ຄະນະນຳ ກວຕ ຢ້ຽມຢາມພື້ນຖານການຜະລິດ ຢູ່ແຂວງຄຳມ່ວນ

0
616

ໃນຕອນແລງຂອງວັນທີ 12 ກັນຍາ 2017, ທ່ານ ຫຸມພັນ ອິນທະຣາດ, ຮອງລັດຖະມົນຕີ ກະຊວງວິທະ ຍາສາດແລະ ເຕັກໂນໂລຊີ (ກວຕ) ພ້ອມດ້ວຍຄະນະ ຢ້ຽມຢາມໂຮງສີເຂົ້າວານິດາ, ບ້ານເລົ່າໂພຄຳ, ເມືອງທ່າແຂກ, ແຂວງຄຳມ່ວນ, ເນື່ອງໃນໂອກາດທີ່ ທ່ານ ແລະ ຄະນະ ເດີນທາງໄປເຮັດວຽກ ແລະ ຢ້ຽມຢາມ ຢູ່ແຂວງດັ່ງກ່າວ.ໃນໂອກາດນີ້, ທ່ານ ເພັດສະໜອນ ບົວພັນທະວົງ, ອຳນວຍການໂຮງສີເຂົ້າວານິດາ ໄດ້ກ່າວຕ້ອນຮັບທ່ານຮອງລັດຖະມົນຕີກວຕ ແລະ ຄະນະ ທີ່ໄດ້ມາຢ້ຽມຢາມໂຮງສີເຂົ້າວານິດາໃນຄັ້ງນີ້. ທ່ານໄດ້ລາຍງານ ຄວາມເປັນມາໂດຍຫຍໍ້ຂອງໂຮງສີເຂົ້າວານິດາ ຕໍ່ທ່ານຮອງລັດຖະມົນຕີກວຕ ແລະ ຄະນະ ຊາບວ່າ: ໂຮງສີເຂົ້າ ວານິດາເປັນທຸລະກິດແບບຄອບຄົວ ມີຜະລິດຕະພັນຂອງໂຮງສີເຂົ້າວານີດາເຊັ່ນ: ຜະລິດຕະພັນເຂົ້າໜຽວ, ເຂົ້າ ຈ້າວທີ່ມີຄຸນນະພາບດີແລະ ມີກາໝາຍການຄ້າ “ຊ້າງຖືຮວງເຂົ້າ”. ຜະລິດຕະພັນຂອງໂຮງງານ ມີຫຼາຍປະເພດ ເຊັນ: 1 kg, 5 kg, 10 kg, 12 kg, 20 kg, 25 kg, 48 kg ແລະ 50 kg. ກຳລັງການຜະລິດຂອງໂຮງສີເຂົ້າ ວານິດາສາມາດຜະລິດເຂົ້າຄຸນນະພາບດີ 8 ໂຕນ. ສ່ວນເຫຼືອ ກໍແມ່ນປະເພດເຂົ້າທີ່ມີຄຸນນະພາບຫຼຸດລົງມາ ເຊັ່ນ: ເຂົ້າຫັກໃຫຍ່ 0,6 ໂຕນ, ເຂົ້າຫັກນ້ອຍ 1,4 ໂຕນ, ເຂົ້າປາຍ 0,08 ໂຕນ ແລະ ຮຳແປ້ງ 0,72 ໂຕນ. ໂຮງງານແຫ່ງນີ້ ໃຊ້ເວລາການຜະລິດທັງໝົດ 8 ຊົ່ງໂມງ/ມື້.

ເພື່ອເປັນການສົ່ງເສີມການປູກເຂົ້າເປັນສິນຄ້າ, ທາງໂຮງສີ ກໍໄດ້ສົ່ງເສີມຊາວນາຊຶ່ງມີ 15 ກຸ່ມບ້ານ, 4 ຕົວເມືອງເຊັ່ນ: ເມືອງທ່າແຂກ, ເມືອງໜອງບົກ, ເມືອງເຊບັງໄຟ ແລະ ເມືອງໄຊບູລີ ທັງໝົດຈໍານວນ 1.320 ຄອບຄົວ ທີ່ນຳໃຊ້ເນື້ອທີ່ການເພາະປູກ ທັງໝົດ 2.812,97 ເຮັກຕາ. ໂຮງສີ ຍັງໄດ້ຝຶກອົບຮົມຊາວ ກະສິກອນ ໃຫ້ນຳໃຊ້ວິທີການປູກເຂົ້າຕາມຫຼັກວິຊາການ, ນໍາໃຊ້ຝຸ່ນທີ່ບໍ່ເຮັດໃຫ້ສະພາບດິນເສື່ອມໂຊມ ແລະ ມອບແນວພັນທີ່ຕະຫຼາດຕ້ອງການໃຫ້ແກ່ຊາວນາ. ໂຮງສີ ໄດ້ເກັບຊື້ເຂົ້າເປື້ອກຈ້າວຈາກຊາວນາໃນປີ 2015 ຈຳນວນ 1.518 ໂຕນ, ປີ 2016 ຈຳນວນ 1.830 ໂຕນ ແລະ ໃນປີ 2017 ຈຳນວນ 930 ໂຕນ (ສະເພາະ 6 ເດືອນ).

ຕະຫຼາດຫຼັກຂອງໂຮງສີເຂົ້າວານິດາແມ່ນບັນດາແຂວງຕ່າງໆເຊັນ: ນະຄອນຫຼວງວຽງຈັນ, ແຂວງບໍລິຄຳໄຊ, ແຂວງຄຳມ່ວນ, ແຂວງສະຫວັນນະເຂດ, ແຂວງ ຈຳປາສັກ, ແຂວງສາລະວັນ, ແຂວງອັດຕະປື,ແຂວງເຊກອງ ແລະ ລູກຄ້າຫວຽດນາມຈຳນວນໜຶ່ງ. ໂຮງສີ ມີເປົ້າໝາຍຈະເພີ່ມຍອດຂາຍພາຍໃນປະເທດ ໃຫ້ໄດ້ເຖິງ 2.000 ໂຕນ/ປີ;ເປົ້າໝາຍການສົ່ງອອກຕ່າງປະເທດໃນອະນາຄົດປະມານ8.000 – 10.000 ໂຕນ/ປີ (ຕະຫຼາດອາຊຽນ, ອາຊີ ແລະ ອີຢູ).ໂຮງສີ ຍັງມີແຜນປັບປຸງທາງ ດ້ານມາດຕະຖານໃຫ້ດີຍິ່ງໆຂຶ້ນ. ທີ່ຜ່ານມາ, ໂຮງສີໄດ້ຮັບການຢັ້ງຢືນມາດຕະຖານ HACCP (Hazard Analysis Critical Control Point) ແລະ ໄດ້ຮັບການ ຢັ້ງຢືນມາດຕະຖານ ISO (InternationalOrcanization for Standardization).

ແຜນປັບປຸງ ແລະ ພັດທະນາພື້ນຖານໂຄງລ່າງຂອງໂຮງສີໃນຕໍ່ໜ້າ ຄື ເພີ່ມກຳລັງການຜະລິດ 5ໂຕນ/ຊົ່ວໂມງ, ສ້າງເຕົາອົບ, ສ້າງລານຕາກເຂົ້າ ແລະ ຂະຫຍາຍເນື້ອທີ່ການປູເຂົ້າຈາກ 2.812,97 ເຮັກຕາໃນປັດຈຸບັນ ເປັນ 5.000 ເຮັກຕາໃນຕໍ່ໜ້າ.

ຈາກນັ້ນ, ທ່ານຮອງລັດຖະມົນຕີ ກວຕ ແລະ ຄະນະ ໄດ້ຢ້ຽມຢາມໂຮງສີເຂົ້າຈັນທະວົງ ອີກດ້ວຍ.

LEAVE A REPLY

Please enter your comment!
Please enter your name here