ສຄອ ໄດ້ຈັດພິທີງານເປີດໂຕ ເວບໄຊ ປຶ້ມແບບເອເລັກໂຕຼນິກ, Lao E-Book

2
136

ໃນຕອນເຊົ້າຂອງວັນທີ 30 ພຶດສະພາ 2019, ສຄອ ໄດ້ຈັດພິທີງານເປີດໂຕ ເວບໄຊ ປຶ້ມແບບເອເລັກໂຕຼນິກ, Lao E-Book ໂດຍໃຫ້ກຽດເປີດງານໂດຍທ່ານ ບັນດິດ ສຈ ບໍວຽງຄຳ ວົງດາລາ ລັດຖະມົນຕີ ກະຊວງ ວິທະຍາສາດ ແລະ ເຕັກໂນໂລຊີ, ເພື່ອໃຫ້ທຸກຄົນໄດ້ເຂົ້າໄປນຳໃຊ້, ບົດຄວາມທີ່ເປັນຂອງຄົນລາວເອງ ເຊິ່ງໃນປະຈຸບັນມີປຶ້ມທັງຫມົດ ຫຼາຍກວ່າ 950 ເຫຼັ້ມ, ທຸກທ່ານສາມາດເຂົ້າໄປອ່ານໄດ້ທີ່ ebook.most.gov.la.
ບາດກ້າວໃຫມ່ ແຫ່ງວົງການ ການສຶກສາ ຂອງ ສປປ ລາວ !
ບົດຂ່າວ

ພິທີເປິດໂຕ ການນຳໃຊ້ປື້ມແບບເອເລັກໂຕຼນິກ (E-Book) ໄດ້ຈັດຂຶ້ນຢ່າງເປັນທາງການໃນຕອນເຊົ້າຂອງວັນທີ
30 ພຶດສະພາ 2019, ທີ່ຫ້ອງປະຊຸມຂອງກະຊວງວິທະຍາສາດ ແລະ ເຕັກໂນໂລຊີ. ໂດຍເປັນກຽດເຂົ້າຮ່ວມ ຂອງ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ.

ໃນໂອກາດຂຶ້ນກ່າວເປີດໂຕ ການນໍາໃຊ້ປື້ມແບບເອເລັກໂຕຼນິກ, ທ່ານ ວິລະສັກ ອິນທະປະຖາ, ຫົວໜ້າສະຖາບັນເຕັກໂນໂລຊີ ຄອມພິວເຕີ ແລະ ເອເລັກໂຕຼນິກ ກ່າວວ່າ: ການເປີດໂຕເວັບໄຊ໌ປື້ມເອເລັກໂຕຼນິກ (E-Book) ແລະ ການນໍາໃຊ້ປື້ມແບບເອກະເລັກໂຕຼນິກ ແມ່ນເພື່ອຕອບສະໜອງຕາມຄວາມຮຽກຮ້ອງຕ້ອງການຂອງວຽກງານໃຫ້ທັນກັບຍຸກສະໄໝ ໂດຍສະເພາະໃນຍຸກດິຈິຕ໋ອນ, ພຶດຕິກໍາການດຳລົງຊີວິດຂອງມະນຸດໄດ້ຖືກປະຕິຮູບຕາມວິວັດທະນາການຂອງເຕັກໂນໂລຊີ ເພາະເຕັກໂນໂລຊີ ສາມາດຕອບສະໜອງຄວາມຕ້ອງການຂອງມະນຸດ. ພຶດຕິກຳການຮຽນຮູ້ຂອງຄົນເຮົາຈາກຮູບແບບປື້ມ ມາເປັນຮູບແບບເອເລັກໂຕຼນິກ ໃນຍຸກດິຈິຕ໋ອນ, ອິດທິພົນຂອງ ດິຈິຕ໋ອນ ໄດ້ເຮັດໃຫ້ຫຼາຍປະເທດຕ້ອງໄດ້ປະຕິຮູບການສຶກສາ ເພື່ອກ້າວໃຫ້ທັນກັບການປ່ຽນແປງຂອງເຕັກໂນໂລຊີ. ດັ່ງນັ້ນ, ກະຊວງວິທະຍາສາດ ແລະ ເຕັກໂນໂລຊີ ກໍຄື ສະຖາບັນເຕັກໂນໂລຊີ ຄອມພິວເຕີ ແລະ ເອເລັກໂຕຼນິກ ຈຶ່ງໄດ້ຈັດທຳປື້ມແບບເອເລັກໂຕຼນິກ ເພື່ອຫັນເອົາລະບົບຂໍ້ມູນປື້ມຕຳລາຮຽນສາຂາວິຊາຕ່າງໆ, ບົດຄົ້ນຄວ້າວິໄຈຂອງບັນດານັກຄົ້ນຄວ້າ, ຄູ-ອາຈານ, ບົດໂຄງການຈົບຊັ້ນຂອງນັກສຶກສາໃນແຕ່ລະປີ, ເອກະສານ ແລະ ປື້ມຕ່າງໆ ໃຫ້ມາເປັນຮູບແບບເອເລັກໂຕຼນິກ ເພື່ອເຮັດໃຫ້ການບໍລິການຫັນໄປສູ່ຄວາມທັນສະໄໝເທື່ອລະກ້າວ ແລະ ກ້າວໄປເຖິງການເຮັດໃຫ້ຫ້ອງສະໝຸດມີຊີວິດຊີວາ, ພ້ອມທັງເປັນການເກັບຮັກສາແຫຼ່ງຂໍ້ມູນຕ່າງໆໄວ້ໃຫ້ມີຄວາມປອດໄພ, ໝັ້ນຄົງ ແລະ ຍາວນານ, ເປັນແຫຼ່ງເຕົ້າໂຮມຂໍ້ມູນຂ່າວສານ ເພື່ອໃຫ້ກາຍເປັນຄັງຄວາມຮູ້ ໃຫ້ແກ່ການສຶກສາຄົ້ນຄວ້າຂອງນັກຮຽນ, ນັກສຶກສາ, ປັນຍາຊົນ ແລະ ປະຊາຊົນທົ່ວໄປ ໄດ້ເຂົ້າເຖິງຂໍ້ມູນ, ຊອກຫາຂໍ້ມູນ ໄດ້ຢ່າງສະດວກງ່າຍດາຍ.

ໃນການເຂົ້າເຖິງຂໍ້ມູນຕ່າງໆນີ້ ແມ່ນສາມາດເຂົ້າຜ່ານລະບົບເວັບໄຊ໌ໄດ້ໂດຍການພິມ ebook.most.gov.la. ຫຼື ສາມາດດາວໂຫຼດ Application ເທິງມືຖື ໃນລະບົບ Android ດ້ວຍການຄົ້ນຫາຄໍາວ່າ laoebook, ໃນອະນາຄົດ ສະຖາບັນຈະໄດ້ມີການພັດທະນາການນໍາໃຊ້ໃນລະບົບ IOS ເພື່ອໃຫ້ກາຍເປັນການພັດທະນາປື້ມແບບເອເລັກໂຕຼນິກແບບຍືນຍົງ, ຍັງຈະສືບຕໍ່ເຮັດການຮ່ວມມືກັບພາກສ່ວນຕ່າງໆ ເພື່ອເຮັດໃຫ້ ເວັບໄຊ໌ ຂອງປື້ມແບບເອເລັກໂຕຼນິກ ກາຍເປັນສູນລວມປື້ມທີ່ມີຄວາມຫຼາກຫຼາຍຂອງແຕ່ລະຂະແໜງການ ແລະ ມີບົດຄວາມອຸດົມສົມບຸນຂຶ້ນໄປເລື້ອຍໆ.

ໃນການຈັດຕັ້ງປະຕິບັດໂຄງການດັ່ງກ່າວນີ້ ແມ່ນໄດ້ຮັບການສະໜັບສະໜູນ ແລະ ໃຫ້ການຮ່ວມມືຈາກຫຼາຍພາກສ່ວນ ເຊັ່ນ: ສະຖາບັນຄົ້ນຄວ້າວິທະຍາສາດການສຶກສາ, ສະຖາບັນການທະນາຄານ, ມະຫາວິທະຍາໄລ ວິທະຍາສາດ ສຸຂະພາບ, ມະຫາວິທະຍາໄລ ແຫ່ງລັດໂຕມສ (ສະຫະພັນລັດເຊຍ) ແລະ ໂຮງພິມຊ້າງລາວ. ນອກຈາກນີ້, ຍັງມີປື້ມບົດຮຽນຂອງສະຖາບັນເຕັກໂນໂລຊີ ຄອມພິວເຕີ ແລະ ເອເລັກໂຕຼນິກ, ບົດຄວາມດ້ານກະສິກໍາ, ດ້ານວິທະຍາສາດ, ໜັງສືພິມວິທະຍາສາດ ແລະ ການພັດທະນາ, ບັນດາປື້ມກົດໝາຍ ທັງພາສາລາວ ແລະ ພາສາອັງກິດ, ປື້ມໝວຍວັດທະນທໍາ-ສັງຄົມ ຊຶ່ງໃນເບື້ອງຕົ້ນແມ່ນສາມາດປ້ອນຂໍ້ມູນໄດ້ທັງໝົດມີ 10 ໝວດ, 950 ກວ່າເຫຼັ້ມ ແລະ ມີແຜນຈະພັດທະນາລະບົບ ພ້ອມທັງຮວບຮວມເອົາຂໍ້ມູນທາງດ້ານການສຶກສາ, ການຄົ້ນຄວ້າ-ວິໄຈ ຕ່າງໆ ເພື່ອປ້ອນເຂົ້າລະບົດໃຫ້ມີຄວາມຫຼາກຫຼາຍ ແລະ ສົມບູນຂຶ້ນເລື້ອຍໆ.

ພິທີເປີດໂຕ ປື້ມແບບເອເລັກໂຕຼນິກຄັ້ງນີ້ ຈັດໂດຍສະຖາບັນເຕັກໂນໂລຊີ ຄອມພິວເຕີ ແລະ ເອເລັກໂຕຼນິກ, ກະຊວງວິທະຍາສາດ ແລະ ເຕັກໂນໂລຊີ (ກວຕ). ຊຶ່ງມີທ່ານຫົວໜ້າຫ້ອງການ, ກົມ, ສະຖາບັນພ້ອມດ້ວຍບັນດາແຂກຖືກເຊີນຈາກສະຖາບັນການຄົ້ນຄວ້າ, ສຶກສາ ພ້ອມດ້ວຍ ນ້ອງນ້ອຍນັກຮຽນເຍົາວະຊົນເຂົ້າຮ່ວມ.

   

2 COMMENTS

  1. You are so awesome! I do not suppose I’ve truly read through
    anything like this before. So good to discover someone with some original thoughts on this topic.

    Seriously.. many thanks for starting this up. This web
    site is something that is needed on the internet, someone with a little originality!

LEAVE A REPLY

Please enter your comment!
Please enter your name here