ພິທີເຊັນບົດບັນທຶກຄວາມເຂົ້າໃຈການຄົ້ນຄວ້າ ແລະ ພັດທະນາ ເຕັກໂນໂລຊີ ລະບົບຖານຂໍ້ມູນໃຫຍ່ BIG DATA ເພື່ອຄຸ້ມຄອງແຮງງານ

0
102

ຕອນແລງຂອງວັນທີ 10 ທັນວາ 2019 ທີ່ໂຮງແຮມ ຄຣາວພລາຊາ, ນະຄອນຫຼວງວຽງຈັນ, ສະຖາບັນເຕັກໂນໂລຊີຄອມພິວເຕີ ແລະ ເອເລັກໂຕຣນິກ, ກະຊວງວິທະຍາສາດ ແລະ ເຕັກໂນໂລຊີ (ກວຕ) ຮ່ວມກັບ ບໍລິສັດ POSCO INTERNATIONAL Corporation ແລະ ບໍລິສັດ Penta Gate ໄດ້ເຊັນບົດບັນທຶກຄວາມເຂົ້າໃຈວ່າດ້ວຍການຄົ້ນຄວ້າ ແລະ ພັດທະນາ ເຕັກໂນໂລຊີ ລະບົບຖານຂໍ້ມູນໃຫຍ່ BIG DATA ເພື່ອຄຸ້ມຄອງແຮງງານ.
ໃນພິທີຄັ້ງນີ້, ທ່ານ ປອ. ຄຳເພັດ ວົງດາລາ, ຫົວໜ້າກົມແຜນການ ແລະ ຮ່ວມມື, ກວຕ ກ່າວເຖິງຈຸດປະສົງຂອງການເຊັນບົດບັນທຶກດັ່ງກ່າວວ່າ: ແມ່ນເພື່ອຮ່ວມມືກັນສຶກສາຄວາມເປັນໄປໄດ້ໃນການຄົ້ນຄວ້າ ແລະ ພັດທະນາລະບົບເຕັກໂນໂລຊີຖານຂໍ້ມູນໃຫຍ່ BIG DATA ເພື່ອຊ່ວຍໃນການຄຸ້ມຄອງແຮງງານຕ່າງປະເທດທີ່ມາເຮັດວຽກຢູ່ ສປປ ລາວ ແລະ ຄົນລາວທີ່ໄປເຮັດວຽກຢູ່ຕ່າງປະເທດ.
ທ່ານກ່າວວ່າ: ອີງຕາມຄວາມຮຽກຮ້ອງຕ້ອງການໃນການພັດທະນາເສດຖະກິດສັງຄົມຂອງ ສປປ ລາວ ຈຳເປັນຕ້ອງນຳໃຊ້ ແລະ ພັດທະນາເຕັກໂນໂລຊີ ເພື່ອຍົກສູງລະດັບຄວາມຮູ້ ແລະ ຄວາມສາມາດໃນການບໍລິຫານວຽກງານໃຫ້ນັບມື້ນັບສູງຂຶ້ນ. ປັດຈຸບັນ, ວຽກງານວິທະຍາສາດ ແລະ ເຕັກໂນໂລຊີນັບມື້ນັບພັດທະນາກ້າວໄກ ໂດຍສະເພາະແມ່ນເຕັກໂນໂລຊີທີ່ກ່ຽວກັບຖານຂໍ້ມູນໃຫຍ່ (BIG DATA), ສະນັ້ນ ຈຶ່ງເປັນໂອກາດທີ່ດີ ລະຫວ່າງ ກວຕ ແລະ ກຸ່ມບໍລິສັດ ຈະໄດ້ຮ່ວມກັນພັດທະນາ ແລະ ເຮັດການສຶກສາຄົ້ນຄວ້າການນຳໃຊ້ເຕັກໂນໂລຊີ DATA SCIENCE ແລະ BIG DATA ເພື່ອຊ່ວຍໃນການຄຸ້ມຄອງແຮງງານຕ່າງປະເທດທີ່ມາເຮັດວຽກຢູ່ ສປປ ລາວ ແລະ ຄົນລາວທີ່ໄປໃຊ້ແຮງງານຢູ່ຕ່າງປະເທດ.
ທ່ານ ກ່າວຕື່ມວ່າ: ການເຊັນບົດບັນທຶກຄວາມເຂົ້າໃຈໃນຄັ້ງນີ້ ມີຄວາມສໍາຄັນເປັນຢ່າງຢິ່ງ ເພື່ອຈະຮ່ວມກັນຄົ້ນຄວ້າດ້ານເຕັກໂນໂລຊີໃໝ່ໆ, ຍົກລະດັບຄວາມຮູ້ດ້ານວິຊາການໃຫ້ແກ່ພະນັກງານວິຊາການຂອງ ກວຕ. ອີກດ້ານໜຶ່ງກໍເພື່ອເປັນການຮ່ວມກັນພັດທະນາເສດຖະກິດ-ສັງຄົມ ລະຫວ່າງ ສອງຝ່າຍ, ເວົ້າສະເພາະແມ່ນການຍົກສູງການນໍາໃຊ້ວິທະຍາສາດ ແລະ ເຕັກໂນໂລຊີ ເຂົ້າໃນການສົ່ງເສີມການພັດທະນາເສດຖະກິດຂອງຊາດ, ການແລກປ່ຽນຂໍ້ມູນຂ່າວສານ ແລະ ຖ່າຍທອດຄວາມຮູ້ດ້ານ ເຕັກໂນໂລຊີ ທີ່ທັນສະໄໝຂອງສອງຝ່າຍໃນອະນາຄົດ.
ຜູ້ລົງນາມໃນບົດບັນທຶກດັ່ງກ່າວ ມີທ່ານ ປອ. ຄຳເພັດ ວົງດາລາ, ຫົວໜ້າກົມແຜນການ ແລະ ຮ່ວມມື; ທ່ານ Dae-Young KIM, ປະທານບໍລິສັດ POSCO INTERNATIONAL CORPORATION; ທ່ານ ວິລະສັກ ອິນທະປະຖາ, ຫົວໜ້າສະຖາບັນເຕັກໂນໂລຊີຄອມພິວເຕີ ແລະ ເອເລັກໂຕຣນິກ ແລະ ທ່ານ Jeong-Hoon OH, ປະທານ ບໍລິສັດPENTAGATE CO., LTD.
ພິທີລົງນາມຄັ້ງນີ້ ໄດ້ຮັບກຽດການເຂົ້າຮ່ວມເປັນສັກຂີພິຍານຂອງ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ ກວຕ, ບັນດາທ່ານ ຮອງລັດຖະມົນຕີ, ຫົວໜ້າຫ້ອງການ, ກົມ, ສະຖາບັນ, ແຂກຈາກພາກ ສ່ວນຕ່າງໆ ແລະ ພະນັກງານວິຊາການພາຍໃນ ກວຕ

  

LEAVE A REPLY

Please enter your comment!
Please enter your name here