ຂະບວນຄາຣາວານ ຊາວໜຸ່ມລາວທົ່ວປະເທດ ເດີນຕາມຮອຍກອງພັນທີ 2​ ວິລະຊົນ​ຜ່າວົງປິດລ້ອມຂອງສັດຕູຢ່າງມີໄຊ​ ຄົບຮົບ 60ປີ

0
53

ຂະບວນຄາຣາວານ ຊາວໜຸ່ມລາວທົ່ວປະເທດ ເດີນຕາມຮອຍກອງພັນທີ 2​ ວິລະຊົນ​ຜ່າວົງປິດລ້ອມ ຂອງສັດຕູຢ່າງມີໄຊ​ ຄົບຮົບ 60 ປີ ພາຍໃຕ້ຫົວຂໍ້ “ບໍ່ມີມື້ນັ້ນ ບໍ່ມີວັນນີ້” ໄດ້ຈັດຂຶ້ນໃນລະຫວ່າງວັນທີ 10-13 ມິຖຸນາ 2019 ຜ່ານມານີ້, ຊຶ່ງໃນຕອນເຊົ້າຂອງ ວັນທີ 10 ມິຖຸນາ ກ່ອນອອກເດີນທາງ ຂະບວນຄາຣາວານ ຊາວໜຸ່ມລາວທົ່ວປະເທດ ໄດ້ເຕົ້າໂຮມກັນເຂົ້າຮ່ວມວາງກະຕ່າດອກໄມ້ຕໍ່ໜ້າອານຸສອນສະຖານ ປະທານໄກສອນ ພົມວິຫານ ແລະ ໄດ້ເລີ່ມອອກເດີນທາງຈາກນະຄອນຫຼວງວຽງຈັນ ມຸ້ງໜ້າສູ່ ແຂວງ ຊຽງຂວາງ ແລະ ຮອດຈຸດໝາຍປາຍທາງໃນຕອນບ່າຍຂອງວັນດຽວກັນ. ພໍຮອດເທດສະບານແຂວງຊຽງຂວາງ ຂະບວນຄາຣາວານ ຊາວໜຸ່ມລາວທົ່ວປະເທດ ກໍໄດ້ຮັບການຕ້ອນຮັບອັນອົບອຸ່ນຈາກຊາວໜຸ່ມ-ເຍົາວະຊົນ ແຂວງ ຊຽງຂວາງ ແລະ ໄດ້ເຕົ້າໂຮມກັນເຂົ້າຮ່ວມພິທີເປີດຂະບວນຊາວໜຸ່ມເດີນຕາມຮອຍ ກອງພັນທີ 2 ຢູ່ສະຖານທີ່ ຈໍາລອງ ກອງພັນທີ 2​ ທົ່ງໄຫຫີນ, ເມືອງແປກ ແຂວງ ຊຽງຂວາງ ໂດຍການໃຫ້ກຽດ ເຂົ້າຮ່ວມຂອງ ພໍ່ເຖົ້າ ທອງສະຫວັດ ໄຂຄຳພິທູນ, ອາດີດກຳມະການສູນກາງພັກ, ຫົວໜ້າຫ້ອງວ່າການສູນກາງພັກ, ອາດີດ ເລຂາທີ 1 ຄະນະບໍລິຫານງານ ສຊປລ​, ອາດີດນັກຮົບ, ຄະນະພັກກອງພັນທີ 2, ພ້ອມດ້ວຍພັນລະຍາ; ສະຫາຍ ອາລຸນໄຊ​ ສູນນະລາດ,​ ກຳມະການສໍາຮອງສູນກາງພັກ, ເລຂາຄະນະພັກ, ເລຂາຄະນະບໍລິຫານງານສູນກາງ ຊາວໜຸມປະຊາຊົນ ປະຕິວັດລາວ; ສະຫາຍ ບຸນຕາ ເທບພະວົງ ຄະນະເລຂາທິການ, ຮອງເລຂາຄະນະບໍລິຫານງານ ສູນກາງຊາວໜຸ່ມ ປປລ; ສະຫາຍ ຄໍາແສງ ພົມມະວັນ, ຄະນະປະຈຳພັກແຂວງ, ຜູ້ຊີ້ນຳອົງການຈັດຕັ້ງມະຫາຊົນ, ຫົວໜ້າ ຄະນະຈັດຕັ້ງແຂວງ. ນອກນີ້, ຍັງມີບັນດາສະຫາຍການນໍາຂອງ ແຂວງ ຊຽງຊວາງ​ ແລະ ຄະນະຊາວໜຸ່ມຈາກ ກະຊວງ-ອົງການ, ແຂວງ ແລະ ບັນດາຊາວໜຸ່ມ-ເຍົາວະຊົນຈາກແຂວງ ຊຽງຂວາງ ເຂົ້າຮ່ວມ​ທັງໝົດຈໍານວນ 600​ ກວ່າສະຫາຍ ຊຶ່ງ ໃນນັ້ນມີຕາງໜ້າຊາວໜຸ່ມຈາກກະຊວງວິທະຍາສາດ ແລະ ເຕັກໂນໂລຊີ ຈໍານວນ 15 ສະຫາຍ.
ຂະບວນຄາຣາວານຊາວໜຸ່ມລາວທົ່ວປະເທດຄັ້ງນີ້ ເປັນຄັ້ງປະຫວັດສາດທີ່ໄດ້ຫວນຄືນມູນເຊື້ອວິລະຊົນ ຂອງບັນພະບູລຸດນັກຮົບປະຕິວັດ ທີ່ໄດ້ເສຍສະລະເລືອດເນື້ອເພື່ອປະເທດຊາດ ໂດຍສະເພາະແມ່ນມູນເຊື້ອ ອັນພິລາອາດຫານ ຂອງກອງພັນທີ 2 ຜ່າວົງປິດລ້ອມຂອງສັດຕູຢ່າງມີໄຊ ດ້ວຍສະຕິປັນຍາອັນສະຫຼາດຫຼັກແຫຼມ ໂດຍພາຍໃຕ້ການຊີ້ນຳ-ນຳພາໂດຍກົງຮອບດ້ານ ຂອງ ພັກປະຊາຊົນປະຕິວັດລາວ. ສະນັ້ນ, ເພື່ອເປັນການລະນຶກ ເຖິງຄຸນງາມຄວາມດີຂອງບັນດານັກຮົບປະຕິວັດໃນອາດີດທີ່ໄດ້ເສຍສະລະ ແລະ ທັງເປັນການສຶກສາອົບຮົມ ແນວຄິດຊາວໜຸ່ມ ໃຫ້ເຂົ້າໃຈເຖິງມູນເຊື້ອອັນດີງາມຂອງບັນພະບູລຸດລາວເຮົາ “ບໍ່ມີມື້ນັ້ນ ບໍ່ມີວັນນີ້”. ໃນໂອກາດ ດັ່ງກ່າວ, ບັນດາຊາວໜຸ່ມໃນຂະບວນຄາຣາວານ ຍັງໄດ້ເປັນກຽດຮັບຟັງການເລົ່າເຖິງເຫດການຕົວຈິງຈາກ ພໍ່ເຖົ້າ ທອງສະຫວັດ ໄຂຄໍາພິທູນ ແລະ ພັນລະຍາຂອງທ່ານ ໂດຍໄດ້ກ່າວໃຫ້ເຫັນເຖິງ ຊີວິດການເປັນຢູ່ຂອງກອງພັນທີ 2, ຄວາມເສຍສະຫຼະ, ຄວາມມານະອົດທົນ, ການນໍາໃຊ້ເສັ້ນທາງຍຸດທະສາດ, ເດັດດ່ຽວບໍ່ຍອມຈໍານົນຕໍ່ສັດຕູ, ສະຫຼາດ, ນີ້ມນວນ, ຄ່ອງແຄ້ວ, ມີໄຫວພິບ,​ ສາມາດຕໍ່ສູ້ຕ້ານສັດຕູ ຈົນໄດ້ຮັບໄຊຊະນະຍ່າງມີໄຊ… ໃນຕອນແລງຂອງວັນດຽວກັນ ກໍໄດ້ມີກິດຈະກໍາຕ່າງໆ ເຊັ່ນ: ການແຂ່ງຂັນກິລາບານເຕະມິດຕະພາບ ແລະ ກິລາແລ່ນໄຖ່.
ຮອດຕອນເຊົ້າຂອງວັນທີ 11 ມິຖຸນາ, ຂະບວນຄາຣາວານໄດ້ສືບຕໍ່ເດີນທາງຈາກເທດສະບານ ແຂວງ ຊຽງຂວາງ ສູ່ ເມືອງໝອກ ແລະ ພໍເຖິງຈຸດໝາຍປາຍທາງ ກໍໄດ້ຮັບການຕ້ອນຮັບຢ່າງອົບອຸ່ນຂອງຊາວໜຸ່ມ, ເຍົາວະຊົນ, ພະນັກງານ, ທະຫານ, ຕໍາຫຼວດ ແລະ ປະຊາຊົນຊາວເມືອງໝອກ ທີ່ຢືນເຕັມທັງສອງຟາກທາງ ດ້ວຍຮອຍຍີ້ມ ແລະ ສຽງຕົບມືອັນສະນັ່ນຫວັ່ນໄຫວ. ພ້ອມນັ້ນ, ຂະບວນຄາຣາວານຊາວໜຸ່ມທົ່ວປະເທດ ກໍໄດ້ເຕົ້າໂຮມກັນເຂົ້າຮ່ວມຮັບຟັງການປາຖະກະຖາເລົ່າມູນເຊື້ອກອງພັນທີ 2 ທີ່ສະໂມສອນເມືອງໝອກ ແລະ ໃນຕອນບ່າຍຍັງໄດ້ຮັບຊົມການສະແດງງົວຊົນງົວ ຊຶ່ງເປັນອີກໜຶ່ງບັນຍາກາດ ແລະ ເປັນປະເພນີຂອງຊາວເມືອງ ໝອກ. ຕົກເຖິງຕອນຄໍ່າ ກໍຍັງມີການສະແດງສີລະປະຂອງຊາວເມືອງໝອກ ແລະ ຮັບຊົມການສະແດງກາຍະສິນ ຊຶ່ງເຕັມໄປດ້ວຍບັນຍາກາດຟົດຟື້ນມ່ວນຊື່ນ.
ພໍຮອດຕອນເຊົ້າຂອງວັນທີ 12 ມິຖຸນາ ຂະບວນຄາຣາວານ ໄດ້ສືບຕໍ່ມຸ້ງໜ້າສູ່ຈຸດຕັ້ງທັບສຸດທ້າຍຂອງ ກອງພັນທີ 2 ແລະ ໄດ້ມີພິທີເປີດປ້າຍຈຸດຕັ້ງທັບສຸດທ້າຍ ຂອງກອງພັນທີ 2 ວິລະຊົນຜ່າວົງປິດລ້ອມຂອງສັດຕູ ສູ່ໄຊຊະນະຢ່າງມີໄຊ ເຂດລ້ອງໂມ້-ສາມແຈ ເມືອງໝອກ ແຂວງຊຽງຂວາງ ຊຶ່ງນໍາໂດຍ ສະຫາຍ ອາລຸນໄຊ ສູນນະລາດ, ກຳມະການສຳຮອງສູນກາງພັກ, ເລຂາຄະນະພັກ, ເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນປະຕິວັດລາວ ພ້ອມຄະນະຊາວໜຸ່ມ ບັນດາກະຊວງ, ອົງການ, ແຂວງ ຮ່ວມກັບຊາວໜຸ່ມເມືອງໝອກ. ພາຍຫຼັງເປີດປ້າຍ ຄະນະກໍໄດ້ພາກັນເດີນຕາມຮອຍຈາກຈຸດ ບ້ານຢວກມູນ ຈົນເຖິງທີ່ພັກທັບສຸດທ້າຍ ເປັນໄລຍະທາງກວ່າ 1,5 ກິໂລແມັດ ດ້ວຍຄວາມຕັດສິນໃຈເດັດດ່ຽວ ຈົນໄປຮອດໄປເຖິງທີ່ໝາຍດ້ວຍໄຊຊະນະ ແລະ ມີຄວາມປອດໄພ ສົມແລ້ວທີ່ພັກປະຊາຊົນປະຕິວັດລາວໃຫ້ຊາວໜຸ່ມເປັນເໝືອນດັ່ງແຂນຂົວ ແລະ ສາຍຍານາມ ທີ່ປະທານໄກສອນ ພົມວິຫານ ໄດ້ໃຫ້ແກ່ຊາວໜຸ່ມລາວເຮົາຄື “ຊາວໜຸ່ມຈົ່ງເປັນດັ່ງນົກອິນຊີ ທີ່ບໍ່ຫວັ່ນກົວ ຕໍ່ພະຍຸລົມແດງ ຈົ່ງກາຍເປັນສິນໄຊແຫ່ງຍຸກສະໄໝ” ຊາວໜຸ່ມລາວອາດຫານ ກ້າວຂຶ້ນ! ກ້າວຂຶ້ນ!. ຫຼັງຈາກສໍາເລັດ ພາລະກິດການເດີນຕາມຮອຍກອງພັນທີ 2 ກໍໄດ້ມີກິດຈະກໍາຕ່າງໆຮ່ວມກັບປະຊາຊົນ ແລະ ເດີນທາງກັບສູ່ ເທດສະບານເມືອງໝອກ. ຮອດຕອນແລງຂອງວັນດຽວກັນກໍໄດ້ມີກິດຈະກໍາຊຸມນຸມໄຟ (ກອງໄຟ) ກັບຊາວໜຸ່ມ ເມືອງໝອກ ແລະ ຮັບຊົມການສະແດງສີລະປະ ດ້ວຍບັນຍາກາດຄຶກຄື້ນມ່ວນຊື່ນ ທ່າມກາງກອງໄຟທີຮຸ່ງແຈ້ງ ຊຶ່ງເຫັນແລ້ວເຮັດໃຫ້ຈິນຕະນາການເຖິງພາບຂອງນັກຮົບປະຕິວັດໃນຄາວກ່ອນ.
ຕອນເຊົ້າຂອງວັນທີ 13 ຂະບວນຄາຣາວານ ໄດ້ເຕົ້າໂຮມກັນຢູ່ເທດສະບານເມືອງ ໝອກ ແລະ ເດີນທາງກັບສູ່ນະຄອນຫຼວງວຽງຈັນ ດ້ວຍຄວາມປອດໄຟ ແລະ ສິ້ນສຸດພາລະກິດເດີນຕາມຮອຍກອງພັນທີສອງ ດ້ວຍຜົນສໍາເລັດຢ່າງຈົບງາມ.

   

LEAVE A REPLY

Please enter your comment!
Please enter your name here