ພິທີເປີດຊຸດຝຶກອົບຮົມພາສາ ຫວຽດນາມ ໃຫ້ແກ່ຊາວໜຸ່ມ ກວຕ

0
23
ໃນຕອນບ່າຍຂອງວັນທີ 8 ກັນຍາ 2020 ຜ່ານມາ, ທີ່ຫ້ອງຝຶກອົບຮົມຂອງ ສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ, ກະຊວງວິທະຍາສາດ ແລະ ເຕັກໂນໂລຊີ (ກວຕ) ຈັດພິທີເປີດຊຸດຝຶກອົບຮົມພາສາ ຫວຽດນາມ ໃຫ້ແກ່ຊາວໜຸ່ມ ກວຕ, ໃຫ້ກຽດເປັນປະທານກ່າວເປີດພິທີ ໂດຍ ທ່ານ ພິມພາ ອຸດທະຈັກ, ຫົວໜ້າສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ, ກວຕ, ຊຶ່ງມີສະຫາຍຮອງເລຂາ ຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກວຕ, ມີຄະນະບໍລິຫານງານ, ເລຂາໜ່ວຍຊາວໜຸ່ມຮາກຖານ ແລະ ສະມາຊິກຊາວໜຸ່ມຈາກຫ້ອງການ, ກົມ, ສະຖາບັນ ແລະ ພະແນກວິທະຍາສາດ ແລະ ເຕັກໂນໂລຊີ ນະຄອນຫຼວງວຽງຈັນ ເຂົ້າຮ່ວມທັງໝົດ 30 ກວ່າສະຫາຍ.
ຈຸດປະສົງຂອງການຈັດຝືກອົບຮົມໃນຄັ້ງນີ້ ແມ່ນເພື່ອເປັນການຍົກລະດັບພື້ນຖານທາງດ້ານພາສາຫວຽດນາມ ໃຫ້ແກ່ຊາວໜຸ່ມ ກະຊວງວິທະຍາສາດ ແລະ ເຕັກໂນໂລຊີ ໂດຍອີງຕາມຄວາມຮຽກຮ້ອງຕ້ອງການຂອງອ້າຍເອື້ອຍນ້ອງ ສະມາຊິກຊາວໜຸ່ມໃນການຍົກລະດັບທາງດ້ານພາສາຕ່າງປະເທດ, ທັງເປັນການສ້າງຄວາມສະດວກໃນການຕິດຕໍ່ພົວພັນ ລະຫວ່າງ ພະນັກງານທັງສອງປະເທດ ລາວ-ຫວຽດນາມ ເວົ້າລວມ, ເວົ້າສະເພາະ ກໍຄື ກະຊວງວິທະຍາສາດ ແລະ ເຕັກໂນໂລຊີ ຂອງ ສປປ ລາວ ກັບ ກະຊວງວິທະຍາສາດ ແລະ ເຕັກໂນໂລຊີ ຂອງ ສສ ຫວຽດນາມ ແລະ ສະພາບັນດິດວິທະຍາສາດ ແລະ ເຕັກໂນໂລຊີ ຂອງ ສສ ຫວຽດນາມ.
ໃນໂອກາດນີ້, ທ່ານ ພິມພາ ອຸດທະຈັກ ໄດ້ກ່າວເປີດພິທີຊຸດຝຶກອົບຮົມ ຊຶ່ງມີເນື້ອໃນບາງຕອນວ່າ: ການຍົກລະດັບພື້ນຖານທາງດ້ານພາສາຫວຽດນາມໃຫ້ແກ່ຊາວໜຸ່ມ ກວຕ ຄັ້ງນີ້ ແມ່ນຈະໄດ້ລົງເລິກກ່ຽວກັບການປະສານງານ ຄວາມເຂົ້າໃຈໃນການສື່ສານ ເພື່ອສ້າງຄວາມສະດວກໃນການຕິດຕໍ່ພົວພັນ ລະຫວ່າງ ພະນັກງານທັງສອງປະເທດ ລາວ-ຫວຽດນາມ ຊຶ່ງຄູອາຈານເປັນຜູ້ທີ່ມີບົດຮຽນ ແລະ ປະສົບການມາກ່ອນໃນການສິດສອນພາສາ ຫວຽດນາມ. ພ້ອມດຽວກັນນັ້ນ, ທ່ານ ຍັງໄດ້ຮຽກຮ້ອງມາຍັງນັກສຳມະນາກອນທຸກໆສະຫາຍທີ່ເຂົ້າຮ່ວມໃນການຝຶກອົບຮົມໃນຄັ້ງນີ້ ໃຫ້ເອົາໃຈໃສ່ຕັ້ງໃຈໃນການສຶກສາຮ່ຳຮຽນ, ເປັນຕົ້ນແມ່ນ ການປະຕິບັດໂມງເວລາ, ການແລກປ່ຽນບົດຮຽນນຳຄູອາຈານ, ໃຫ້ມີຄວາມເອົາໃຈໃສເປັນເຈົ້າຕົນເອງ ເພື່ອຍາດແຍ່ງເອົາຄວາມຮູ້ນຳຄູອາຈານມາສູ່ຕົນເອງໃຫ້ໄດ້ຫຼາຍທີ່ສຸດ.
ຊຸດຝຶກອົບຮົມໃນຄັ້ງນີ້ ແມ່ນຈັດຂຶ້ນໂດຍ ຄະນະບໍລິຫານງານຊາວໜຸ່ມປະຊາຊົນປະຕິວັດລາວ, ກະຊວງວິທະຍາສາດ ແລະ ເຕັກໂນໂລຊີ ຊຶ່ງຈະດຳເນີນໄປເປັນເວລາ 3 ເດືອນ (ເລີມແຕ່ວັນທີ 8 ກັນຍາ ເຖິງ 26 ພະຈິກ 2020), ສໍາລັບມື້ຮຽນແມ່ນທຸກໆຕອນບ່າຍຂອງວັນອັງຄານ ແລະ ວັນພະຫັດ, ລວມໄລຍະເວລາ ທັງໝົດ 48 ຊົ່ວໂມງ, ໂດຍມີອາຈານຮັບເຊີນຈາກພາຍນອກ ແລະ ມີນັກສໍາມະນາກອນທີ່ເປັນສະມາຊິກຊາວໜຸ່ມຈາກໜ່ວຍຊາວໜຸ່ມຮາກຖານຫ້ອງການ, ກົມ, ສະຖາບັນ ແລະ ພະແນກວິທະຍາສາດ ແລະ ເຕັກໂນໂລຊີ ນະຄອນຫຼວງວຽງຈັນ ເຂົ້າຮ່ວມຝຶກອົບຮົມທັງໝົດ 26 ສະຫາຍ.

LEAVE A REPLY

Please enter your comment!
Please enter your name here