສີມສະຕິປັນຍາ, ຫົວຄິດປະດິດສ້າງ, ການຄົ້ນຄ້ວາ-ພັດທະນາ, ການຖ່າຍທອດເຕັກໂນໂລຊີ, ສ້າງເປັນນະວັດຕະກຳໃໝ່, ຊັບສິນທາງປັນຍາ, ມາດຕະຖານ ແລະ ວັດແທກ ໃນການດຶງດູດການລົງທຶນ ທັງພາຍໃນ ແລະ ຕ່າງປະເທດ; ການສ້າງນິຕິກຳ ແລະ ການພັດທະນາຊັບພະຍາກອນມະນຸດ, ການປົກປ້ອງຊັບສິນທາງປັນຍາ ແລະ ການບໍລິການທາງດ້ານວິທະຍາສາດ ແລະ ເຕັກໂນໂລຊີ ທີ່ເປັນປັດໄຈໃຫ້ແກ່ການຫັນເປັນອຸດສາຫະກຳ ທັນສະໄໝ ເທື່ອລະກ້າວ.
ເນື່ອງໃນໂອກາດ ສະເຫລີມສະຫລອງ ວັນວິທະຍາສາດແຫ່ງຊາດ ແລະ ການຈັດກິດຈະກຳ ຍ່າງເພື່ອສຸຂະພາບມື້ນີ້, ຂ້າພະເຈົ້າ ຂໍຕາງຫນ້າ ກົມການເມືອງ ສູນກາງພັກ ແລະ ລັດຖະບານ ຮຽກຮ້ອງມາຍັງບັນດາ ນັກວິທະຍາສາດ, ນັກຄົ້ນຄວ້າ, ນັກຮຽນຮູ້, ປັນຍາຊົນ ຈົ່ງສືບຕໍ່ເສີມຂະຫຍາຍມູນເຊື້ອການຄົ້ນຄວ້າປະດິດສ້າງຂອງຕົນ ນຳໃຊ້ຢ່າງມີຫົວຄິດປະດິດສ້າງ ເຂົ້າໃສ່ການພັດທະນາ, ຍົກລະດັບຄວາມຮູ້ຄວາມສາມາດ ແລະ ຊີວິດການເປັນຢູ່ ຂອງປະຊາຊົນບັນດາເຜົ່າ ໃຫ້ນັບມື້ນັບຈະເລີນຂື້ນເລື້ອຍໆ
ເຂົ້າຮ່ວມໃນກິດຈະກໍາການຍ່າງຄັ້ງນີ້ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີ ກວຕ, ທ່ານ ສັນຍາ ປຣະເສີດ, ຮອງຄະນະກຳມາທິການດ້ານວິທະຍາສາດ, ເຕັກໂນໂລຊີ ແລະ ສິ່ງແວດລ້ອມ, ສະພາແຫ່ງຊາດ, ມີບັນດາຮອງລັດຖະມົນຕີ, ຫົວໜ້າກົມ, ສະຖາບັນ, ພະນັກງານພາຍໃນ ກວຕ ແລະ ພໍ່ແມ່ປະຊາຊົນຊາວນະຄອນຫຼວງວຽງຈັນ ເຂົ້າຮ່ວມ 500 ກວ່າຄົນ.

LEAVE A REPLY

Please enter your comment!
Please enter your name here