ກອງປະຊຸມໃຫຍ່ ຜູ້ແທນສະຫະພັນກໍາມະບານ ກວຕ ຄັ້ງທີ II

0
14

ກອງປະຊຸມໃຫຍ່ຜູ້ແທນ ສະຫະພັນກຳມະບານ ກະຊວງວິທະຍາສາດ ແລະ ເຕັກໂນໂລຊີ (ກວຕ) ຄັ້ງທີ II ໄດ້ຈັດຂຶ້ນໃນຕອນເຊົ້າຂອງວັນທີ 12 ທັນວາ 2019 ຢູ່ ສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ ຊຶ່ງໄດ້ຮັບກຽດການເຂົ້າຮ່ວມເປັນຄະນະປະທານຂອງສະຫາຍ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັັກ, ລັດຖະມົນຕີ ກວຕ; ສະຫາຍ ປ້ານ ນ້ອຍມະນີ, ກຳມະການສູນກາງພັກ, ປະທານສູນກາງສະຫະພັນກຳມະບານລາວ; ສະຫາຍ ປອ. ນ. ແກ້ວວິວອນ ອຸດທະຈັັກ, ປະທານສະຫະພັນກຳມະບານ ກວຕ; ສະຫາຍ ພຸດທະສັກ ວິຈິດຕຣາ, ເລຂາຄະນະບໍລິຫານງານຊາວໜຸ່ມ ກວຕ; ສະຫາຍ ນ. ແກ້ວໄພວັນ ດວງສະຫວັນ, ປະທານສະຫະພັນແມ່ຍິງ ກວຕ.
ກອງປະຊຸມໃຫຍ່ ຜູ້ແທນ ສະຫະພັນກຳມະບານ ກວຕ ຄັ້ງທີ II ໄດ້ເປັ ເອກະສັນຮັບຮອງເອົາບັນດາເນື້ອໃນ ດັ່ງນີ້: ກອງປະຊຸມໄດ້ພ້ອມກັນຄົ້ນຄວ້າ ແລະ ປະກອບຄໍາເຫັນໃສ່ບົດລາຍງານການເມືອງ ແລະ ບົດສໍາຫຼວດການນໍາພາຂອງຄະນະສະຫະພັນກໍາມະບານ ກວຕ; ໄດ້ເປັນເອກະພາບກັນຕີລາຄາດ້ານດີ, ດ້ານອ່ອນ ສາເຫດທີ່ພາໃຫ້ມີຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ໃນການຊີ້ນໍາ-ນໍາພາ ຈັດຕັ້ງປະຕິບັດວຽກງານ ຂອງຄະນະສະຫະພັນກໍາມະບານ ກວຕ ໃນໄລຍະຜ່ານມາ.
ກອງປະຊຸມ ໄດ້ເປັນເອກະພາບຮັບຮອງເອົາທິດທາງແຜນການ 5 ປີຕໍ່ໜ້າ 2020-2024 ຂອງສະຫະພັນກຳມະບານ ກວຕ ຊຶ່ງ ຈະສຸມໃສ່ບາງໜ້າວຽກຕົ້ນຕໍ ດັ່ງນີ້: ສູ້ຊົນ ຊີ້ນຳ-ນໍາພາ ສະຫະພັນກໍາມະບານ ກວຕ ຕາມພາລະບົດບາດ ຂອງຕົນ ເພື່ອນຳເອົາ ວຽກງານ ວິທະຍາສາດ ແລະ ເຕັກໂນໂລຊີ ຍຸກ 4.0 ກາຍເປັນໜ້າທີ່ການເມືອງ ປະກອບສ່ວນເຂົ້າໃນການພັດທະນາເສດຖະກິດ – ສັງຄົມ; ຜັນຂະຫຍາຍ ເນື້ອໃນຂໍ້ແຂ່ງຂັນ 5 ເປັນເຈົ້າ ໃຫ້ຕິດພັນກັບວຽກງານວິຊາສະເພາະຕົວຈິງ, ພັດທະນາ ສະມາຊິກກຳມະບານ ໃຫ້ກາຍເປັນຜູ້ທີ່ມີຫົວຄິດປະດິດສ້າງ, ມີຄວາມຮູ້ ຄວາມສາມາດ ໂດຍການສົ່ງເສີມ ຍົກລະດັບວິຊາສະເພາະ, ຝືກອົບຮົມ ພາຍໃນ ແລະ ຕ່າງປະເທດ ຢ່າງໜ້ອຍ 300 ສະຫາຍ, ລະດັບປຣີນຍາຕີຢ່າງໜ້ອຍ 5 ສະຫາຍ, ປຣີນຍາໂທ ຢ່າງໜ້ອຍ 30 ສະຫາຍ, ປຣີນຍາເອກ ຢ່າງໜ້ອຍ 15 ສະຫາຍ, ພາສາຕ່າງປະເທດ ແລະ ຄອມພີວເຕີ 5 ສະຫາຍ ຕໍ່ປີ ແລະ ຍົກລະດັບທິດສະດີການເມືອງ ບໍາລຸງ 45 ວັນ ຢ່າງ ໜ້ອຍ 5 ສະຫາຍ ຕໍ່ປີ; ເພີ່ມທະວີ ເປັນຕົວແທນປົກປ້ອງສິດຜົນປະໂຫຍດອັນເປັນທຳ ຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານບັນດາເຜົ່າ, ເຕົ້າໂຮມຄວາມສາມັກຄີພາຍໃນໃຫ້ມີຄວາມໜັກແໜ້ນ; ຂະຫຍາຍ ສະມາຊິກກຳມະບານ ໃຫ້ເຕີບໃຫຍ່ເຂັ້ມແຂງ ຮອດປີ 2024 ໃຫ້ບັນລຸໄດ້ 98% ທຽບໃສ່ຈຳນວນພະນັກງານທັງໝົດ ຂອງກະຊວງ; ສົ່ງເສີມກໍ່ສ້າງສະມາຊິກກຳມະບານໃຫ້ເປັນສະມາຊິກພັກ ຮອດປີ 2024 ໃຫ້ບັນລຸໄດ້ 50% ທຽບໃສ່ຈຳນວນສະມາຊິກກຳມະບານທັງໝົດ; ຈັດຕັ້ງສ້າງກອງທຶນຊ່ວຍເຫຼືອເຊຶ່ງກັນ ແລະ ກັນ ເພື່ອໃຫ້ນະໂຍບາຍແກ່ສະມາຊິກກຳມະບານຂອງກະຊວງ.
ຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຂັດເລືອກເອົາຄະນະສະ ຫະພັນກຳມະບານ ກວຕ ຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງ ແລະ ສອດຄ່ອງກັບລະບຽບ ຫຼັກການ ມາດຖານເງື່ອນໄຂ ທີ່ກໍານົດໄວ້ ຊຶ່ງມີຜູ້ລົງຮັບສະໜັກເລືອກຕັ້ງ 17 ສະຫາຍ, ຍິງ 3 ສະຫາຍ ແລະ ເລືອກໄດ້ 13 ສະຫາຍ, ຍິງ 3 ສະຫາຍ.
ກອງປະຊຸມຄັ້ງປະຖົມມະລຶກ ຄົບຄະນະສະຫະພັນກໍາມະບານ ກວຕ ໄດ້ເປັນເອກະ ສັນເລືອກ ເອົາ ປະທານ, ຮອງປະທານ ແລະ ຄະນະກວດກາ ຂອງ ຄະນະສະຫະພັນກໍາມະບານ ກວຕ ດັ່ງນີ້: ສະຫາຍ ສຸມານະ ຈຸລາມະນີ ເປັນ ປະທານ; ສະຫາຍ ປອ. ນ. ແກ້ວວິວອນ ອຸດທະຈັກ ເປັນ ຮອງປະທານ; ສະຫາຍ ມະໂນທອງ ວົງລໍຄໍາ ເປັນ ຮອງປະທານ ແລະ ເປັນປະທານກວດກາ.
ຜູ້ເແທນທີ່ເຂົ້າຮ່ວມກອງປະຊຸມໃຫຍ່ຄັ້ງນີ້ ໄດ້ຮັບຟັງຄຳເຫັນ ຈາກ ສະຫາຍ ບັນດິດ. ສຈ ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງ ວິທະຍາສາດ ແລະ ເຕັກໂນໂລຊີ ແລະ ຄຳໂອ້ລົມ ຈາກ ສະຫາຍ ປ້ານ ນ້ອຍມະນີ, ກຳມະການສູນກາງພັກ, ເລຂາຄະນະພັກ, ປະທານສູນກາງສະຫະພັນກໍາມະບານລາວ ຊຶ່ງ ສະຫາຍ ໄດ້ສະແດງ ຄວາມຍ້ອງຍໍຊົມເຊີຍຄະນະຊຸດເກົ່າ ທີ່ໄດ້ຊີ້ນໍາ-ນໍາພາ ພະນັກງານ ແລະ ສະມາຊິກກຳມະບານ ກວຕ ປະຕິບັດໜ້າທີ່ການເມືອງ ແລະ ວຽກງານຕ່າງໆ ໄດ້ຮັບຜົນສໍາເລັດຫລາຍດ້ານ ໃນໄລຍະ 4 ປີທີ່ຜ່ານມາ.
ພ້ອມກັນນັ້ນ, ສະຫາຍ ຍັງໄດ້ຮຽກຮ້ອງໃຫ້ ຄະນະສະຫະພັນກຳມະບານ ກວຕ ຊຸດໃໝ່ສືບຕໍ່ປັບປຸງແກ້ໄຂດ້ານອ່ອນ, ຂໍ້ຄົງຄ້າງຜ່ານການປະຕິບັດງານໃນໄລຍະຜ່ານມາ.
ສະຫາຍ ຍັງໃຫ້ທິດຊີ້ນໍາວຽກງານແຕ່ລະດ້ານ ເຊັ່ນ:
– ຕັ້ງໜ້າສຶກສາອົບຮົມດ້ານການເມືອງແນວຄິດຢ່າງເລິກເຊິ່ງ ໂດຍສະເພາະ ກຳແໜ້ນແນວທາງນະໂຍບາຍພັກ-ລັດ ໃຫ້ສະມາຊິກກຳມະບານ, ພະນັກງານ-ລັດຖະກອນ ພາຍໃນ ກວຕ ແລະ ຕີຖອຍແນວຄິດຫຍໍ້ທໍ້ຕ່າງໆ;
– ປັບປຸງກົງຈັກການຈັດຕັ້ງສະຫະພັນກຳມະບານກະຊວງໃຫ້ສອດຄ່ອງກັບວຽກງານການຈັດຕັ້ງລັດໃນທຸກຂົງເຂດວຽກງານ;
– ເພີ່ມທະວີຄວາມເປັນແບບຢ່າງທຸກດ້ານ, ຍົກສູງຄວາມຮູ້ຄວາມສາມາດທາງດ້ານວິຊາສະເພາະ, ຜັນຂະຫຍາຍເນື້ອໃນຂໍ້ແຂ່ງຂັນ 5 ເປັນເຈົ້າ ຕິດພັນກັບວຽກງານວິຊາສະເພາະຕົວຈິງ ແລະ ເພີ່ມທະວີຄວາມສາມັກຄີພາຍໃນໃຫ້ໜັກແໜ້ນ;
– ປົກປ້ອງສິດ, ຜົນປະໂຫຍດອັນຊອບທຳ ຂອງສະມາຊິກກຳມະບານ ແລະ ຊາວຜູ້ອອກແຮງງານ;ເອົາໃຈໃສ່ປັບປຸງແບບແຜນວິທີເຮັດວຽກໃຫ້ມີປະສິດທິຜົນສູງ ແລະ ຂະຫຍາຍສະມາຊິກກຳມະບານໃຫ້ໄດ້ທາງປະລິມານ ແລະ ຄຸນນະພາບ; ສືບຕໍ່ຄົ້ນຄວ້າ ສ້າງກອງທຶນຊ່ວຍເຫຼືອເຊຶ່ງກັນ ແລະ ກັນ ເພື່ອໃຫ້ນະໂຍບາຍ ແກ່ສະມາຊິກກຳມະບານຂອງກະຊວງ;
– ສົ່ງເສີມການເຊື່ອມໂຍງກັບສາກົນຕາມແນວທາງຮ່ວມມືຂອງພັກ ຊຶ່ງເລີ່ມຈາກ ສາຍພົວພັນການຮ່ວມມື ສາມັກຄີ ກັບອົງການຈັດຕັ້ງມະຫາຊົນ ທີ່ເປັນພາຄີພາຍໃນ ແລະ ຕ່າງປະເທດ, ສົ່ງເສີມການຮຽນຮູ້ບົດຮຽນ ວິຊາການ ແລະ ປະສານທືນຮອນເພື່ອພັດທະນາສະຫະພັນກຳມະບານຂອງຕົນໃຫ້ເຂັ້ມແຂງ ໜັກແໜ້ນ.
ສະຫາຍ ມີຄວາມເຊື່ອໝັ້ນຕໍ່ ຄະນະສະຫະພັນກຳມະບານ ກວຕ ຊຸດໃໝ່ ທີ່ຈະສືບຕໍ່ຊີ້ນຳ – ນໍາພາ ຈັດຕັ້ງປະຕິບັດ ມະຕິກອງປະຊຸມໃຫຍ່ຂອງຜູ້ແທນສະຫະພັນກໍາມະບານ ກວຕ ຄັ້ງນີ້ ຈະສ້າງໄດ້ຜົນງານ ແລະ ຜົນສໍາເລັດອັນໃຫຍ່ຫຼວງກວ່າເກົ່າ.
ກອງປະຊຸມສະແດງຄວາມຮູ້ບຸນຄຸນ ແລະ ຂອບໃຈມາຍັງ ສູນກາງສະຫະພັນກຳມະບານລາວ, ຄະນະພັກກະຊວງ ແລະ ອົງການຈັດຕັ້ງມະຫາຊົນ ຊຶ່ງຍາມໃດ ກໍໄດ້ເປັນຫວ່ງ, ເປັນໄຍ ໃຫ້ການຊີ້ນຳ-ນຳພາ ແລະ ໃຫ້ຄວາມສຳຄັນຕໍ່ວຽກງານວິທະຍາສາດ ແລະ ເຕັກໂນໂລຊີ, ສະແດງຄວາມຂອບໃຈ ມາຍັງບັນດາສະຫາຍ ຕາງໜ້າ ສະຫະພັນກຳມະບານ ອ້ອມຂ້າງກະຊວງ ແລະ ພາກສ່ວນຕ່າງໆ ທີ່ໄດ້ໃຫ້ການສະໜັບສະໜູນ ວຽກງານຕະຫລອດມາ.
ກອງປະຊຸມຂໍສະແດງຄວາມຍ້ອງຍໍ ຊົມເຊີຍມາຍັງຄະນະໜ່ວຍກໍາມະບານຮາກຖານ, ບັນດາສະມາຊິກກໍາມະບານທີ່ໄດ້ພ້ອມກັນ ເອົາໃຈໃສ່ ແລະ ຕັ້ງໜ້າປະຕິບັດວຽກງານ ການພັດທະນາວິທະຍາສາດ ແລະ ເຕັກໂນໂລຊີ ດ້ວຍຄວາມຮັບຜິດຊອບສູງ, ກອງປະຊຸມຮຽກຮ້ອງມາຍັງ ສະມາຊິກກໍາມະບານ ທຸກສະຫາຍຈົ່ງເຊີດຊູສະຕິ ແລະ ຄວາມຮັບຜິດຊອບ ໃນໜ້າທີ່ການເມືອງ ຂອງຕົນໃຫ້ສູງຂຶ້ນເລື້ອຍໆ ພ້ອມກັນພັດທະນາ ວຽກງານວິທະຍາສາດ ແລະ ເຕັກໂນໂລຊີ ໃຫ້ມີການ ຫັນປ່ຽນຢ່າງຕັ້ງໜ້າ ແລະ ເຮັດໃຫ້ວຽກງານການຈັດຕັ້ງກໍາມະບານທົ່ວຂະແໜງການວິທະຍາສາດ ແລະ ເຕັກໂນໂລຊີ ມີຄວາມເຂັ້ມແຂງ, ປອດໄສ ແລະ ມີຄວາມ ໜັກແໜ້ນ.
ກອງປະຊຸມໃຫຍ່ຜູ້ແທນ ສະຫະພັນກຳມະບານ ດຳເນີນເປັນເວລາ ເຄີ່ງວັນ ໂດຍມີຜູ້ແທນສົມບູນເຂົ້າຮ່ວມທັງໝົດ: 266 ສະຫາຍ, ຍິງ: 106 ສະຫາຍ. ບັນດາສະຫາຍດັ່ງກ່າວໄດ້ເປັນຕົວແທນຂອງສໍາມະຊິກກໍາມະບານ ກວຕ ທັງໝົດ 608 ສະຫາຍ. ກອງປະຊຸມໄດ້ມີແຂກຖືກເຊີນເຂົ້າຮ່ວມ 8 ສະຫາຍ.

 

LEAVE A REPLY

Please enter your comment!
Please enter your name here