ສຄອ ສຳເລັດການຝຶກອົບຮົມວຽກງານໄອທີ ກ່ຽວກັບການນໍາໃຊ້ໂປຼແກຼມ ຈັດເກັບເອກະ ສານ, ໂປຼແກຼມຄຸ້ມຄອງຖານຂໍ້ມູນບ້ານ, ການສ້າງ, ຄຸ້ມຄອງ ແລະ ພັດທະນາເວັບໄຊ.

0
843

ໃນລະຫວ່າງວັນທີ 7-11  ທັນວາ 2017,   ສະຖາບັນ ເຕັກໂນໂລຊີ ຄອມພິວເຕີ ແລະ ເອເລັກໂຕຼນິກ, ກະຊວງ ວິທະຍາສາດ ແລະ ເຕັກໂນ ໂລຊີ(ກວຕ) ຮ່ວມກັບເມືອງພູຄູນ, ແຂວງຫຼວງພະບາງໄດ້ຈັດກອງປະ ຊຸມຝຶກອົບຮົມ ວຽກງານໄອທີ ກ່ຽວກັບການນໍາໃຊ້ໂປຼແກຼມ “ຈັດເກັບ ເອກະສານ ຂາອອກ-ຂາເຂົ້າ ແບບເອເລັກໂຕຼນິກ, ໂປຼແກຼມຄຸ້ມຄອງຖານ ຂໍ້ມູນບ້ານ, ການສ້າງ, ຄຸ້ມຄອງ ແລະ ພັດທະນາເວັບໄຊ” ໂດຍໃຫ້ກຽດເປັນປະທານຂອງທ່ານ ປອ ຈັນແສງ ພິມມະວົງ ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ທ່ານ ວຽງທອງ ຫັດສະຈັນ ເຈົ້າເມືອງ ພູຄູນ.

ກອງປະຊຸມຝຶກອົບຮົມດັ່ງກ່າວມີຈຸດປະສົງເພື່ອຍົກລະດັບຄວາມຮູ້ໃຫ້ພະນັກງານວິຊາການຂັ້ນທ້ອງຖິ່ນຮັບຮູ້ວຽກງານ ເຕັກໂນໂລຊີ ຄອມພິວເຕີ ແລະ ເອເລັກໂຕຼນິກ, ໂດຍສະເພາະແມ່ນກ່ຽວກັບ ການຄຸ້ມຄອງ ແລະ ນຳໃຊ້ໂປຼແກຼມ ຄຸ້ມຄອງຖານຂໍ້ມູນບ້ານ, ໂປຼແກຼມຈັດເກັບເອກະສານ ຂາອອກ-ຂາເຂົ້າ, ການສ້າງ, ຄຸ້ມຄອງ ແລະ ພັດທະນາເວັບໄຊ ເພື່ອເປັນເຄື່ອງມືໃນການຮັບໃຊ້ວຽກງານໃຫ້ແກ່ພາກສ່ວນດັ່ງກ່າວ, ພ້ອມກັນນັ້ນຍັງເປັນການເສີມສ້າງຄວາມເຂັ້ມແຂງ ຄວາມຮູ້ວິຊາການອີກດ້ວຍ.

ທ່ານ ປອ ຈັນແສງ ພິມມະວົງ, ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ໄດ້ໃຫ້ກຽດຂື້ນກ່າວ ເປີດກອງປະຊຸມຝຶກອົບຮົມໃນຄັ້ງນີ້ ຊື່ງມີເນື້ອໃນບາງຕອນວ່າ   ໂດຍອີງໃສ່ຄວາມຮຽກຮ້ອງຕ້ອງການ ໃນການພັດທະນາ ບຸກຂະລະກອນ ຮັບຜິດຊອບວຽກງານ IT ຂອງກະຊວງ ວິທະຍາສາດ ແລະ ເຕັກໂນໂລຊີ ແລະ ທີ່ຢູ່ພະແນກ ວິທະຍາສາດ ແລະ ເຕັກໂນໂລຊີແຂວງ, ເພື່ອເສີມຂະຫຍາຍຄວາມຮູ້ຄວາມສາມາດ ໃນການປະກອບສ່ວນວຽກງານ ແລະ ບັນລຸເປົ້າໝາຍທີ່ວາງໄວ້ ຢ່າງມີປະສິດທິພາບ, ແນ່ໃສ່ ເພື່ອຊຸກຍູ້ ສົ່ງເສີມການເຂົ້າຮ່ວມຂອງແຂວງ ໃຫ້ດຳເນີນໄປຢ່າງຕັ້ງໜ້າ ແລະ ມີປະສິດທິຜົນ ໃນການສ້າງແຜນໃນຫົວໜ່ວຍຍຸດທະສາດ, ສະນັ້ນ ຈື່ງໄດ້ເຊື້ອເຊີນເອົາບັນດາທ່ານ ນັກສຳມະນາກອນ, ໄດ້ມີໂອກາດມາເຂົ້າຮ່ວມການຝຶກອົບຮົມໃນຄັ້ງນີ້, ຊຶ່ງໃນການຝຶກອົບຮົມຄັ້ງນີ້ຈະປະກອບມີ ບັນດາໂປຼແກັມຕ່າງເຊັ່ນ: ໂປຼແກຼມຄຸ້ມຄອງ ເອກະສານ ຂາເຂົ້າ-ຂາອອກ, ໂປຼແກຼມລົງທະບຽນພະນັກງານ, ໂປຼແກຼມ ປຶ້ມແບບເອເລັກໂຕຼນິກ, ເພື່ອຊ່ວຍເຂົ້າໃນ ວຽກງານ ການຄຸ້ມຄອງ​ຖານຂໍ້ມູນບ້ານ ແລະ ສ້າງເວັບໄຊ ຂອງເມືອງເພື່ອເປັນຕົວແບບໃນການນຳໃຊ້ລະບົບໄອທີ ເຂົ້າຊ່ວຍໃນການໂຄສະນາເຜີຍແຜ່ແຫຼ່ງທ່ອງທ່ຽວຂອງເມືອງ ແລະ ເພື່ອເປັນການກະກຽມຄວາມພ້ອມ ໃສ່ປີທ່ອງທ່ຽວ ລາວ 2018 ນີ້ອີກດ້ວຍ.

ທ່ານຍັງຮຽກຮ້ອງມາຍັງບັນດາຜູ້ເຂົ້າຮ່ວມຝຶກອົບຮົມໃນຄັ້ງນີ້ນັບທັງນັກວິທະຍາກອນໃຫ້ເອົາໃຈໃສ່ຖ່າຍທອດສິດສອນ ແລະ ຖ້າຫາກວ່າມີບັນຫາຫຍັງທີຕ້ອງການຖາມ ຫຼື ນຳສະເໜີ, ກໍ່ໃຫ້ມີການແລກປ່ຽນບົດຮຽນ ຄຳຄິດຄຳເຫັນຮ່ວມກັນ, ເພື່ອວ່າເຮັດແນວໃດໃຫ້ການຝຶກອົບຮົມນີ້ມີຄວາມເຂົ້າໃຈ ແລະ ສາມາດຮຽນຮູ້ນຳກັນໄດ້ ຢ່າງມີບັນຍາກາດອັນຄຶກຄື້ນ.

ທ່ານກ່າວຕື່ມວ່າ :ນອກຈາກນີ້ແລ້ວ ເພື່ອປະກອບສ່ວນໃຫ້ວຽກງານດັ່ງກ່າວໃຫ້ມີປະສິດທິພາບ ປະສິດທິຜົນ ຂ້າພະເຈົ້າ ຈຶ່ງໄດ້ປະກອບສ່ວນມອບເຄື່ອງອຸປະກອນຈຳນວນໜຶ່ງ ໃຫ້ແກ່ຫ້ອງການເມືອງພູຄູນ ເພື່ອປະກອບ ສ່ວນນຳໃຊ້ ເຂົ້າໃນວຽກງານຕົວຈິ່ງ. ຊຶ່ງລວມມູນຄ່າໂປຼແກຼມ ແລະ ອຸປະກອນທັງໝົດແມ່ນມີ ມູນຄ່າລວມ 35 ລ້ານກີບ. ນຳມາມອບໃຫ້ໃນຄັ້ງນີ້ດ້ວຍ.

ຊື່ງຖືວ່າບັນດາໂປຼແກຼມຕ່າງໆນັ້ນແມ່ນມີຄວາມສຳຄັນໃນການເຮັດວຽກໂຕຈິງ ຂອງຂະແໜງການຕ່າງໆ ຫຼາຍສົມຄວນ ແລະ ຂ້າພະເຈົ້າຫວັງຢ່າງຫຍິງວ່າ ບົດຮຽນ ທີ່ຈະນຳມາເຜີຍແຜ່ນີ້ ຈະເປັນປະໂຫຍດ ຕໍ່ການນຳໃຊ້ເຂົ້າໃນວຽກງານ ຂອງບັນດາທ່ານ ໄດ້ເປັນຢ່າງດີ ແລະ ສຸດທ້າຍນີ້ ຂ້າພະເຈົ້າ ຂໍກ່າວເປີດພິທີ ຈັດຝຶກອົບຮົມ ຢ່າງເປັນທາງການ.

ໃນໂອກາດເປີດກອງປະຊຸມໃນຄັ້ງນີ້ ທ່ານ ປອ ຈັນແສງ ພິມມະວົງ ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ. ໄດ້ມອບຄອມພິວເຕີ ຈຳນວນ 1 ຊຸດ ແລະ ເຄື່ອງບັນທືກການເຂົ້າ-ອອກ ຫ້ອງການ ດ້ວຍ ການສະແກນລາຍນິ້ວມື ຈຳນວນ 1 ເຄື່ອງ ໃຫ້ແກ່ເມືອງພູຄຸນ ເພື່ອນຳໃຊ້ເຂົ້າໃນວຽກງານ.

ເຂົ້າຮ່ວມຝຶກອົບຮົມໃນຄັ້ງນີ້ ປະກອບດ້ວຍນັກວິທະຍາກອນທີ່ມາຈາກຫ້ອງການອ້ອມຂ້າງເມືອງ, ກອງພັນ 413, ພະແນກວິທະຍາສາດ ແລະ ເຕັກໂນໂລຊີ ແຂວງຫຼວງພະບາງ ລວມທັງໝົດ 76 ສະຫາຍ, ຍິງ 25 ສະຫາຍ.

 

 

LEAVE A REPLY

Please enter your comment!
Please enter your name here