ສະພາບັນດິດວິທະຍາສາດ ແລະ ເຕັກໂນໂລຊີ ສສ ຫວຽດນາມ ຢ້ຽມຢາມ ແລະ ເຮັດວຽກ ນຳ ສະພາວິທະຍາສາດແຫ່ງຊາດ ສປປ ລາວ

0
316

ໃນລະຫວ່າງວັນທີ 22-25 ສິງຫາ 2017 ທີ່ຜ່ານມານີ້, ຄະນະສະພາວິທະຍາສາດ, ຂະແໜງການດ້ານ ທໍລະນີວິທະຍາ, ສະພາບັນດິດວິທະຍາສາດ ແລະ ເຕັກໂນໂລຊີ ສສ ຫວຽດນາມ ໄດ້ມາຢ້ຽມຢາມ ແລະ ຮ່ວມເຮັດ ວຽກກັບສະພາວິທະຍາສາດແຫ່ງຊາດ ສປປ ລາວ.ຄະນະດັ່ງກ່າວ ນຳໂດຍ ທ່ານ ຮສ. ປອ. ເຈິ່ນ ຕັວນ ແອ໋ງ (Trần Tuấn Anh), ຫົວໜ້າສະຖາບັນ ທໍລະນີສາດ, ຈາກສະພາບັນດິດວິທະຍາສາດ ແລະ ເຕັກໂນໂລຊີ ສສ ຫວຽດນາມ ພ້ອມດ້ວຍຄະນະ ຈຳນວນ 11 ທ່ານ.

ຄະນະ ໄດ້ຮັບການຕ້ອນຮັບ ແລະ ຮ່ວມເຮັດວຽກກັບສະພາວິທະຍາສາດແຫ່ງຊາດ ສປປ ລາວ ໂດຍມີ ທ່ານ ນ. ແກ້ວໄພວັນ ດວງສະຫັວນ, ຫົວຫນ້າຫ້ອງການສະພາວິທະຍາສາດ ແຫ່ງຊາດ ແລະ ທ່ານ ພິມພາ ອຸດທະຈັກ, ຮັກສາຫົວໜ້າກົມແຜນການ ແລະ ຮ່ວມມື, ກະຊວງວິທະຍາສາດ ແລະ ເຕັກໂນໂລຊີ (ກວຕ) ພ້ອມດ້ວຍຄະນະ.

ຈຸດປະສົງຂອງການມາຄັ້ງນີ້ ແມ່ນເພື່ອລາຍງານ ແລະ ປຶກສາຫາລືກ່ຽວກັບຄວາມຄືບໜ້າໃນການຈັດຕັ້ງປະຕິບັດ “ໂຄງການ ເພີ່ມທະວີຄວາມອາດສາມາດ ໃນການຄົ້ນຄວ້າວິທະຍາສາດ ແລະ ເຕັກໂນໂລຊີ ໃຫ້ແກ່ສະພາວິທະຍາສາດແຫ່ງຊາດ ສປປ ລາວ”. ນອກຈາກນີ້້ ກໍເພື່ອຜັນຂະຫຍາຍວຽກງານການຮ່ວມມື ດ້ານການ ສ້າງຊັບພະຍາກອນມະນຸດ ແລະ ແລກປ່ຽນຂໍ້ມູນຂ່າວສານດ້ານທໍລະນີສາດ.

ໃນໄລຍະຢູ່ຢ້ຽມຢາມ ແລະ ເຮັດວຽກຄັ້ງນີ້, ຄະນະຍັງໄດ້ເຂົ້າຢ້ຽມຂ່ຳນັບ ແລະ ພົບປະ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີ ກວຕ, ປະທານສະພາວິທະຍາສາດແຫ່ງຊາດຊຶ່ງທ່ານ ໄດ້ກ່າວຍິນດີຕ້ອນຮັບ ແລະ ຂອບໃຈຕໍ່ຄະນະຜູ້ແທນ ຫວຽດນາມທີ່ມາຢ້ຽມຢາມ ແລະ ຜັນຂະ ຫຍາຍການຮ່ວມມື ລະຫວ່າງສອງຝ່າຍ. ທ່ານ ລມຕ ໄດ້ກ່າວເຖິງການຜັນຂະຫຍາຍວຽກງານດ້ານການສ້າງ ຊັບພະຍາກອນມະນຸດທາງດ້ານຂົງເຂດວຽກງານທໍລະນີ ສາດວ່າ ແມ່ນມີຄວາມສຳຄັນຕໍ່ການພັດທະນາເສດຖະກິດ-ສັງຄົມຂອງ ສປປ ລາວ.

ຕອນເຊົ້າຂອງວັນທີ 23 ສິງຫາ 2017, ຄະນະວິຊາການຂອງທັງສອງຝ່າຍ ໄດ້ຈັດກອງປະຊຸມປຶກສາຫາລືລາຍງານຄວາມຄືບໜ້າໃນການຈັດຕັ້ງປະຕິບັດໂຄງ ການຕາມພາລະບົດບາດຄວາມຮັບຜິດຊອບຂອງຕົນ. ໂຄງການດັ່ງກ່າວ ປະກອບມີ 3 ໜ້າວຽກຄື: ການປະກອບອຸປະກອນຫ້ອງທົດລອງ; ພັດທະນາຊັບພະຍາກອນ ມະນຸດ ແລະ ສ້າງແຜນພັດທະນາສະພາບັນດິດວິທະຍາສາດ ແລະ ເຕັກໂນໂລຊີ ໃຫ້ແກ່ ສປປ ລາວ. ທັງສອງຝ່າຍ ຈະໄດ້ຮ່ວມກັນລົງເກັບກຳຂໍ້ມູນຕົວຈິງ ແລະ ສ້າງແຜນພັດທະນາວຽກງານດັ່ງກ່າວຂື້ນໃນຕໍ່ໜ້າ.

ວັນທີ 24 ສິງຫາ 2017, ຄະນະຜູ້ແທນຈາກ ສສ ຫວຽດນາມ ໄປຢ້ຽມຢາມ ແລະ ເຮັດວຽກກັບມະຫາວິທະຍາໄລແຫ່ງຊາດ ແລະ ໄດ້ຮັບຫ້ກຽດຕ້ອນ ຮັບໂດຍ ທ່ານ ຮສ. ປອ. ນາງ ສົມຈັນ ບຸນພັນມີ, ຮອງອະທິການບໍດີ ມະຫາວິທະຍາໄລແຫ່ງຊາດ ພ້ອມດ້ວຍຄະນະ. ເປົ້າໝາຍການມາຢ້ຽມຢາມ ແລະ ເຮັດວຽກຄັ້ງນີ້ ແມ່ນເພື່ອປຶກສາຫາລື ແລະ ຜັນຂະຫຍາຍການຮ່ວມມືກ່ຽວກັບການສ້າງຊັບພະຍາກອນມະນຸດດ້ານທໍລະນີວິທະຍາໃນລະດັບປະລິນຍາໂທ ແລະ ປະລິນຍາເອກ.

ນອກຈາກນີ້, ຄະນະ ຍັງໄດ້ໄປຮ່ວມເຮັດວຽກກັບ ກົມທໍລະນີສາດ ແລະ ແຮ່ທາດ, ກະຊວງພະລັງງານ ແລະ ບໍ່ແຮ່ ແລະ ໄດ້ຮັບກຽດຮັບຕ້ອນໂດຍ ທ່ານ ສຸບິນ ສີພັນດອນ, ຮອງຫົວຫນ້າກົມທໍລະນີ ແລະ ແຮ່ທາດ ພ້ອມດ້ວຍຄະນະ. ທັງສອງຝ່າຍ ໄດ້ແລກປ່ຽນຂໍ້ມູນຂ່າວສານ ແລະ ປຶກສາຫາລືການຮ່ວມມືຂົງເຂດວຽກ ງານທໍລະນີ ແລະ ແຮ່ທາດໃນອະນາຄົດ.

LEAVE A REPLY

Please enter your comment!
Please enter your name here