ໂຄງການນ້ອງຢາກເປັນນັກວິທະຍາສາດ ຮ່ວມສ້າງກິດຈະກໍາ ກັບ ນ້ອງນ້ອຍເຍົາວະຊົນ

0
2351

ໂຄງການນ້ອງຢາກເປັນນັກວິທະຍາສາດ ເປັນໂຄງການໜຶ່ງທີ່ໄດ້ຮັບການອະນຸມັດຈາກ ກະຊວງວິທະຍາສາດ ແລະ ເຕັກໂນໂລຊີ (ກວຕ) ຊຶ່ງຈັດຕັ້ງປະຕິບັດໂດຍ ຫ້ອງການ ກະຊວງວິທະຍາສາດ ແລະ ເຕັກໂນໂລຊີ (ພະແນກຂ່າວສານ ແລະ ປະຊາສໍາພັນ) ໂດຍໄດ້ຮ່ວມກັບບັນດາກົມ, ສະຖາບັນທີ່ກ່ຽວຂ້ອງ ພາຍໃນ ກວຕ. ໂຄງການດັ່ງກ່າວ ມີຈຸດປະສົງເພື່ອໂຄສະນາເຜີຍແຜ່ ແລະ ປູກຈິດສໍານຶກ ທາງດ້ານວຽກງານວິທະຍາສາດ ແລະ ເຕັກໂນໂລຊີ ໃຫ້ແກ່ນ້ອງນ້ອຍເຍົາວະຊົນຂອງ ສປປ ລາວ ໃຫ້ມີແນວຄິດຈິນຕະນາການ, ມີຄວາມໄຝ່ຝັນທີ່ຈະເປັນນັກວິທະຍາສາດໃນອານະຄົດ ຊຶ່ງໄດ້ຮວບຮວມເອົາຜົນງານການຄົ້ນຄວ້າ, ວິໄຈ ແລະ ສາລະໜ້າຮູ້ທີ່ຕິດພັນກັບວຽກງານວິທະຍາສາດ ແລະ ເຕັກໂນໂລຊີ ເຊັ່ນ: ວຽກງານນິເວດວິທະຍາ, ດ້ານດາລາສາດ, ວິທະຍາສາດ, ເຕັກໂນໂລຊີ, ດິຈິຕ໋ອນ ແລະ ອື່ນໆ… ເພື່ອເຜີຍແຜ່ ແລະ ສ້າງກິດຈະກໍາ ຖາມ-ຕອບ ຮ່ວມກັບນ້ອງນ້ອຍເຍົາວະຊົນ.
ເພື່ອຈັດຕັ້ງຜັນຂະຫຍາຍ 6 ແຜນງານໃຫຍ່ຂອງກະຊວງວິທະຍາສາດ ແລະ ເຕັກໂນໂລຊີ ວາງອອກໃຫ້ປະກົດຜົນເປັນຈິງ ໂດຍສະເພາະແມ່ນວຽກງານໂຄສະນາເຜີຍແຜ່ ແລະ ປູກຈິດສໍານຶກ ໃຫ້ສັງຄົມໄດ້ຮັບຮູ້ ແລະ ເຂົ້າໃຈກ່ຽວກັບວຽກງານວິທະຍາສາດ ແລະ ເຕັກໂນໂລຊີ. ໂຄງການນ້ອງຢາກເປັນນັກວິທະຍາສາດ ໄດ້ເລີ່ມສ້າງກິດຈະກໍາຮ່ວມກັບນ້ອງນ້ອຍເຍົາວະຊົນຄັ້ງທໍາອິດ ໃນວັນທີ 9 ຕຸລາ 2019 ທີ່ຜ່ານມາ, ຢູ່ໂຮງຮຽນປະຖົມສົມບູນສຶກສາ ດາຣາພອນ ຊຶ່ງມີບັນດານັກວິທະຍາກອນ ຈາກ ໂຄງການນ້ອງຢາກເປັນນັກວິທະຍາສາດເຂົ້າຮ່ວມບັນຍາຍ ໂດຍໄດ້ສົມທົບກັບຜູ້ອໍານວຍການ ແລະ ຄູ-ອາຈານ ໂຮງຮຽນປະຖົມສົມບູນສຶກສາ ດາຣາພອນ ພ້ອມດ້ວຍນ້ອງນ້ອຍເຍົາວະຊົນ ຊັ້ນປະຖົມ (ປໍ 5) ເຂົ້າຮ່ວມທັງໝົດ 50 ກວ່າຄົນ.
ຜ່ານການເຮັດກິດຈະກໍາຂອງໂຄງການດັ່ງກ່າວເຫັນວ່າ ບັນດານ້ອງນ້ອຍເຍົາວະຊົນແມ່ນໃຫ້ຄວາມສົນໃຈຫຼາຍ ໂດຍສະເພາະແມ່ນການນໍາສະເໜີກ່ຽວກັບລະບົບນິເວດວິທະຍາ-ຊີວະນານາພັນ, ວຽກງານດາລາສາດ, ຂໍ້ດີຂໍ້ເສຍຂອງການໃຊ້ສື່ສັງຄົມອອນລາຍ ແລະ ການຮຽນຮູ້ປື້ມແບບເອເລັກໂຕຣນິກ (E-Book). ຊຶ່ງໄດ້ຮັບຟັງການບັນຍາຍ ແລະ ອະທິບາຍ ຈາກນັກວິທະຍາກອນຜູ້ມີປະສົບການ ພ້ອມດຽວກັນນັ້ນ, ນ້ອງນ້ອຍເຍົາວະຊົນຍັງໄດ້ລົງມືຈັດຕັ້ງປະຕິບັດຕົວຈິງອີກດ້ວຍ.
ທ່ານ ນາງ ດວງສະໝອນ ອິນທະວົງ, ອໍານວຍການໂຮງຮຽນປະຖົມສົມບູນສຶກສາ ດາຣາພອນ ໄດ້ໃຫ້ສໍາພາດວ່າ: ການຈັດກິດຈະກໍາ “ໂຄງການນ້ອງຢາກເປັນນັກວິທະຍາສາດ” ແມ່ນມີຄວາມສໍາຄັນຫຼາຍ ເພາະມັນຈະເຮັດໃຫ້ນັກຮຽນໄດ້ຮຽນຮູ້, ໄດ້ສ້າງຄວາມເຂົ້າໃຈກ່ຽວກັບວຽກງານວິທະຍາສາດ ແລະ ເຕັກໂນໂລຊີ ຫຼາຍຂຶ້ນ ທັງເປັນການສ້າງໃຫ້ນັກຮຽນມີຄວາມຄິດຄວາມຝັນທີ່ຈະກ້າວເປັນນັກວິທະຍາສາດໃນອານະຄົດ. ທ່ານກ່າວຕື່ມວ່າ: ຢາກໃຫ້ໂຄງການດັ່ງກ່າວສ້າງກິດຈະກໍາແບບນີ້ຮ່ວມກັບບັນດາໂຮງຮຽນຕ່າງໆ ໂດຍສະເພາະແມ່ນຊັ້ນປະຖົມ ຊຶ່ງຢູ່ໃນໄວທີ່ກໍາລັງຮຽນຮູ້, ຢູ່ໃນໄວທີ່ກໍາລັງມີຄວາມໄຝ່ຝັນໃນການສຶກສາຂອງເຂົາເຈົ້າ.
ທ້າວ ໄຊສະຫວັດ ນັກຮຽນຊັ້ນ ປໍ 5 ໄດ້ກ່າວວ່າ: ນ້ອງມີຄວາມດີໃຈຫຼາຍທີ່ໂຄງການນ້ອງຢາກເປັນນັກວິທະຍາສາດ ມາເຮັດກິດຈະກໍາຢູ່ໂຮງຮຽນພວກນ້ອງ ເຮັດໃຫ້ນ້ອງໄດ້ຮຽນຮູ້ສິ່ງໃໝ່ໆຫຼາຍຂຶ້ນ. ນ້ອງເອງໄດ້ຮ່ວມກິດຈະກໍາຖາມ-ຕອບ ທາງດ້ານລະບົບນິເວດວິທະຍາ, ດາລາສາດ ແລະ ຂໍ້ດີຂໍ້ເສຍຂອງການນໍາໃຊ້ສື່ສັງຄົມອອນລາຍ ທັງໄດ້ຄວາມຮູ້ ແລະ ທັງໄດ້ຂອງລາງວັນນໍາອີກ.
ທ່ານ ບິນລີ້ ສີສຸລາດ, ຜູ້ຮັບຜິດຊອບການຈັດກິດຈະກໍາ ໂຄງການນ້ອງຢາກເປັນນັກວິທະຍາສາດ ຄັ້ງນີ້ກ່າວວ່າ: ໂຄງການດັ່ງກ່າວເປັນໂຄງການນ້ອຍໆທີ່ແນໃສ່ຊຸກຍູ້ສົ່ງເສີມແນວຄິດຈິນຕະນາການຂອງນ້ອງນັກຮຽນໃຫ້ມີຄວາມໄຝ່ຝັນທີ່ຈະກ້າວເປັນນັກວິທະຍາສາດ ຊຶ່ງໂຄງການນີ້ແມ່ນໄດ້ຮັບການຊີ້ນໍາ-ນໍາພາ ແລະ ຊຸກຍູ້ສົ່ງເສີມຂອງຄະນະພັກຄະນະນໍາກະຊວງວິທະຍາສາດ ແລະ ເຕັກໂນໂລຊີ. ທ່ານກ່າວຕື່ມວ່າ: ໂຄງການດັ່ງກ່າວຍັງມີແຜນຈະສືບຕໍ່ສ້າງກິດຈະກໍາແບບນີ້ຢູ່ບັນດາໂຮງຮຽນຕ່າງໆບໍ່ສະເພາະແຕ່ໃນນະຄອນຫຼວງວຽງຈັນ ໃນຕໍ່ໜ້າຍັງມີເປົ້າໝາຍທີ່ຈະຈັດກິດຈະກໍາຢູ່ບັນດາໂຮງຮຽນຕ່າງໆໃນທົ່ວປະເທດ. ຜ່ານການຈັດຕັ້ງປະຕິບັດຈັດກິດຈະກໍາຂອງໂຄງການໃນຄັ້ງທໍາອິດນີ້ເຫັນໄດ້ວ່າ ໂຄງການດັ່ງກ່າວແມ່ນເຮັດໃຫ້ນ້ອງນ້ອຍເຍົາວະຊົນມີຄວາມສົນໃຈກ່ຽວກັບວຽກງານວິທະຍາສາດ ແລະ ເຕັກໂນໂລຊີ ຫຼາຍຂຶ້ນ ໂດຍອີງໃສ່ການມີສ່ວນຮ່ວມຂອງແຕ່ລະກິດຈະກໍາ, ການຕັ້ງຄໍາຖາມຂອງນັກຮຽນ ແລະ ຄວາມຕັ້ງໃຈຂອງນ້ອງນ້ອຍນັກຮຽນ ເຮັດໃຫ້ມີບັນຍາກາດຄຶກຄື້ນ ແລະ ເຕັມໄປດ້ວຍຮອຍຍິ້ມອັນແສນປະທັບໃຈ.
ໃນຕອນທ້າຍຂອງກິດຈະກໍາ ຍັງໄດ້ມອບໃບຢັ້ງຢືນການເຂົ້າຮ່ວມກິດຈະກໍາຂອງ “ໂຄງການນ້ອງຢາກເປັນນັກວິທະຍາສາດ” ໃຫ້ແກ່ໂຮງຮຽນປະຖົມສົມບູນສຶກສາ ດາຣາພອນ ຊຶ່ງມອບໂດຍ ທ່ານ ບິນລີ້ ສີສຸລາດ, ຮອງຫົວໜ້າພະແນກຂ່າວສານ ແລະ ປະຊາສໍາພັນ, ຫ້ອງການ ກະຊວງວິທະຍາສາດ ແລະ ເຕັກໂນໂລຊີ ແລະ ຮັບໂດຍ ທ່ານ ນາງ ດວງສະໝອນ ອິນທະວົງ, ອໍານວຍການໂຮງຮຽນປະຖົມສົມບູນສຶກສາ ດາຣາພອນ ຊຶ່ງມີນັກວິທະຍາກອນຈາກ ກົມເຕັກໂນໂລຊີດິຈິຕ໋ອນ, ສະຖາບັນນິເວດວິທະຍາ ແລະ ເຕັກໂນໂລຊີ ຊີວະພາບ, ສະຖາບັນຄອມພິວເຕີ ແລະ ເອເລັກໂຕຣນິກ ແລະ ຫ້ອງການ ສະພາວິທະຍາສາດ ແຫ່ງຊາດ ຮ່ວມເປັນສັກຂີພິຍານ.

 

LEAVE A REPLY

Please enter your comment!
Please enter your name here