ຈະສ້າງການບໍລິການປື້ມແບບອອນລາຍ E-Book Store

0
143

ສະຖາບັນ ເຕັກໂນໂລຊິ ຄອມພິວເຕີ ແລະ ເອເລັກໂຕຼນິກ, ກະຊວງວິທະຍາສາດ ແລະ ເຕັກໂນໂລຊີ ຮ່ວມມືກັບ ບໍລິສັດ ເອເລເມັນ ເພເມັນ ໂຊລູຊັນ ລາວຈຳກັດ (Element Payment Solution) ໄດ້ເຊັນບົດບັນທຶກຄວາມເຂົ້າໃຈວ່າດ້ວຍການຮ່ວມມື ສ້າງລະບົບບໍລິການປື້ມແບບອອນລາຍ E-Book Store ໃນຕອນແລງຂອງວັນທີ 14 ສິງຫາ 2019 ນີ້, ທີ່ໂຮງແຮມ ຄຣາວພລາຊ່າ ນະຄອນຫຼວງວຽງຈັນ.
ໃນພິທີຄັ້ງນີ້, ທ່ານ ພອນປະເສີດ ສຸລິນທອນ, ຫົວໜ້າສູນບໍລິການ ວິຊາການ ໄດ້ໃຫ້ຮູ້ວ່າ: ຈຸດປະສົງຂອງການລົງນາມບົດບັນທຶກຊ່ວຍຈໍາຄັ້ງນີ້ ແມ່ນເພື່ອຮ່ວມກັນສ້າງ ລະບົບ E-Book ໃຫ້ກາຍເປັນ E-Book Store ຫຼື ຮ້ານຂາຍປື້ມອອນລາຍ ແລະ ແບບລະບົບເອເລັກໂຕຼນິກໄດ້, ໂດຍການນຳໃຊ້ເຕັກໂນໂລຊີແບບໃໝ່ ທີ່ນຳໃຊ້ຜ່ານແອບພລິເຄເຊິນເທິງໂທລະສັບມືຖື (Mobile Application), ລະບົບເວັບໄຊ໌ ແລະ ລະບົບເຄື່ອງ ເອເລັກໂຕຼນິກ (ຕູ້ Kios) ເພື່ອເປັນການຕໍ່ຍອດໂຄງການດັ່ງກ່າວ, ທາງສະຖາບັນຈຶ່ງໄດ້ຮ່ວມກັບ ບໍລິສັດເອເລເມັນ ເພເມັນ ໂຊລູຊັນ ລາວຈຳກັດ ໃນການຄົ້ນຄວ້າຮ່ວມມືສ້າງລະບົບດັ່ງກ່າວຂຶ້ນ. ກິດຈະກໍາທີ່ຈະຮ່ວມມືກັນປະກອບມີ ຄື: ຮ່ວມມືກັບສູນບໍລິການ ວິຊາການ, ສະຖາບັນ ເຕັກໂນໂລຊີ ຄອມພິວເຕີ ແລະ ເອເລັກໂຕຼນິກ ເພື່ອພັດທະນາໂຄງການ E-Book ໃຫ້ກາຍເປັນຫ້ອງສະໝຸດ ແບບເອເລັກໂຕຼນິກ; ຮ່ວມກັນສ້າງບົດຄວາມ E-Book ແລະ ສ້າງບ່ອນໃຫ້ບໍລິການ ເຊົ່າ ແລະ ຂາຍປື້ມແບບເອເລັກ ໂຕຼນິກ (E-Book Store) ໃຫ້ເຊື່ອມໂຍງກັບພາກພື້ນ ແລະ ສາກົນ; ຮ່ວມມືກັນສ້າງ ແລະ ພັດທະນາລະບົບ (Platform) ໃນການໃຫ້ບໍລິການດ້ານ E-Book ເທິງ ມືຖື Smartphone, tablet ແລະ ຄອມພິວເຕີ. ພ້ອມນັ້ນ, ສອງຝ່າຍໄດ້ເຫັນດີຮ່ວມມືກັນທາງດ້ານການພັດທະນາຊັບພະຍາກອນມະນຸດແບບໄລຍະສັ້ນ ໂດຍຮູບການຈັດຝຶກອົບຮົມ, ສຳມະນາ ໃນແຕ່ລະກິດຈະກໍາທີ່ຮ່ວມມືນຳກັນ.
ທ່ານກ່າວຕື່ມວ່າ: ໃນໄລຍະຜ່ານມາ ສະຖາບັນ ເຕັກໂນໂລຊິ ຄອມພິວເຕີ ແລະ ເອເລັກໂຕຼນິກ ໄດ້ມີຜົນສໍາເລັດໃນການຄົ້ນຄວ້າໂປແກຼມ e-book ແລະ ປະຍຸກໃຊ້ ຊຶ່ງໄດ້ຮັບຜົນຕອບຮັບເປັນຢ່າງດີ. ເພື່ອເປັນການຕໍ່ຍອດໂຄງການດັ່ງກ່າວ, ສະຖາບັນຈຶ່ງໄດ້ຮ່ວມກັບ ບໍລິສັດເອເລເມັນ ເພເມັນ ໂຊລູຊັນ ລາວຈຳກັດ ເພື່ອຮ່ວມມືຄົ້ນຄວ້າດ້ານການສ້າງຖານຂໍ້ມູນໜັງສືແບບເອເລັກໂຕຼນິກ ຫຼື e-book ທີ່ມີຢູ່ແລ້ວ ໃຫ້ໃຫຍ່ ແລະ ຫຼາກຫຼາຍຂຶ້ນ. ຊຶ່ງເປັນ ບໍລິສັດດັ່ງກ່າວແມ່ນເປັນບໍລິສັດທີ່ມີຄວາມຊຳນານງານໃນການດຳເນີນທຸລະກິດການບໍລິການດ້ານເຕັກໂນໂລຊີຂໍ້ມູນຂ່າວສານ, ເອເລັກໂຕຼນິກ ແລະ ລະບົບອັດຕະໂນມັດ ທີ່ມີປະສົບການ ແລະ ຄວາມຊໍານານ ຢູ່ຕ່າງປະເທດມາກ່ອນ, ເປັນຕົ້ນແມ່ນ ປະເທດລັດເຊຍ ແລະ ໄທ. ນອກນີ້, ຍັງມີຊ່ຽວຊານດ້ານໄອຊີທີ ເພື່ອສ້າງຜະລິດຕະພັນ ແລະ ພັດທະນາການຂຽນຊອບແວຣ໌ຕ່າງໆ ບໍ່ວ່າຈະເປັນແອັບພລິເຄເຊິນເທິງມືຖື ຫຼື ຊອບແວຣ໌ຄອມພິວເຕີ ແລະ ເຄື່ອງອຸປະກອນເອເລັກໂຕຼນິກ. ນອກຈາກນັ້ນ, ບໍລິສັດຍັງມີຈຸດປະສົງເພື່ອສົ່ງເສີມການລົງທຶນໃຫ້ກັບທຸລະກິດລະດັບ startup ແລະ SME ທີ່ມີທຸລະກິດທີ່ໜ້າສົນໃຈໃນການຄ້າ ລະຫວ່າງ ປະເທດໄທ ແລະ ປະເທດລາວ ໂດຍມີຈຸດປະສົງໃນການສະໜັບສະໜູນທາງດ້ານການລົງທຶນໃນດ້ານເຕັກໂນໂລຊີ ແລະ ນະວັດຕະກຳ ເພື່ອເປັນການສົ່ງເສີມການພັດທະນາ ເສດຖະກິດ-ສັງຄົມ.
ລົງນາມເຊັນບົດບັນທຶກຊ່ວຍຈໍາໃນຄັ້ງນີ້ໂດຍ ທ່ານ ວິລະສັກ ອິນທະປະຖາ, ຫົວໜ້າສະຖາບັນເຕັກໂນໂລຊີຄອມພິວເຕີ ແລະ ເອເລັກໂຕຼນິກ, ທ່ານ ປອ. ຄຳເພັດ ວົງດາລາ, ຫົວໜ໊າກົມແຜນການ ແລະ ຮ່ວມມື, ກະຊວງວິທະຍາສາດ ແລະ ເຕັກໂນໂລຊີ ແລະ ທ່ານ ALEXEY VEGMANF, ປະທານ ບໍລິສັດ ເອເລເມັນ ເພເມັນ ໂຊລູຊັນ ລາວຈຳກັດ ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ (ກວຕ), ມີບັນດາທ່ານ ຮອງ ລັດຖະມົນຕີ, ຫົວໜ້າຫ້ອງການ, ກົມ, ສະຖາບັນ, ແຂກທີ່ຖຶກເຊີນຈາກພາກສ່ວນຕ່າງໆ ແລະ ພະນັກງານວິຊາການທັງສອງຝ່າຍເຂົ້າຮ່ວມ.

  

LEAVE A REPLY

Please enter your comment!
Please enter your name here