ສອງໜ່ວຍພັກ ກວຕ ຮັບເອົາມະຫາຊົນກ້າວໜ້າເຂົ້າເປັນສະມາຊິກ ພັກສຳຮອງ ແລະ ເລື່ອນສະມາຊິກພັກສຳຮອງຂຶ້ນເປັນສົມບູນ

0
126
ໃນຕອນເຊົ້າຂອງວັນທີ 30 ກັນຍາ 2020, ທີ່ຫ້ອງປະຊຸມຊັ້ນ 4 ຂອງ ກະຊວງວິທະຍາສາດ ແລະ ເຕັກໂນໂລຊີ (ກວຕ) ໜ່ວຍພັກສະຖາບັນເຕັກໂນໂລຊີຄອມພີວເຕີ ແລະ ເອເລັກໂຕຣນິກ ແລະ ໜ່ວຍພັກກົມຊັບສິນທາງປັນຍາ ທີ່ຂຶ້ນກັບ ກວຕ ໄດ້ຈັດພິທີຮັບມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ແລະ ເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ.
ໂດຍໃຫ້ກຽດເປັນປະທານຂອງ ສະຫາຍ ປອ. ສຸລິອຸດົງ ສູນດາລາ, ຄະນະພັກກະຊວງ, ປະທານກວດກາພັກ, ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ. ມີສະຫາຍເລຂາ, ຮອງເລຂາໜ່ວຍພັກ, ຜູ້ຕາງໜ້າໜ່ວຍພັກບັນດາຫ້ອງການ, ກົມ, ສະຖາບັນ, ສາມອົງການຈັດຕັ້ງມະຫາຊົນ ພ້ອມດ້ວຍສະມາຊິກພັກຂອງສອງໜ່ວຍພັກດັ່ງກ່າວເຂົ້າຮ່ວມ.
ໃນພິທີຄັ້ງນີ້, ສະຫາຍ ວິລະສັກ ອິນທະປະຖາ, ເລຂາໜ່ວຍພັກ ສະຖາບັນເຕັກໂນໂລຊີຄອມພີວເຕີ ແລະ ເອເລັກໂຕຣນິກ ກວຕ ໄດ້ຂຶ້ນຜ່ານມະຕິຕົກລົງ ວ່າດ້ວຍການຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ຈໍານວນ 01 ສະຫາຍ ແລະ ຜ່ານມະຕິຕົກລົງຂອງຄະນະພັກ ກວຕ ວ່າດ້ວຍການເລື່ອນສະມາຊິກພັກສໍາຮອງຂຶ້ນ ເປັນສະມາຊິກພັກສົມບູນ ຈຳນວນ 2 ສະຫາຍ.
ພ້ອມດຽວກັນນັ້ນ, ສະຫາຍ ນ. ຂັນລາສີ ແກ້ວບຸນພັນ, ເລຂາໜ່ວຍພັກ ກົມຊັບສິນທາງປັນຍາ ກວຕ ຂຶ້ນຜ່ານມະຕິຕົກລົງວ່າດ້ວຍການຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງ ຈໍານວນ 01 ສະຫາຍ.
ຕໍ່ພິທີດັ່ງກ່າວ, ສະຫາຍ ປອ. ສຸລິອຸດົງ ສູນດາລາ ໄດ້ໃຫ້ກຽດໂອ້ລົມ ແລະ ກ່າວສະແດງຄວາມຍ້ອງຍໍ ຊົມເຊີຍຕໍ່ສອງໜ່ວຍພັກ ທີ່ໄດ້ມີຄວາມເອົາໃຈໃສ່ກໍ່ສ້າງ ແລະ ຂະຫຍາຍສະມາຊິກພັກຂອງຕົນໃຫ້ມີຄວາມເຂັ້ມແຂງຂຶ້ນ ພ້ອມທັງຍ້ອງຍໍຊົມເຊີຍບັນດາສະມາຊິກພັກສຳຮອງ ແລະ ສະມາຊິກສົມບູນໃໝ່ທຸກສະຫາຍທີ່ໄດ້ມີຄວາມຫ້າວຫັນໃນການຈັດຕັ້ງປະຕິບັດໜ້າທີ່ວຽກງານ ແລະ ຜ່ານຜ່າບັນດາອຸປະສັກຕ່າງໆຈົນໄດ້ເຂົ້າເປັນສະມາຊິກພັກ ໃນຄັ້ງນີ້. ໃນນັ້ນ, ສະຫາຍ ໄດ້ຮຽກຮ້ອງໃຫ້ສະມາຊິກພັກສົມບູນຈົ່ງສືບຕໍ່ຕິດຕາມກໍ່ສ້າງ ແລະ ຊ່ວຍເຫຼືອສະມາຊິກພັກສໍາຮອງ ໃຫ້ກາຍເປັນສະມາຊິກພັກສົມບູນໃນຕໍ່ໜ້າ ແລະ ກໍໄດ້ເນັ້ນໜັກໃຫ້ສະມາຊິກພັກໃໝ່ ແລະ ສະມາຊິກພັກເກົ່າ ຈົ່ງສືບຕໍ່ຝຶກຝົນຫຼໍ່ຫຼອມຕົນເອງ ໃຫ້ກາຍເປັນສະມາຊິກພັກທີ່ປອດໃສ, ເຂັ້ມແຂງ, ໜັກແໜ້ນ, ເຊື່ອໝັ້ນຕໍ່ອຸດົມການຂອງພັກ, ຮັກສາມູນເຊື້ອຄຸນສົມບັດສິນທຳປະຕິວັດ ໂດຍຖືການຍົກສູງທາງດ້ານຄຸນທາດການເມືອງເປັນຫຼັກ, ຍົກສູງສະຕິຕໍ່ການຈັດຕັ້ງ, ຊື່ສັດ ແລະ ຈົງຮັກພັກດີຕໍ່ພັກ-ລັດ, ຕໍ່ປະເທດຊາດ ແລະ ຕໍ່ປະຊາຊົນ, ເອົາໃຈໃສ່ເພີ່ມທະວີຄວາມສາມັກຄີ ຮັກແພງເຊິ່ງກັນ ແລະ ກັນໃຫ້ເປັນປຶກແຜ່ນ ເພື່ອສືບຕໍ່ຈັດຕັ້ງປະຕິບັດວຽກງານທີ່ພັກ-ລັດ ມອບໝາຍໃຫ້ປະສົບຜົນສຳເລັດ.

LEAVE A REPLY

Please enter your comment!
Please enter your name here