ຍ່າງເພື່ອສຸຂະພາບ ຂໍ່ານັບຮັບຕ້ອນວັນສໍາຄັນ ຕ່າງໆ

0
359

ໃນຕອນເຊົ້າຂອງວັນທີ 15 ຕຸລາ 2017, ກະຊວງ ວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດກິດຈະ ກໍາຍ່າງເພື່ອສຸຂະພາບ ຂື້ນຢູ່ປະຕູໄຊທີ່ມີໄລຍະທາງປະຕູໄຊ-ຫໍຄໍາ-ປະຕູໄຊ ນະຄອນຫຼວງວຽງຈັນ ເພື່ອຂໍ່ານັບຮັບຕ້ອນ ແລະ ສະເຫຼີມສະຫຼອງ ວັນທີ 12 ຕຸລາ ຊຶ່ງເປັນວັນປະກາດເອກະລາດ, ວັນວິທະຍາສາດແຫ່ງຊາດ ແລະ ວັນສ້າງ ຕັ້ງອົງການມາດຕະຖານສາກົນ 14 ຕຸລາ ຄົບຮອບ 70 ປີ ໂດຍການໃຫ້ກຽດເຂົ້າຮ່ວມການຍ່າງຄັ້ງນີ້ ມີທ່ານ ບັນ ດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກວຕ, ບັນດາທ່ານ ຮອງລັດຖະມົນຕີ.

ທ່ານ ລັດຖະມົນຕີ ກວຕ ໄດ້ກ່າວເຖິງຈຸດປະສົງຂອງການຈັດກິດຈະກຳໃນຄັ້ງນີ້ ກໍເພື່ອໃຫ້ເຫັນເຖິງ ຫລາຍວຽກງານທີ່ເປັນເສົາຄໍ້າໃຫ້ແກ່ວຽກງານວິທະຍາສາດ ເຊັ່ນ: ວຽກງານມາດຕະຖານທີ່ ສປປ ລາວ ພ້ອມກັບ ບັນດາປະເທດສະມາຊິກອົງການມາດຕະຖານສາກົນ (ISO) ໄດ້ຈັດການເຫຼີມສະຫຼອງວັນດັ່ງກ່າວໃນທົ່ວໂລກ ພາຍໃຕ້ຄຳຂວັນໃນປີ 2017 ນີ້ທີ່ອົງການມາດຕະຖານສາກົນວາງອອກຄື: “ມາດຕະຖານ ເຮັດໃຫ້ຕົວເມືອງມີສະ ເຫນ່ເພີ່ມຂຶ້ນ (Standards make cities smarter)” ຊຶ່ງສະແດງໃຫ້ເຫັນຄວາມສຳຄັນ ຂອງວຽກງານມາດ ຕະຖານຕໍ່ກັບການພັດທະນາເສດຖະກິດ-ສັງຄົມ ແລະ ຢັ້ງຢືນຄຸນນະພາບໃຫ້ຜູ້ຊົມໃຊ້ສາມາດເຊື່ອຖືໄດ້.

ທ່ານ ກ່າວວ່າ: ເນື່ອງໃນວັນມາດຕະຖານໂລກ ໄດ້ເນັ້ນໃຫ້ເຫັນເຖິງບົດບາດ ແລະ ຄວາມສຳຄັນຂອງການເຄື່ອນໄຫວວຽກງານມາດຕະຖານ ໃນການເຊື່ອມໂຍງ ເຂົ້າເປັນສະມາຊິກຂອງປະຊາຄົມອາຊຽນ, ອົງການການຄ້າໂລກ ແລະ ການຮ່ວມມືໃນເວທີສາກົນ, ເພື່ອສ້າງຈິດສຳນຶກໃຫ້ແກ່ຜູ້ສ້າງນິຕິກຳກ່ຽວກັບມາດຕະຖານ ແລະ ຄຸນ ນະພາບ, ຜູ້ສ້າງລະບຽບການ ແລະ ຄຸ້ມຄອງມາດຕະຖານ, ຜູ້ປະກອບການລົງທຶນ, ນັກທຸລະກິດ, ຜູ້ຜະລິດ ແລະ ຜູ້ຊົມໃຊ້ ເຂົ້າໃຈຢ່າງເລິກຊຶ່ງ ກ່ຽວກັບບົດບາດ ແລະ ຄວາມສໍາຄັນ ຂອງວຽກງານມາດຕະຖານຕໍ່ການພັດທະນາເສດຖະກິດ-ສັງຄົມ ໃນລະດັບຊາດ, ພາກພື້ນ ແລະ ສາກົນ.

ທ່ານ ກ່າວຕື່ມວ່າ: ໃນໄລຍະຜ່ານມາ, ພັກ ແລະ ລັດຖະບານ ໄດ້ເອົາໃຈໃສ່ຕໍ່ການພັດທະນາວຽກງານວິທະຍາສາດ ແລະ ເຕັກໂນໂລຊີ ຂອງປະເທດເຮົາຢ່າງຕັ້ງ ໜ້າ ຊຶ່ງສະແດງອອກໃນແນວທາງນະໂຍບາຍຂອງພັກ, ບັນດາກົດໝາຍ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະນັ້ນ ໄດ້ເລັ່ງໃສ່ການພັດທະນາ ຊັບພະຍາກອນມະນຸດ ແລະ ການສ້າງພື້ນຖານໂຄງລ່າງ ສຳລັບການຄົ້ນຄວ້າ-ພັດທະນາ ແລະ ນຳໃຊ້ຄວາມກ້າວໜ້າທາງວິທະຍາສາດ ແລະ ເຕັກໂນໂລຊີ ເພື່ອຮັບໃຊ້ການ ພັດທະນາ ຢູ່ປະເທດເຮົາ.

ເຂົ້າຮ່ວມກິດຈະກຳການຍ່າງເພື່ອສຸຂະພາບໃນຄັ້ງນີ້ ມີຄະນະກົມ, ສະຖາບັນ, ພະນັກງານພາຍໃນ ກວຕ, ນັກຮຽນ, ນັກສຶກສາ ແລະ ພາກສ່ວນຕ່າງໆ ຈໍານວນ 500 ກວ່າຄົນ.

ບົດຂ່າວ: ນ. ທັດສະນີ ພົງບັນດິດ

LEAVE A REPLY

Please enter your comment!
Please enter your name here