ລະນຶກ ວັນສ້າງຕັ້ງສະຫະພັນນັກຮົບເກົ່າ ແຫ່ງ ຊາດລາວ ຄົບຮອບ 15 ປີ ແລະ ວັນຊາດ ສສ ຫວຽດນາມ ຄົບຮອບ 72 ປີ

0
3686

ທ່ານ ຫຸມພັນອິນທະຣາດ, ຄະນະພັກ ກະຊວງ, ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນ ໂລຊີ(ກວຕ)ແລະ ທ່ານ ພົຈ ທອງເຄນ ອ່ອນດາວົງ, ອະດິດຮອງປະທານສະຫະພັນນັກຮົບແຫ່ງຊາດ ລາວ ໃຫ້ກຽດ ເປັນປະທານຮ່ວມເນື່ອງໃນໂອກາດ ກະຊວງ ວິທະຍາສາດ ແລະ ເຕັກໂນໂລຊີ (ກວຕ) ຈັດພິທີປາຖະກະຖາ ວັນສ້າງຕັ້ງສະຫະພັນນັກຮົບເກົ່າ ແຫ່ງຊາດ ຄົບຮອບ 15 ປີ (9/9/2002-9/9/2017)ແລະ ວັນຊາດ ສສ ຫວຽດ ນາມ ຄົບຮອບ 72 ປີ (02/09/1945-02/09/2017) ໃນຕອນເຊົ້າຂອງວັນທີ 28 ກັນຍາ 2017 ຜ່ານມານີ້.

ທ່ານ ພົຈ ທອງເຄນ ອ່ອນດາວົງ, ອະດິດຮອງປະທານສະຫະພັນນັກຮົບເກົ່າແຫ່ງຊາດ ລາວ ໃຫ້ກຽດ ເຜີຍແຜ່ເອກະສານປາຖະກະຖາ 15 ປີ ແຫ່ງການສ້າງຕັ້ງ, ພັດທະນາ ແລະ ເຕີບໃຫຍ່ຂະຫຍາຍຕົວຂອງ ສະຫະ ພັນນັກຮົບເກົ່າແຫ່ງຊາດລາວ (ສນຫລ) ຊຶ່ງມີເນື້ອໃນບາງຕອນວ່າ: ວັນທີ 9 ກັນຍາ 2002 ແມ່ນວັນສ້າງຕັ້ງ ສະຫະພັນນັກຮົບເກົ່າ ແຫ່ງຊາດລາວ ຄົບຮອບ 15 ປີ, ເປັນວັນປະຫວັດສາດສຳຄັນຂອງຊາດຂອງພັກ ແລະ ຂອງນັກຮົບເກົ່າແຫ່ງຊາດລາວ ທີ່ໝູນວຽນມາຄົບຮອບ 15 ປີ (9/9/2002-9/9/2017). ບົນເສັ້ນທາງແຫ່ງການ ສ້າງຕັ້ງ, ສູ້ຮົບມີໄຊ ແລະ ເຕີບໃຫຍ່ຂະຫຍາຍຕົວ, ນັກຮົບເກົ່າພວກເຮົາໄດ້ຜ່ານຜ່າຄວາມຫຍຸ້ງຍາກ, ເສຍສະຫຼະນາໆປະການ, ຕໍ່ສູ້ເພື່ອຊາດ, ເພື່ອປະຊາຊົນ, ຕີຊະ ນະສັດຕູທີ່ໃຫຍ່ໂຕ, ເຂັ້ມແຂງກວ່າພວກເຮົາບໍ່ຈັກເທົ່າໃດທົບ, ສາມາດປົດປ່ອຍປະເທດຊາດ ແລ້ວສືບຕໍ່ປົກປັກຮັກສາ ແລະ ສ້າງສາປະເທດຊາດ ທີ່ສົມຊື່ວ່າ: ນັກຮົບວິລະຊົນຂອງຊາດລາວ, ວິລະຊົນຄົນລາວພິລະອາດ ຫານ ແລະ ທັງແມ່ນວັນກຳເນີດເກີດຂຶ້ນຂອງອົງການຈັດຕັ້ງມະຫາຊົນຂອງພັກຕື່ມອີກອົງການໜຶ່ງ ແລະ ທັງເປັນວັນປະຫວັດສາດທີ່ມີຄວາມໝາຍສຳຄັນສຳລັບຖັນ ແຖວນັກຮົບປະຕິວັດ-ນັກຮົບເກົ່າໃນປັດຈຸບັນ, ພະນັກງານ, ສະມາຊິກພັກຜູ້ສືບທອດ ກໍຄືຄົນຮຸ່ນໜຸ່ມ ທີ່ຈະໄດ້ພ້ອມກັນຫວນຄືນມູນເຊື້ອ ແລະ ຈາລືກຄຸນງາມຄວາມ ດີຂອງຄົນຮຸ່ນພໍ່ແມ່, ລຸງປ້າ, ອາວອາ, ຂອງພວກເຮົາທີ່ມີຕໍ່ປະເທດຊາດ, ຕໍ່ປະຊາຊົນລາວບັນດາເຜົ່າ.

ທ່ານ ອະດິດຮອງປະທານ ຍັງໄດ້ຍົກໃຫ້ເຫັນເຖິງ ສີ່ຈຸດສຳຄັນຄື: I. ມູນເຊື້ອ ແລະ ຜົນງານອັນໃຫຍ່ຫຼວງ ຂອງຖັນແຖວນັກຮົບເກົ່າ ໃນການຕໍ່ສູ້ເພື່ອກອບກູ້ ເອົາເອກະລາດ, ປົກປັກຮັກສາ ແລະ ພັດທະນາປະເທດຊາດ ພາຍໃຕ້ການນຳພາຂອງພັກ. ພວກເຮົາ ຮູ້ນຳກັນແລ້ວວ່າ: ປະເທດລາວເປັນປະເທດທີ່ອຸດົມຮັ່ງມີເຕັມໄປ ດ້ວຍຊັບພະຍາກອນທຳມະຊາດ ແລະ ມີຈຸດທີ່ຕັ້ງຍຸດທະສາດທີ່ສຳຄັນ ອັນເປັນເງື່ອນໄຂ ເຮັດໃຫ້ບັນດາປະເທດມະຫາອຳນາດຍາດແຍ່ງແຂ່ງຂັນກັນຫວັງຈະຢຶດຄອງ ເອົາປະເທດລາວມາເປັນຫົວເມືອງຂຶ້ນຕະຫລອດມາ; II. ການກໍາເນີດ ແລະ ພາລະບົດບາດ, ໜ້າທີ່ຂອງອົງການ ສນຫລ; III. ຜົນງານການເຄື່ອນໄຫວຂອງຄະນະ ບໍລິຫານງານ ສນຫລ ແຕ່ລະສະໄໝ ຕະຫຼອດໄລຍະ 15ປີທີ່ຜ່ານມາ ພາຍໃຕ້ການຊີ້ນໍາ-ນໍາພາຢ່າງໃກ້ຊິດຂອງກົມການເມືອງສູນກາງພັກ, ຄະນະເລຂາທິການສູນກາງພັກ, ສະພາແຫ່ງຊາດ, ລັດຖະບານ, ຄວາມເອົາໃຈໃສ່ຊີ້ນຳ-ນຳພາຂອງຄະນະພັກ-ອົງການປົກຄອງທ້ອງຖິ່ນແຕ່ລະຂັ້ນ, ການສະໜັບສະໜູນອູ້ມຊູຊ່ວຍເຫຼືອຂອງບັນດາ ກະຊວງ, ອົງການ ແລະ ທຸກຊັ້ນຄົນໃນສັງຄົມ. ແລະ IV. ທິດທາງໃນຕໍ່ໜ້າ ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ທີ x ຂອງພັກປະຊາຊົນປະຕິວັດລາວຕິດ ພັນກັບການຈັດຕັ້ງປະຕິບັດມະຕິກັບກອງປະຊຸມ ໃຫຍ່ຄັ້ງທີ III ຂອງ ສນຫລ ວາງອອກ. ສ້າງຜົນງານຂໍ່ານັບຮັບຕ້ອນວັນປະຫວັດສາດສຳຄັນຂອງຊາດ, ຂອງກຳລັງ ປະກອບອາວຸດ ແລະ ວັນສ້າງຕັ້ງ ສນຫລ ຄົບຮອບ 15ປີ ໃຫ້ເປັນຂະບວນຝົດຟື້ນ ພາຍໃຕ້ຄຳຂວັນທີ່ວ່າ: “ນໍ້າໃຈວັນທີ 9 ກັນຍາ ໝັ້ນຍືນ”; “ຊົມເຊີຍວັນສ້າງຕັ້ງ ສະຫະພັນນັກຮົບເກົ່າແຫ່ງຊາດລາວ ຄົບຮອບ 15 ປີຢ່າງສຸດໃຈ” ແລະ “ ອອກແຮງຈັດຕັ້ງປະຕິບັດຂໍ້ແຂ່ງຂັນ 3 ດີ 6 ຮັກສາ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາໃຫ້ປະກົດຜົນເປັນຈິງ”.

ໃນໂອກາດດຽວກັນນີ້, ທ່ານ ຫຸມພັນ ອິນທະຣາດ, ຮອງລັດຖະມົນຕີ ກວຕ ກໍໄດ້ໃຫ້ກຽດ ປາຖະກະຖາກ່ຽວກັບ ວັນຊາດ ສສ ຫວຽດນາມ ຄົບຮອບ 72 ປີ ຊຶ່ງທ່ານ ໄດ້ກ່າວລະອຽດແຕ່ລະໄລຍະເຊັ່ນ: ໄລຍະການຕໍ່ສູ້ຍາດເອົາອຳນາດການປົກຄອງ(1930-1945); ໄລຍະປົກປັກຮັກສາ ແລະ ຂະຫຍາຍໝາກຜົນຂອງການ ປະຕິວັດເດືອນສິງຫາ, ດຳເນີນການຕໍ່ສູ້ປົດປ່ອຍຊາດ, ທ້ອນໂຮມປະເທດຊາດເປັນເອກະພາບ (1945-1975); ໄລຍະການປະຕິວັດສັງຄົມນິຍົມ, ປະຕິບັດພາລະກິດ ປ່ຽນແປງໃໝ່, ກໍ່ສ້າງລັດທິສັງຄົມນິຍົມຢູ່ຫວຽດນາມ (1975 ເປັນຕົ້ນມາ) ແລະ ການພົວພັນຮ່ວມມື, ຄວາມສາມັກຄີພິເສດ ລາວ-ຫວຽດນາມ.

ເຂົ້າຮ່ວມພິທີໃນຄັ້ງນີ້ ມີບັນດາ ຮອງລັດຖະມົນຕີ ກວຕ ແລະ ພະນັກງານ-ລັດຖະກອນ ພາຍໃນກະຊວງ.

LEAVE A REPLY

Please enter your comment!
Please enter your name here